ನಟಿ ವಿದ್ಯಾ ಸಿನ್ಹಾ ನಿಧನ

ಮುಂಬೈ: ಹಿಂದಿ ಚಿತ್ರರಂಗದ ಹಿರಿಯ ನಟಿ ವಿದ್ಯಾ ಸಿನ್ಹಾ (71) ಗುರುವಾರ ನಿಧನರಾಗಿದ್ದಾರೆ. ಉಸಿರಾಟದ ತೊಂದರೆ ಹಿನ್ನೆಲೆಯಲ್ಲಿ ಅವರನ್ನು ನಗರದ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅವರು ಮಧ್ಯಾಹ್ನ 12 ಗಂಟೆಗೆ ಕೊನೆಯುಸಿರೆಳೆದರು ಎಂದು ಪುತ್ರಿ ಜಾಹ್ನವಿ ತಿಳಿಸಿದ್ದಾರೆ. ‘ಛೋಟಿ ಸಿ ಬಾತ್‌’ ‘ಪತಿ, ಪತ್ನಿ ಔರ್‌ ವೋ’ ‘ರಜನಿಗಂಧ’ ಅವರು ಮುಖ್ಯ ಭೂಮಿಕೆಯಲ್ಲಿ ನಟಿಸಿದ ಜನಪ್ರಿಯ ಸಿನಿಮಾಗಳು. 40 ವರ್ಷಗಳ ಕಾಲ ಸಿನಿಮಾ ರಂಗದಲ್ಲಿ ಇದ್ದ ಅವರು ‘ಜೋಶ್‌’, ‘ಲವ್‌ ಸ್ಟೋರಿ’, ‘ಬಾಡಿ ಗಾರ್ಡ್‌’ ಸೇರಿದಂತೆ ಹಲವಾರು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಇದರ ಜತೆಗೆ ಟಿವಿ ಕಾರ್ಯಕ್ರಮಗಳಾಗಿರುವ ‘ಕಬೂಲ್ ಹೈ’, ‘ಕುಲ್ಫಿ ಕುಮಾರ್‌ ಬಜೇವಾಲಾ’ಗಳಲ್ಲಿಯೂ ಅವರು ಪಾಲ್ಗೊಂಡಿದ್ದರು.