ಉಪ್ಪುಂದ: ಚರಂಡಿ ಅವ್ಯವಸ್ಥೆ, ಸಾರ್ವಜನಿಕರಿಗೆ ತೊಂದರೆ

ಬೈಂದೂರು, ಜು. 6: ಉಪ್ಪುಂದ ಅಂಡರ್‌ಪಾಸ್‌ ಬಳಿಯ ಸರ್ವಿಸ್‌ ರಸ್ತೆಯ ಎಡ ಬದಿಯಲ್ಲಿ ಚರಂಡಿ ಅವ್ಯವಸ್ಥೆಯಿಂದ ವಾಹನ ಸವಾರರು ನಿತ್ಯ ಆತಂಕದಿಂದ ಸಂಚರಿಸಬೇಕಾಗಿದೆ.

ಕಾಮಗಾರಿ ನಡೆಸುವ ಕಂಪೆನಿಯವರು ಉಪ್ಪುಂದ ಒಳ ರಸ್ತೆ ಸೇರುವ ಭಾಗದಲ್ಲಿ ಅತ್ಯಂತ ಎತ್ತರದ ಕಾಂಕ್ರೀಟ್ ನಿರ್ಮಿಸಿದ್ದು, ಇದರಿಂದಾಗಿ ಸವಾರರು ನಿಯಂತ್ರಣ ತಪ್ಪಿ ರಸ್ತೆಗುರುಳುವಂತಾಗಿದೆ.

ಅದರೊಂದಿಗೆ ಚರಂಡಿಯ ಮೇಲ್ಗಡೆ ಅನಧಿಕೃತ ಪೆಟ್ಟಿಗೆ ಅಂಗಡಿ ಹಾಗೂ ತಳ್ಳುಗಾಡಿಗಳಿಂದ ರಸ್ತೆಯಲ್ಲಿ ಸಾರ್ವ ಜನಿಕರಿಗೆ ಸಂಚರಿಸಲು ಕಷ್ಟವಾಗಿದೆ.

ಈ ಬಗ್ಗೆ ಸಾರ್ವಜನಿಕರು ಹಲವು ಬಾರಿ ಮನವಿ ಮಾಡಿದರೂ ಗ್ರಾ.ಪಂ. ಯಾವುದೇ ಕ್ರಮಕೈಗೊಂಡಿಲ್ಲ . ಹೀಗಾಗಿ ಸಂಬಂಧಪಟ್ಟ ಇಲಾಖೆ ಈ ಬಗ್ಗೆ ಶೀಘ್ರ ಕ್ರಮಕೈಗೊಳ್ಳಬೇಕೆನ್ನುವುದು ಸ್ಥಳೀಯರ ಆಗ್ರಹ.