ವಿಶ್ವಶಾಂತಿ ಸರಣಿಗೆ ವಂಶೀ ವಿಲಾಸ ಸೇರ್ಪಡೆ

ಶಿರಸಿ: ಅಪರೂಪದ ಪದ್ಯಗಳ ಮೂಲಕ ಶ್ರೀಕೃಷ್ಣನ ಪ್ರೇಮದ ಅಮೃತವನ್ನೇ ಹರಿಸುವ ವಿಶ್ವ ಶಾಂತಿ ಸರಣಿಗೆ ಏಳನೇ ಯಕ್ಷರೂಪಕವಾಗಿ ವಂಶೀ ವಿಲಾಸ ಸೇರ್ಪಡೆಗೊಂಡಿತು.

ಪ್ರಸಿದ್ದ ಚಲನಚಿತ್ರತಾರೆ ತಾರಾ ಲೋಕಾರ್ಪಣೆ ಗೊಳಿಸಿದ ಈ ರೂಪಕ ಒಂದುವರೆ ಗಂಟೆಗಳ‌ ಕಾಲ ‌ತುಳಸಿ ಹೆಗಡೆ ಅವರ ಮೂಲಕ ಅನಾವರಣಗೊಂಡಿತು.

ದಿ‌.ಪ್ರೋ.ಎಂ.ಎ.ಹೆಗಡೆ ಅವರು ರಚಿಸಿದ, ವಿ.ಉಮಾಕಾಂತ ಭಟ್ ಅವರ ನಿರ್ದೇಶನದ ಈ ರೂಪಕದ ಹಿಮ್ಮೇಳದಲ್ಲಿ ಕೊಳಗಿ ಕೇಶವ ಹೆಗಡೆ, ಶಂಕರ ಭಾಗವತ್, ವಿಘ್ನೇಶ್ವರ ಗೌಡ, ಪ್ರಸಾದನದಲ್ಲಿ ವೆಂಕಟೇಶ ಹೆಗಡೆ ಬಗ್ರಿಮಕ್ಕಿ ಸಹಕಾರ ನೀಡಿದರು.

ಸಾಗರದ ಆರರ ಪೋರಿ ಕು. ನಯನ ಬಳಸಗೋಡು ಅವಳ ಯೋಗ ಪ್ರದರ್ಶನ ಮೂಲಕ ಸಾಂಸ್ಕೃತಿಕ ಕಾರ್ಯಕ್ರಮಗಳು ಆರಂಭವಾದವು.  ಅಖಿಲಾ ನಾಗರಾಜ್ ಹೆಗಡೆ ಶಿರನಾಲರಿಂದ ಮುರುಳಿ ವಾದ‌ನ ಕಳೆಗಟ್ಟಿದರೆ,  ಸಾಗರದ ಶಿಶಿರ ವಿಘ್ನೇಶರಿಂದ ಭಕ್ತಿ ಭಾವಗೀತೋತ್ಸವ ಪ್ರೇಕ್ಷಕರ ಗಮನ ಸೆಳೆಯಿತು.

ತಬಲಾದಲ್ಲಿ ಗಣೇಶ ಗುಂಡ್ಕಲ್, ಹಾರ್ಮೋನಿಯಂನಲ್ಲಿ ಪ್ರಕಾಶ ಹೆಗಡೆ ಯಡಹಳ್ಳಿ ಸಹಕಾರ ನೀಡಿದರು.