ಮುಂಬಯಿ: ಬಾಲಿವುಡ್‌ ಸಿನಿರಂಗದ ಪ್ರತಿಭಾವಂತ ನಟರಲ್ಲಿ ಒಬ್ಬರಾಗಿರುವ ವಿದ್ಯುತ್ ಜಮಾವಾಲ್ ಅವರು ಇಂಟರ್‌ ನೆಟ್‌ ನಲ್ಲಿ ಟಾಕ್‌ ಆಫ್‌ ದಿ ಟೌನ್‌ ಆಗಿದ್ದಾರೆ. ಅದಕ್ಕೆ ಕಾರಣ ಅವರು ಪೋಸ್ಟ್‌ ಮಾಡಿರುವ ಫೋಟೋಗಳು.
ಇಂದು(ಡಿ.10) ವಿದ್ಯುತ್ ಜಮಾವಾಲ್ ಅವರದು 43ನೇ ಹುಟ್ಟುಹಬ್ಬದ ಸಂಭ್ರಮ. ಅವರು ತನ್ನ ಹುಟ್ಟುಹಬ್ಬವನ್ನು ಅಭಿಮಾನಿಗಳೊಂದಿಗೆ, ಆತ್ಮೀಯರೊಂದಿಗೆ ಆಚರಿಸಿಕೊಳ್ಳಿಲ್ಲ. ಬದಲಾಗಿ ಹಿಮಾಲಯದ ತಪ್ಪಲಿನಲ್ಲಿ ಒಂಟಿಯಾಗಿ, ಮೈಯಲ್ಲಿ ಯಾವ ಬಟ್ಟೆ ಬರೆಯಿಲ್ಲದೆಯೇ ಬೆತ್ತಲಾಗಿ ಆಚರಿಸಿಕೊಂಡಿದ್ದಾರೆ.!
ಹಿಮಾಲಯದ ತಪ್ಪಿಲಿನಲ್ಲಿ ನಟ ವಿದ್ಯುತ್ ಅವರು ಮೈ ಮೇಲೆ ತುಂಡು ಬಟ್ಟೆಯೂ ಇಲ್ಲದೇ ಕೂತುಕೊಂಡು ಯೋಗ, ಅಡುಗೆ ಮಾಡುವುದು ಹಾಗೂ ಸ್ನಾನ ಮಾಡುವಾಗಿನ ಫೋಟೋವನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದು, ಇಂಟರ್‌ ನೆಟ್‌ ನಲ್ಲಿ ಬೆಂಕಿ ಹಚ್ಚಿದೆ.
“ಹಿಮಾಲಯ ಶ್ರೇಣಿಗಳಿಗೆ ನನ್ನ ನಮನಗಳು. ಕಳೆದ 14 ವರ್ಷಗಳಿಂದ ನಾನು ಈ ರೀತಿಯಾಗಿ ಒಂಟಿಯಾಗಿ ಐಷಾರಾಮಿ ಜೀವನ ಶೈಲಿಯನ್ನು ಬಿಟ್ಟು, ಪ್ರತಿ ವರ್ಷ 7-10 ದಿನಗಳನ್ನು ಕಳೆಯುತ್ತೇನೆ. ಇದು ಜೀವನದ ಒಂದು ಅವಿಭಾಜ್ಯ ಅಂಗವಾಗಿದೆ. ಐಷಾರಾಮಿ ಜೀವನವನ್ನು ಬಿಟ್ಟು ಈ ರೀತಿ ಏಕಂತದಲ್ಲಿರುವಾಗ ನಾನು ಯಾರು – ಯಾರಲ್ಲ ಎನ್ನುವುದರ ಪ್ರಾಮುಖ್ಯತೆಯ ಬಗ್ಗೆ ತಿಳಿದುಕೊಳ್ಳುತ್ತೇನೆ. ಇದು “ನಾನು ಯಾರು” ಎಂದು ತಿಳಿದುಕೊಳ್ಳುವ ಮೊದಲ ಹಂತವಾಗಿದೆ. ಇದು ಪ್ರಕೃತಿ ಒದಗಿಸಿದ ಐಷಾರಾಮಿ” ಎಂದು ನಟ ವಿದ್ಯುತ್ ಪೋಸ್ಟ್‌ ಕೆಳಗೆ ಬರೆದುಕೊಂಡಿದ್ದಾರೆ.
ಸ್ಥಳೀಯ ಕುರಿಗಾಹಿಯೊಬ್ಬರು ಫೋಟೋ ತೆಗೆದಿರುವುದಾಗಿ ವಿದ್ಯುತ್ ಹೇಳಿದ್ದಾರೆ.
ಸದ್ಯ ಫೋಟೋ ನೋಡಿ ನೆಟ್ಟಿಗರು ವಿದ್ಯುತ್ ಅವರು ಆಧ್ಯಾತ್ಮದ ಕಡೆಗೆ ಹೋಗುತ್ತಿದ್ದಾರೆ ಎಂದು ಕಮೆಂಟ್‌ ಮಾಡಿದ್ದಾರೆ. ಕೆಲವರು ಇಂತಹ ಫೋಟೋಗಳನ್ನು ಹಾಕಬಾರದಿತ್ತು ಎಂದು ಕಮೆಂಟ್‌ ಮಾಡಿದ್ದಾರೆ.
ವಿದ್ಯುತ್ ಅವರು ಮುಂದೆ ʼ ಕ್ರ್ಯಾಕ್ʼ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದು, ಈ ಸಿನಿಮಾ 2024 ರ ಫೆ.23 ರಂದು ತೆರೆ ಕಾಣಲಿದೆ.
