Uttarakhand: ಪತಿಯನ್ನು ಹೆದರಿಸುವ ನಿಟ್ಟಿನಲ್ಲಿ ಮಗನಿಗೆ ಥಳಿಸಿ ವಿಡಿಯೋ ಮಾಡಿದ ಪತ್ನಿ.!

ಡೆಹ್ರಾಡೂನ್: ಕೌಟುಂಬಿಕ ಕಲಹದಿಂದ ತನ್ನ ಮಗನನ್ನೇ ಮಹಿಳೆಯೊಬ್ಬರು ಥಳಿಸಿರುವ ವಿಡಿಯೋ ಮಾಡಿ ಅದನ್ನು ಪತಿಗೆ ಕಳಿಸಿರುವ ಘಟನೆ ಉತ್ತರಾಖಂಡದ ಹರಿದ್ವಾರದಲ್ಲಿ ನಡೆದಿರುವುದು ವರದಿಯಾಗಿದೆ.

ವಿಡಿಯೋ ವೈರಲ್‌ ಆದ ಬೆನ್ನಲ್ಲೇ ಹರಿದ್ವಾರ ಪೊಲೀಸರು ಇದನ್ನು ಪರಿಶೀಲಿಸಿದ್ದು, ಇದು ಎರಡು ತಿಂಗಳ ಹಿಂದಿನ ವಿಡಿಯೋ ಎಂದು ಹೇಳಿದ್ದಾರೆ.

ಮಹಿಳೆಯ ಪತಿ ಉತ್ತರ ಪ್ರದೇಶದಲ್ಲಿ ನೆಲೆಸಿದ್ದಾನೆ. ಈತ ಮದ್ಯವ್ಯಸನಿಯಾಗಿದ್ದು, ಮನೆ ಖರ್ಚಿಗೆ ಒಂದು ರೂಪಾಯಿಯನ್ನು ನೀಡುತ್ತಿರಲಿಲ್ಲ. ಇದರಿಂದ ಬೇಸತ್ತು ಹೋದ ಮಹಿಳೆ ತನ್ನ ಪತಿಯನ್ನು ಹೆದರಿಸುವ ನಿಟ್ಟಿನಲ್ಲಿ  11 ವರ್ಷದ ಮಗನನ್ನು ಥಳಿಸಿದ್ದಾಳೆ.

ಥಳಿಸುತ್ತಿರುವ ವಿಡಿಯೋವನ್ನು ಹಿರಿಯ ಮಗ ಮೊಬೈಲ್‌ ನಲ್ಲಿ ಸೆರೆ ಹಿಡಿದಿದ್ದಾನೆ. ಈ ವಿಡಿಯೋವನ್ನು ಮಹಿಳೆ ಪತಿಗೆ ಕಳುಹಿಸಿದ್ದಾಳೆ. ವಿಡಿಯೋ ಸಿಕ್ಕ ಬಳಿಕ ಪತಿ ಆ ವಿಡಿಯೋವನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಪೋಸ್ಟ್‌ ಮಾಡಿದ್ದಾನೆ.

ವೀಡಿಯೊ ವೈರಲ್ ಆಗುತ್ತಿದ್ದಂತೆ ಮಕ್ಕಳ ಕಲ್ಯಾಣ ಸಮಿತಿಗೆ (ಸಿಡಬ್ಲ್ಯೂಸಿ) ಮಾಹಿತಿ ನೀಡಿ ,ನಂತರ ಮಹಿಳೆಯನ್ನು ವಿಚಾರಣೆಗೆ ಕರೆಯಲಾಗಿದೆ. ಆಕೆಯನ್ನು ಹಲವು ಸುತ್ತಿನ ಕೌನ್ಸೆಲಿಂಗ್ ನಡೆಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಳೆದ 10 ವರ್ಷದಿಂದ ಪತಿಯ ಕುಡಿತದ ಚಟದಿಂದ ಸಂಸಾರದಲ್ಲಿ ಅನೇಕ ಬಾರಿ ಕಲಹ ಉಂಟಾಗಿದೆ. ಕೆಲವು ತಿಂಗಳುಗಳಿಂದ ಮನೆಗೆ ಬಾರದೆ ಉತ್ತರಪ್ರದೇಶದಲ್ಲಿ ಅಂಗಡಿಯೊಂದನ್ನು ನಿರ್ವಹಿಸುತ್ತಿದ್ದಾನೆ. ನಾನು ದೊಡ್ಡ ಮಗನ ಬಳಿ ಮತ್ತೊಂದು ಮಗುವಿಗೆ ಹೊಡೆಯುತ್ತಿರುವ ವಿಡಿಯೋ ಮಾಡಲು ಹೇಳಿ, ಪತಿಯನ್ನು ಹೆದರಿಸುವುದಕ್ಕಾಗಿ ವಿಡಿಯೋ ಕಳಿಸಿದೆ ಎಂದು ಪೊಲೀಸರ ಮುಂದೆ ಮಹಿಳೆ ಹೇಳಿದ್ದಾಳೆ.

ಪೊಲೀಸರು ಮಹಿಳೆ ಬಗ್ಗೆ ಅಕ್ಕಪಕ್ಕದವರ ಬಳಿ ವಿಚಾರಿಸಿದ್ದಾರೆ.  ಆಗ ಮಹಿಳೆ ತನ್ನ ಮಕ್ಕಳ ಜೊತೆ ಒಳ್ಳೆಯ ರೀತಿಯಲ್ಲೇ ಇದ್ದಾರೆ ಎನ್ನುವುದು ಗೊತ್ತಾಗಿದೆ.

ಪತಿ ವಿರುದ್ಧ ಮಹಿಳೆ ಮಾಡಿರುವ ಆರೋಪದ ಬಗ್ಗೆಯೂ ಪೊಲೀಸರು ತನಿಖೆ ನಡೆಸಿದ್ದಾರೆ.