ಉ.ಪ್ರ. ಬಿಜೆಪಿ ಶಾಸಕನ ಪುತ್ರನಿಂದ ಅತ್ಯಾಚಾರ ? ಮಹಿಳೆಯಿಂದ ಧರಣಿ

ಲಕ್ನೋ : ಉತ್ತರ ಪ್ರದೇಶದಲ್ಲಿ ಜನರು ”ಸರಕಾರ ಬದಲಿಸಿ ಬಿಜೆಪಿಯನ್ನು ಗೆಲ್ಲಿಸಿ”ದರೂ ರಾಜ್ಯನದಲ್ಲಿನ ಗೂಂಡಾ ರಾಜ್ಯದ ಕ್ರಿಮಿನಲ್‌ ಅಧ್ಯಾಯ ಹಿಂದಿನಂತೆಯೇ ಮುಂದುವರಿದಿರುವುದಕ್ಕೆ ಸಾಕ್ಷಿ ಎಂಬಂತೆ ಇದೀಗ ಬಿಜೆಪಿಯ ಶಾಸಕ ಪುತ್ರ ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿರುವುದಾಗಿ ದೂರಿ ಮಹಿಳೆಯೊಬ್ಬರು ಶಹಜಹಾನ್‌ಪುರ ಜಿಲ್ಲಾಧಿಕಾರಿ ಕಚೇರಿ ಮುಂದೆ ನ್ಯಾಯ ಆಗ್ರಹಿಸಿ ಧರಣಿ ಸತ್ಯಾಗ್ರಹ ನಡೆಸುತ್ತಿದ್ದಾರೆ.

ಎಎನ್‌ಐ ವರದಿಯ ಪ್ರಕಾರ ಪೊಲೀಸರು ಆರೋಪಿ ಅತ್ಯಾಚಾರಿ ಶಾಸಕ-ಪುತ್ರನ ವಿರುದ್ಧ ಕೇಸು ದಾಖಲಿಸಿಕೊಂಡು ತನಿಖೆಗೆ ಮುಂದಾಗಿದ್ದಾರೆ. ಆದರೆ ಒಟ್ಟು ಪ್ರಕರಣದ ವಿವರಗಳು ಇನ್ನೂ ಗೊಂದಲಕಾರಿಯಾಗಿವೆ ಎಂದು ವರದಿಗಳು ತಿಳಿಸಿವೆ. 

ಉತ್ತರ ಪ್ರದೇಶದ ಉನ್ನಾವೋ ರೇಪ್‌ ಪ್ರಕರಣದಲ್ಲಿ ಬಿಜೆಪಿ ಶಾಸಕ ಕುಲದೀಪ್‌ ಸಿಂಗ್‌ ಸೆಂಗರ್‌ ಜೈಲುಪಾಲಾಗಿರುವ ಘಟನೆ ಜನಮನದಲ್ಲಿ ಹಸಿರಾಗಿರುವಾಗಲೇ ಇನ್ನೋರ್ವ ಬಿಜೆಪಿ ಶಾಸಕ ಈಗ ವಿವಾದಕ್ಕೆ ಗುರಿಯಾಗಿರುವುದು ಗಮನಾರ್ಹವಾಗಿದೆ. ಈ ಹೊಸ ಪ್ರಕರಣದಲ್ಲಿ ಬಿಜೆಪಿ ಶಾಸಕನ ಪುತ್ರನ ವಿರುದ್ಧ ಅತ್ಯಾಚಾರದ ದೂರು ದಾಖಲಾಗಿದೆ.

ಬಿಜೆಪಿ ಶಾಸಕ ಕುಲದೀಪ್‌ ಸಿಂಗ್‌ ಸೆಂಗರ್‌ ನನ್ನು ಸಿಬಿಐ ಬಂಧಿಸಿ ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದು ಜಮ್ಮು ಕಾಶ್ಮೀರದ ಕಥುವಾ ರೇಪ್‌ ಆ್ಯಂಡ್‌ ಮರ್ಡರ್‌ ಕೇಸಿನಷ್ಟೇ ಮಹತ್ವವನ್ನು ಈ ಪ್ರಕರಣ ಪಡೆದುಕೊಂಡು ದೇಶಾದ್ಯಂತ ವ್ಯಾಪಕ ಟೀಕೆ, ಖಂಡನೆಗೆ ಗುರಿಯಾಗಿತ್ತು.