ವಾಸು ಪಕ್ಕಾ ದರ್ಶನ್‌!

ನಟ, ನಿರ್ಮಾಪಕ ಅನೀಶ್‌ ತೇಜೇಶ್ವರ್‌ ಅಭಿನಯದ “ವಾಸು ನಾನ್‌ ಪಕ್ಕಾ ಕಮರ್ಷಿಯಲ್‌’ ಚಿತ್ರ ಇನ್ನೇನು ಬಿಡುಗಡೆಗೆ ತಯಾರಾಗಿದೆ. ಚಿತ್ರದ ಬಿಡುಗಡೆ ದಿನಾಂಕವನ್ನು ಅಧಿಕೃತವಾಗಿ ಘೋಷಿಸಲೆಂದೇ ಅನೀಶ್‌ ತೇಜೇಶ್ವರ್‌ ಅಂಬೇಡ್ಕರ್‌ ಭವನದಲ್ಲಿ ಶನಿವರಾ ಸಂಜೆ ಭರ್ಜರಿ ಮನರಂಜನೆ ಕಾರ್ಯಕ್ರಮ ಏರ್ಪಡಿಸಿದ್ದರು.

ನಟ ದರ್ಶನ್‌ ಆ ಕಾರ್ಯಕ್ರಮದ ಆಕರ್ಷಣೆ. ಅವರ ಮೂಲಕ ತಮ್ಮ ಚಿತ್ರದ ಬಿಡುಗಡೆ ದಿನಾಂಕವನ್ನು ಘೋಷಿಸಿದ್ದು ಇನ್ನೊಂದು ವಿಶೇಷ. ಅಂದಹಾಗೆ, “ವಾಸು ನಾನ್‌ ಪಕ್ಕಾ ಕಮರ್ಷಿಯಲ್‌’ ಆಗಸ್ಟ್‌ 3 ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ. ದಿನಾಂಕ ಇರುವ ಚಿತ್ರದ ಪೋಸ್ಟರ್‌ವೊಂದನ್ನು ಬಿಡುಗಡೆ ಮಾಡುವ ಮೂಲಕ ದರ್ಶನ್‌, ಅನೀಶ್‌ ತೇಜೇಶ್ವರ್‌ ಮತ್ತು ಚಿತ್ರತಂಡಕ್ಕೆ ಶುಭಕೋರಿದ್ದಾರೆ.

ಚಿತ್ರ ಬಿಡುಗಡೆ ಮುನ್ನ ಒಂದು ದೊಡ್ಡ ಮನರಂಜನೆ ಕಾರ್ಯಕ್ರಮ ಮಾಡಬೇಕೆಂಬುದು ಅನೀಶ್‌ ತೇಜೇಶ್ವರ್‌ ಅವರ ಬಯಕೆಯಾಗಿತ್ತು. ಅವರ ಕಲ್ಪನೆಯಂತೆ ನಡೆದ ಆ ಕಾರ್ಯಕ್ರಮದಲ್ಲಿ ಮೊದಲು ಟ್ರೇಲರ್‌ ತೋರಿಸಲಾಯಿತು. ನಂತರ, ಅನುಷಾ ರಂಗನಾಥ್‌, ಅನಿತಾಭಟ್‌,ಕೃಷಿ ತಾಪಂಡ, ಸೇರಿದಂತೆ ಇತರರು ಹಾಡುಗಳಿಗೆ ಹೆಜ್ಜೆ ಹಾಕುವ ಮೂಲಕ ರಂಜಿಸಿದರು.

ಯುವ ಪ್ರತಿಭಾವಂತ ಯಶವಂತ್‌ ಯೋಗಾಸನದ ವಿವಿಧ ಭಂಗಿ ಆಕರ್ಷಣೆಯಾಗಿತ್ತು. ಮೌಂಟ್‌ ಕಾರ್ಮಲ್‌ ಕಾಲೇಜು ವಿದ್ಯಾರ್ಥಿನಿಯರ ಹಿಪ್‌ಹಾಪ್‌ ಡ್ಯಾನ್ಸ್‌ ಕೂಡ ಗಮನಸೆಳೆಯಿತು. ಈ ವೇಳೆ ನಿರ್ದೇಶಕ ಅಜಿತ್‌ ಉಗ್ಗಿನ್‌ ವಾಸನ್‌, ನಾಯಕಿ ನಿಶ್ವಿ‌ಕಾ ನಾಯ್ಡು ಇತರರು ಇದ್ದರು. ದಿಲೀಪ್‌ ಚಕ್ರವರ್ತಿ ಛಾಯಾಗ್ರಹಣವಿದೆ. ಅಜನೀಶ್‌ ಲೋಕನಾಥ್‌ ಸಂಗೀತವಿದೆ.