ತನ್ನ ಮದುವೆಗಾಗಿ ಬರೋಬ್ಬರಿ 100 ಕಿ.ಮೀ. ಸೈಕಲ್ ಹೊಡೆದ ಭೂಪ!

ಲಕ್ನೋ: ಲಾಕ್‌ ಡೌನ್‌ ಇದ್ದರೂ ತನ್ನ ಮದುವೆಗಾಗಿ ಉತ್ತರ ಪ್ರದೇಶದ ಹಮೀರ್‌ಪುರ್‌ ಜಿಲ್ಲೆಯ ಪೌತಿಯಾ ಗ್ರಾಮದ ಯುವಕ ಮಹೋಬಾ ಜಿಲ್ಲೆಗೆ 100 ಕಿಮೀ ಸೈಕಲ್‌ನಲ್ಲಿ ಪ್ರಯಾಣಿಸಿ ಇಲ್ಲೊಬ್ಬ ಭೂಪ ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾನೆ.

ಇಷ್ಟು ಮಾತ್ರವಲ್ಲದೇ ಮದುವೆ ಮುಕ್ತಾಯದ ನಂತರ ತನ್ನ ಹೊಸ ಹೆಂಡತಿಯನ್ನು ಅದೇ ಸೈಕಲ್ ನಲ್ಲಿ ಕೂರಿಸಿಕೊಂಡು ಝಮ್ಮಂತ ತನ್ನ ಊರಿಗೆ ವಾಪಾಸಾಗಿದ್ದಾನೆ ಈ ಆಸಾಮಿ. ಅಂದ ಹಾಗೆ ಇಂಥ ಸಾಧನೆ ಮಾಡಿದಾತನ ಹೆಸರು ಕಲ್ಕು ಪ್ರಜಾಪತಿ (32).

ನಾಲ್ಕು ತಿಂಗಳ ಹಿಂದೆಯೇ ನಮ್ಮಿಬ್ಬರ ಮದುವೆ ನಿಗದಿಯಾಗಿ, ಎಲ್ಲರಿಗೂ ಆಮಂತ್ರಣ ಪತ್ರಿಕೆ ಹಂಚಲಾಗಿತ್ತು. ಈ ನಡುವೆ ಕೋವಿಡ್ ಲಾಕ್ ಡೌನ್ ಜಾರಿಯಾಗಿದ್ದರಿಂದ ಒಂದೂರಿನಿಂದ ಇನ್ನೊಂದು ಊರಿಗೆ ಹೋಗುವುದು ಅಸಾಧ್ಯವಾಗಿತ್ತು.

ಆದರೂ ಪೂರ್ವನಿಗದಿಯಾಗಿದ್ದ ಮದುವೆಗೆ ಸಂಬಂಧಿತ ಅಧಿಕಾರಿಗಳ ಬಳಿ ಕಲ್ಕು ಪ್ರಜಾಪತಿ ಅನುಮತಿ ಕೇಳಿದ್ದರೂ ಅವರ್ಯಾರೂ ಸೂಕ್ತ ರೀತಿಯಲ್ಲಿ ಸ್ಪಂದಿಸದೇ ಇದ್ದಕಾರಣ ಈ ರೀತಿಯ ಸಾಹಸಕ್ಕೆ ತಾನು ಮನ ಮಾಡಿದ್ದಾಗಿ ಈತ ಹೇಳಿಕೊಂಡಿದ್ದಾನೆ.