UPI: ವಹಿವಾಟು ಮಿತಿ ಏರಿಕೆಗೆ ಆರ್‌ಬಿಐ ನಿರ್ಧಾರ.. ಮಿತಿ 2,000ರೂ.ನಿಂದ 5,000ರೂ.ಗೆ ಏರಿಕೆ

ಮುಂಬೈ: ಯುಪಿಐ ಲೈಟ್‌, ಯುಐಪಿ 123 ಪೇ ಬಳಕೆದಾರರಿಗೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಸಿಹಿಸುದ್ದಿ ನೀಡಿದೆ. ಈ ಬಳಕೆದಾರರ ದೈನಂದಿನ ವಹಿವಾಟು ಮಿತಿ ಹೆಚ್ಚಿಸಲು ನಿರ್ಧರಿಸಲಾಗಿದೆ. ಯುಪಿಐ ಲೈಟ್‌ ವ್ಯಾಲೆಟ್‌ ಮಿತಿ 2,000 ರೂ.ನಿಂದ 5000 ರೂ.ಗೆ ಮತ್ತು ಯುಪಿಐ123 ಬಳಕೆದಾರರ ದೈನಂದಿನ ಮಿತಿಯನ್ನು 500ರೂ.ನಿಂದ 10000 ರೂ.ಗೆ ಹೆಚ್ಚಿಸಲಾಗಿದೆ.

ಯುಪಿಐ ಮಾದರಿ ವ್ಯವಸ್ಥೆ: ಇದೇ ವೇಳೆ, ಆರ್‌ಟಿಜಿಎಸ್‌ ಮತ್ತು ನೆಫ್ಟ್ ವಹಿವಾಟು ನಡೆಸುವಾಗ ಈವರೆಗೆ ಬ್ಯಾಂಕ್‌ ಖಾತೆ ಸಂಖ್ಯೆ, ಐಎಫ್ಎಸ್‌ಸಿ ಕೋಡ್‌ ಮಾತ್ರ ನೀಡಲಾಗುತ್ತಿತ್ತು. ಆದರೆ, ಇನ್ನು ಮುಂದೆ ಯುಪಿಐ ಮಾದರಿಯಲ್ಲೇ ನೀವು ಖಾತೆ ಸಂಖ್ಯೆ, ಐಎಫ್ಎಸ್‌ಸಿ ಕೋಡ್‌ ನಮೂದಿಸಿದ ಕೂಡಲೇ ಹಣ ಸ್ವೀಕರಿಸುವ ವ್ಯಕ್ತಿಯ(ಖಾತೆದಾರ) ಹೆಸರು ಕಾಣಿಸಲಿದೆ.

ಶುಲ್ಕ ವಿನಾಯ್ತಿ ವಿಸ್ತರಣೆ: ಅವಧಿಗೆ ಮುಂಚಿತವಾಗಿ ಸಾಲ ಮರುಪಾವತಿಸಿದರೆ ವಿಧಿಸುವ ಶುಲ್ಕದಿಂದ ಇನ್ನು ಸಣ್ಣ ಮತ್ತು ಕಿರು ಉದ್ದಿಮೆಗಳಿಗೂ
(ಎಂಎಸ್‌ಎಂಇ) ವಿನಾಯ್ತಿ ಸಿಗಲಿದೆ.

ಬಡ್ಡಿ ದರ ಬದಲಿಲ್ಲ
ಆರ್‌ಬಿಐ ಸತತ 10ನೇ ಬಾರಿಗೆ ಬಡ್ಡಿ ದರವನ್ನು ಯಥಾಸ್ಥಿತಿಯಲ್ಲಿ(ಶೇ.6.5) ಮುಂದುವರಿಸಿದೆ. ಹೀಗಾಗಿ ಗೃಹ, ವಾಹನ ಸಾಲಗಳ ಬಡ್ಡಿದರಗಳಲ್ಲಿ ಬದಲಾವಣೆ ಆಗಲ್ಲ ಎಂದು ಆರ್‌ಬಿಐ ಗವರ್ನರ್‌ ಶಕ್ತಿಕಾಂತ ದಾಸ್‌ ತಿಳಿಸಿದ್ದಾರೆ.