ಆಹಾರ ವಸ್ತುಗಳ ಬೆಲೆ ಏರಿಕೆ ಹತ್ತು ವರ್ಷಗಳ ಗರಿಷ್ಠಕ್ಕೆ

ಪ್ಯಾರಿಸ್‌: ಜಗತ್ತಿನಲ್ಲಿ ಆಹಾರ ವಸ್ತುಗಳ ಬೆಲೆ ಅಕ್ಟೋಬರ್‌ನಲ್ಲಿ ಹತ್ತು ವರ್ಷಗಳ ಗರಿಷ್ಠಕ್ಕೆ ಏರಿಕೆಯಾಗಿದೆ.

ಹೀಗೆಂದು ಆಹಾರ ಮತ್ತು ಕೃಷಿ ಸಂಘಟನೆ (ಎಫ್ಎಒ)ಯ ವರದಿಯಲ್ಲಿ ಉಲ್ಲೇಖೀಸಲಾಗಿದೆ. ಸೆಪ್ಟಂಬರ್‌ನಲ್ಲಿ ಜಗತ್ತಿನ ಆಹಾರ ಬೆಲೆ ಏರಿಕೆಯ ಸೂಚ್ಯಂಕ 129.2 ಇದ್ದದ್ದು ಅಕ್ಟೋಬರ್‌ನಲ್ಲಿ 133.2 ಪಾಯಿಂಟ್ಸ್‌ಗಳಿಗೆ ಜಿಗಿದಿದೆ ಎಂದು ಎಫ್ಒಎ ಅಭಿಪ್ರಾಯಪಟ್ಟಿದೆ.

ವರ್ಷವಾರು ಹೋಲಿಕೆ ಮಾಡಿದರೆ ಬೆಲೆ ಏರಿಕೆ ಸೂಚ್ಯಂಕ ಅಕ್ಟೋಬರ್‌ ಅಂತ್ಯಕ್ಕೆ ಶೇ.31.3 ಏರಿಕೆಯಾಗಿದೆ. ವಿವಿಧ ರೀತಿಯ ಬೆಳೆಗಳನ್ನು ಬೆಳೆಯುವಲ್ಲಿ ಆಗಿರುವ ಹಿನ್ನಡೆ ಮತ್ತು ಅವುಗಳಿಗೆ ಹೆಚ್ಚಿರುವ ಬೇಡಿಕೆಯಿಂದಾಗಿ ಬೆಲೆ ಏರಿಕೆಯಾಗಿದೆ. ಬೆಲೆ ಸೂಚ್ಯಂಕದ ಪ್ರಕಾರ ಬೇಳೆಕಾಳುಗಳ ಬೆಲೆ ಶೇ.3.2, ಗೋಧಿಯ ಬೆಲೆ ಶೇ.5ರಷ್ಟು ಹೆಚ್ಚಾಗಿದೆ. 2012ರ ನವೆಂಬರ್‌ಗೆ ಹೋಲಿಕೆ ಮಾಡಿದರೆ ಇದು ಗಣನೀಯ ವಾಗಿ ಏರಿಕೆಯಾಗಿದೆ ಎಂದು ಸೂಚ್ಯಂಕ ವರದಿಯಲ್ಲಿ ಅಭಿಪ್ರಾಯಪಡಲಾಗಿದೆ.

ಅಮೆರಿಕದಲ್ಲಿ ಗೋಧಿಯ ಬೆಲೆ 2012ಕ್ಕೆ ಹೋಲಿಕೆ ಮಾಡಿದರೆ ಹಾಲಿ ತಿಂಗಳಲ್ಲಿ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದೆ. ಪ್ಯಾರಿಸ್‌ನಲ್ಲೂ ಇದೇ ಪರಿಸ್ಥಿತಿ ಇದೆ. ಇನ್ನು ಅಡುಗೆ ಎಣ್ಣೆಗೆ ಸಂಬಂಧಿಸಿದಂತೆ ಜಗತ್ತಿನಲ್ಲಿ ಅವುಗಳ ಬೆಲೆ ಕೂಡ ಶೇ.9.6ರಷ್ಟು ಏರಿಕೆಯಾಗಿದೆ. ಕುತೂಹಲಕಾರಿ ವಿಚಾರ ವೆಂದರೆ ಸಕ್ಕರೆಯ ಬೆಲೆ ವಿಶ್ವದಲ್ಲಿ ಶೇ.1.8ರಷ್ಟು ಇಳಿಕೆಯಾಗಿದೆ.