ಆಧಾರ್‌ ಕಾರ್ಡ್‌ ಮ್ಯಾಜಿಕ್‌ :1,000 ಗ್ರಾಮಸ್ಥರ ಹುಟ್ಟಿದ ದಿನ ಜನವರಿ1

ಅಲಹಾಬಾದ್‌ : ಇಲ್ಲಿಂದ 50  ಕಿ.ಮೀ. ದೂರದಲ್ಲಿರುವ ಕಂಜಾಸಾ ಎಂಬ ಗ್ರಾಮದ 5,000 ನಿವಾಸಿಗಳು ಈಚೆಗೆ ಆಧಾರ್‌ ಕಾರ್ಡ್‌ ಪಡೆದುಕೊಂಡಿದ್ದರು. ಈ ಪೈಕಿ 1,000 ಮಂದಿಯ ಆಧಾರ್‌ ಕಾರ್ಡ್‌ನಲ್ಲಿ ಅವರ ಹುಟ್ಟಿದ ದಿನವನ್ನು ಸಾರಾ ಸಗಟಾಗಿ ಜನವರಿ 1 ರಂದು ಕಾಣಿಸಲಾಗಿದೆ.

ಆಧಾರ್‌ ಕಾರ್ಡ್‌ನಲ್ಲಿನ ಈ ದೋಷದ ಬಗ್ಗೆ ದೂರುಗಳ ಮಹಾಪೂರವೇ ಹರಿದು ಬರುತ್ತಿದ್ದು ಕಂಗಾಲಾಗಿರುವ ಅಧಿಕಾರಿಗಳು ಇದೀಗ ತನಿಖೆಗೆ ಆದೇಶಿಸಿದ್ದಾರೆ; ಜತೆಗೆ ಆಧಾರ್‌ ಕಾರ್ಡ್‌ನಲ್ಲಿನ ಜನ್ಮ ದಿನಾಂಕ ದೋಷವನ್ನು ಸರಿಪಡಿಸುವ ಪ್ರಕ್ರಿಯೆಯನ್ನು ಆರಂಭಿಸಿದ್ದಾರೆ. 

ತಾಂತ್ರಿಕ ದೋಷದಿಂದಾಗಿ  1,000 ಜನರ ಹುಟ್ಟಿದ ದಿನಾಂಕ ಜನವರಿ 1 ಎಂದು ತಪ್ಪಾಗಿ ದಾಖಲಾಗಿರಬಹುದು; ಮೇಲಾಗಿ ಅನೇಕ ಗ್ರಾಮಸ್ಥರಿಗೆ ತಮ್ಮ ಹುಟ್ಟಿದ ದಿನಾಂಕವೇ ಗೊತ್ತಿಲ್ಲದಿರುವುದರಿಂದ ಅಂತಹವರ ಸಂದರ್ಭಗಳಲ್ಲಿ ಸಾರಾ ಸಗಟಾಗಿ ಜನವರಿ 1 ಎಂದು ದಾಖಲಾಗಿರಬಹುದು.ಹಾಗಿದ್ದರೂ ಸರಿಯಾಗಿ ಜನ್ಮ ದಿನ ದಾಖಲೆ ಕೊಟ್ಟವರ ಕಾರ್ಡ್‌ನಲ್ಲಿ ಕೂಡ ಜನವರಿ 1 ಎಂದು ದಾಖಲಾಗಿರುವುದು ಅಚ್ಚರಿಯ ವಿಷಯ ಎಂದು ಬ್ಲಾಕ್‌ ಡೆವಲಪ್‌ಮೆಂಟ್‌ ಆಫೀಸರ್‌ ನೀರಜ್‌ ದುಬೆ ಹೇಳಿದ್ದಾರೆ. 

ಈ ಬಗ್ಗೆ ತನಿಖೆಗೆ ಆದೇಶಿಸಲಾಗಿದೆ; ಯಾವ ಹಂತದಲ್ಲಿ ತಪ್ಪಾಗಿದೆ ಎಂಬುದನ್ನು ಕಂಡುಕೊಂಡ ಬಳಿಕ ಅದಕ್ಕೆ ಕಾರಣರಾದವರ ವಿರುದ್ಧ ಶಿಸ್ತು ಕ್ರಮ ತೆಗೆದುಕೊಳ್ಳಲಾಗುವುದು ಎಂದವರು ಹೇಳಿದ್ದಾರೆ.