ಭಾರತಕ್ಕೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವ : ಫ್ರಾನ್ಸ್‌ ಪ್ರತಿಪಾದನೆ

ವಾಷಿಂಗ್ಟನ್‌ : ಭಾರತವು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯನಾಗಿರುವುದು ಅಗತ್ಯವಿದೆ ಎಂದು ಫ್ರಾನ್ಸ್‌ ದೃಢವಾಗಿ ಹೇಳಿದೆ.

ಬದಲಾಗುತ್ತಿರುವ ಭೌಗೋಳಿಕ ರಾಜಕೀಯ ಸನ್ನಿವೇಶಗಳಿಗೆ ಅನುಗುಣವಾಗಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಸುಧಾರಣೆಗಳನ್ನು ತರುವ ಮತ್ತು ಅದನ್ನು ವಿಸ್ತರಿಸುವ ಅಗತ್ಯವಿದೆ ಎಂದು ಭಾರತ ಬಹಳ ಹಿಂದಿನಿಂದಲೂ ಒತ್ತಾಯಿಸುತ್ತಿದ್ದು ತಾನು ಖಾಯಂ ಸದಸ್ಯತ್ವ ಪಡೆಯುವುದಕ್ಕೆ ಅತ್ಯಂತ ಹೆಚ್ಚಿನ ಅರ್ಹತೆ ಹೊಂದಿದ್ದೇನೆ ಎಂದು ಪ್ರತಿಪಾದಿಸಿಕೊಂಡು ಬಂದಿದೆ.

ಭಾರತದಂತೆ ಜರ್ಮನಿ, ಬ್ರಝಿಲ್‌ ಮತ್ತು ಜಪಾನ್‌ ದೇಶಗಳಿಗೂ ವಿಶ್ವಸಂಸ್ಥೆಯ ವಿಸ್ತೃತ ಭದ್ರತಾ ಮಂಡಳಿಯಲ್ಲಿ ಖಾಯಂ ಸದಸ್ಯತ್ವ ಇರುವ ಅಗತ್ಯವಿದೆ ಎಂದು ವಿಶ್ವಸಂಸ್ಥೆಯಲ್ಲಿ ಫ್ರಾನ್ಸ್‌ ರಾಯಭಾರಿಯಾಗಿರುವ ಫ್ರಾನ್ಸ್‌ವಾ ದೆಲಾತ್ರೆ ಅವರು ಹೇಳಿದರು.

ನೀತಿಗಳಿಗೆ ಸಂಬಂಧಿಸಿದಂತೆ ಫ್ರಾನ್ಸ್‌ ಮತ್ತು ಜರ್ಮನಿ ಬಲವಾದ ನೀತಿಯನ್ನು ಹೊಂದಿದ್ದು ಭದ್ರತಾ ಮಂಡಳಿಯಲ್ಲಿ ಅವು ಜತೆಗೂಡಿ ಕೆಲಸ ಮಾಡುತ್ತಿವೆ. ಅಂತೆಯೇ ಮಹತ್ತರ ವಿಚಾರಗಳಲ್ಲಿ ಅವು ಮಾತುಕತೆಗಳ ಮೂಲಕ ಉತ್ತಮ ಯಶಸ್ಸು ಸಾಧಿಸಿವೆ. ವ್ಯೂಹಾತ್ಮಕ ತಂತ್ರಗಾರಿಕೆಯ ರೂಪಣೆಗಾಗಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸುಧಾರಣೆ, ವಿಸ್ತರಣೆಯ ಅಗತ್ಯ ಈಗ ಹಿಂದೆಂದಿಗಿಂತಲೂ ಹೆಚ್ಚಿದೆ ಎಂದು ದೆಲಾತ್ರೆ ಅಭಿಪ್ರಾಯಪಟ್ಟರು.