ಉದಯ್‌ ಮೆಹ್ತಾಗೆ ಧ್ರುವ ಡೇಟ್ಸ್‌!

“ಭರ್ಜರಿ’ ಚಿತ್ರದ ಯಶಸ್ಸಿನಿಂದ ಖುಷಿಯಾಗಿರುವ ಧ್ರುವ ಸರ್ಜಾ ಸದ್ಯದಲ್ಲೇ ನಂದಕಿಶೋರ್‌ ನಿರ್ದೇಶನದ “ಪೊಗರು’ ಚಿತ್ರದಲ್ಲಿ ಅಭಿನಯಿಸಲಿದ್ದಾರೆ. ಆ ನಂತರ ಮುಂದೇನು ಎಂಬ ಪ್ರಶ್ನೆ ಬರುವುದು ಸಹಜ. ಈ ಪ್ರಶ್ನೆಗೆ ಅರ್ಧ ಉತ್ತರ ಸಿಕ್ಕಿದೆ. ಇನ್ನರ್ಧ ಮುಂದಿನ ದಿನಗಳಲ್ಲಿ ಸಿಗಬೇಕಿದೆ. ಅರ್ಧ ಉತ್ತರ ಏನೆಂದರೆ, ನಿರ್ಮಾಪಕ ಉದಯ್‌ ಮೆಹ್ತಾಗೆ ಧ್ರುವ ಡೇಟ್ಸ್‌ ಕೊಟ್ಟಿರುವುದು ಮತ್ತು ಇನ್ನರ್ಧ ಏನೆಂದರೆ, ಆ ಚಿತ್ರವನ್ನು ಯಾರು ನಿರ್ದೇಶಿಸುತ್ತಾರೆ ಎಂದು ಈಗಲೇ ಗೊತ್ತಿಲ್ಲದಿರುವುದು.

ಶರಣ್‌ ಅಭಿನಯದ “ರಾಜ ರಾಜೇಂದ್ರ’ ಚಿತ್ರದ ನಂತರ ಚಿತ್ರ ನಿರ್ಮಾಣದಿಂದ ದೂರವೇ ಉಳಿದಿದ್ದ ಉದಯ್‌ ಮೆಹ್ತಾ ಇದೀಗ ಇನ್ನೊಂದು ಚಿತ್ರ ನಿರ್ಮಿಸುವುದಕ್ಕೆ ಸಜ್ಜಾಗಿದ್ದಾರೆ. ಈಗಾಗಲೇ ಹಲವು ದಿನಗಳ ಹಿಂದೆಯೇ ಧ್ರುವ ಸರ್ಜಾ ಅವರನ್ನು ಭೇಟಿ ಮಾಡಿ ಮಾತುಕತೆ ನಡೆಸಿ, ಡೇಟ್ಸ್‌ ಪಡೆದುಕೊಂಡಿದ್ದಾರೆ. ಧ್ರುವ ಸದ್ಯಕ್ಕೆ “ಪೊಗರು’ ಚಿತ್ರದಲ್ಲಿ ನಟಿಸುತ್ತಿರುವುದರಿಂದ, ಆ ಚಿತ್ರದ ನಂತರ ಡೇಟ್ಸ್‌ ಕೊಡುವುದಾಗಿ ಹೇಳಿದ್ದಾರೆ.

“ಪೊಗರು’ ಚಿತ್ರದ ಚಿತ್ರೀಕರಣ ಸದ್ಯದಲ್ಲೇ ಶುರುವಾಗಲಿದ್ದು, ಮುಂದಿನ ವರ್ಷದ ಆರಂಭದ ಹೊತ್ತಿಗೆ ಮುಗಿಯಲಿದೆ. ಆ ನಂತರ ಉದಯ್‌ ಮೆಹ್ತಾ ಚಿತ್ರ ಶುರುವಾಗುವ ಸಾಧ್ಯತೆ ಇದೆ. ಸದ್ಯಕ್ಕೆ ಧ್ರುವ ಸರ್ಜಾ ಅವರ ಡೇಟ್ಸ್‌ ಪಡೆದಿರುವುದು ಬಿಟ್ಟರೆ, ಮಿಕ್ಕಂತೆ ಇನ್ನೂ ಏನೂ ಆಗಿಲ್ಲ. ಮುಂದಿನ ದಿನಗಳಲ್ಲಿ ಆ ಚಿತ್ರದ ಕಥೆ, ನಿರ್ದೇಶಕರು, ಹೆಸರು ಎಲ್ಲವೂ ಒಂದೊಂದೇ ಗೊತ್ತಾಗುವ ಸಾಧ್ಯತೆ ಇದೆ.