Uppinangady ಅನುಮತಿ ಇಲ್ಲದೇ ರಸ್ತೆ ಅಗೆದ ವ್ಯಕ್ತಿಗೆ ದಂಡದ ಶಿಕ್ಷೆ

ಉಪ್ಪಿನಂಗಡಿ: ಸಾರ್ವಜನಿಕ ರಸ್ತೆಯನ್ನು ಸ್ಥಳೀಯಾಡಳಿತದ ಅನುಮತಿ ಇಲ್ಲದೆ ಅಗೆದು ಸಂಚಾರಕ್ಕೆ ತಡೆಯೊಡ್ಡಿದ ಘಟನೆಗೆ ಸಂಬಂಧಿಸಿ ಪಂಚಾಯತ್‌ ಆಡಳಿತವು ದಂಡ ವಿಧಿಸಿದ ಘಟನೆ ಉಪ್ಪಿನಂಗಡಿಯಿಂದ ವರದಿಯಾಗಿದೆ.

ಇಲ್ಲಿನ ರಾಷ್ಟ್ರಿಯ ಹೆದ್ದಾರಿಯಿಂದ ನಟ್ಟಿಬೈಲಿಗೆ ಸಂಪರ್ಕ ಕಲ್ಪಿಸುವ ರಸ್ತೆಯಲ್ಲಿ ಮೋರಿ ಅಳವಡಿಸುವ ಕಾರಣಕ್ಕೆ ರಸ್ತೆಯನ್ನು ಅಗೆದು ಮೋರಿ ಅಳವಡಿಸಲು ಸ್ಥಳೀಯರೊಬ್ಬರು ಮುಂದಾಗಿದ್ದರು. ಇದರಿಂದಾಗಿ ರಸ್ತೆಯಲ್ಲಿ ವಾಹನ ಸಂಚರಿಸುವುದು ಅಸಾಧ್ಯವಾಗಿ ಸಾರ್ವಜನಿಕರಿಂದ ಪಂಚಾಯತ್‌ ಆಡಳಿತಕ್ಕೆ ದೂರುಗಳು ಸಲ್ಲಿಕೆಯಾಗಿದ್ದವು. ದೂರಿಗೆ ತತ್‌ಕ್ಷಣವೇ ಸ್ಪಂದಿಸಿದ ಪಂಚಾಯತ್‌ ಪಿಡಿಒ ಅವರು ಘಟನಾ ಸ್ಥಳಕ್ಕೆ ಭೇಟಿ ನೀಡಿ, ಪಂಚಾಯತ್‌ ಆಡಳಿತದ ಗಮನಕ್ಕೆ ತಾರದೇ , ಅಗತ್ಯ ಅನುಮತಿಯನ್ನೂ ಪಡೆಯದೆ ಸಾರ್ವಜನಿಕ ಆಸ್ತಿಯಾದ ರಸ್ತೆಯನ್ನು ಅಗೆದು ಹಾನಿಗೊಳಿಸಿದ ಕೃತ್ಯಕ್ಕೆ 10,000 ರೂ. ದಂಡ ವಿಧಿಸಿ, ರಸ್ತೆಯನ್ನು ಮತ್ತೆ ಸಂಚಾರಯೋಗ್ಯವನ್ನಾಗಿಸುವಂತೆ ಷರತ್ತು ವಿಧಿಸಿದರು.

ಇಲಾಖೆ ಯಾ ಸ್ಥಳೀಯಾಡಳಿತ ನಡೆಸಬೇಕಾದ ಕಾಮಗಾರಿಯನ್ನು ತಾವೇ ಮಾಡಲು ಮುಂದಾಗಿ ದಂಡ ತೆರಬೇಕಾದ ಸ್ಥಿತಿ ನಿರ್ಮಾಣವಾದದ್ದು ಮಾತ್ರ ವಿಪರ್ಯಾಸ.