ಡಾಮರು ಕಾಣದ ಪಳ್ಳಿ- ಪದವು ಸಂಪರ್ಕ ರಸ್ತೆ

ಪಳ್ಳಿ: ಇಲ್ಲಿನ ಗ್ರಾ.ಪಂ ವ್ಯಾಪ್ತಿಯ ಪಳ್ಳಿ-ಪದವು ರಸ್ತೆ ಡಾಮರು ಕಾಣದೆ ಕೆಸರು ಗದ್ದೆಯಂತಾಗಿದೆ.

ಬೇಸಗೆಯಲ್ಲಿ ಈ ರಸ್ತೆಯಲ್ಲಿ ಧೂಳಿನ ಸಮಸ್ಯೆಯಾದರೆ, ಮಳೆಗಾಲದಲ್ಲಿ ಕೆಸರಿನಿಂದ ಕೂಡಿದ್ದು, ಸಂಚಾರ ಕಷ್ಟಸಾಧ್ಯವಾಗಿದೆ. ಪಳ್ಳಿ ಶಾಲೆ ಬಳಿಯಿಂದ ಪದವು ಸಂಪರ್ಕಿಸುವ 3 ಕಿ.ಮೀ. ರಸ್ತೆಯಲ್ಲಿ ಒಂದೂವರೆ ಕೀ.ಮೀ. ರಸ್ತೆಗೆ ಡಾಮರು ಆಗಿದೆ. ಆದರೆ ಉಳಿದ ಭಾಗ ಆಗಿಲ್ಲ. ಈ ರಸ್ತೆ ಮೂಲಕ ಮಂಚಕಲ್, ಸೂಡ, ಜಂತ್ರ ಪಿಲರ್ಕಾನ, ಬೆಳ್ಮಣ್‌ ಸಂಪರ್ಕಿಸಬಹುದಾಗಿದೆ. ಪದವು ಪರಿಸರದ ಶಾಲಾ ಮಕ್ಕಳು ಪಳ್ಳಿ ಶಾಲೆಗೆ ಬರಲು ಈ ರಸ್ತೆಯನ್ನೇ ಅವಲಂಬಿಸಿದ್ದಾರೆ. ರಸ್ತೆಗೆ ಡಾಮರು ಹಾಕುವಂತೆ ಸ್ಥಳೀಯರು ಒತ್ತಾಯಿಸುತ್ತಿದ್ದಾರೆ.

ಈ ರಸ್ತೆಗೆ 25 ಲಕ್ಷ ರೂ. ಅನುದಾನವನ್ನು ಶಾಸಕರು ಮಂಜೂರುಗೊಳಿಸಿರುತ್ತಾರೆ. ಮಳೆಗಾಲ ಕಳೆದ ಬಳಿಕ ಕಾಮಗಾರಿಗೆ ಚಾಲನೆ ದೊರೆಯಲಿದೆ ಎಂದು ಪಳ್ಳಿ ಗ್ರಾ.ಪಂ. ಉಪಾಧ್ಯಕ್ಷ ಸತ್ಯಾನಂದ ಶೆಟ್ಟಿ ತಿಳಿಸಿದ್ದಾರೆ.