Uniform Civil Code: “ಧಾರ್ಮಿಕ ಸ್ವಾತಂತ್ರ್ಯಕ್ಕೆ ಯುಸಿಸಿ ಅಡ್ಡಿ’

ನವದೆಹಲಿ: ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಜಾರಿಯು ಸಂವಿಧಾನದ ಅನ್ವಯ ನೀಡಿರುವ ಧಾರ್ಮಿಕ ಸ್ವಾತಂತ್ರ್ಯಕ್ಕೆ ವಿರುದ್ಧವಾಗಿದೆ ಎಂದು ಪ್ರಮುಖ ಮುಸ್ಲಿಂ ಸಂಘಟನೆ ಜಮೀಯತ್‌-ಉಲೇಮಾ -ಇ ಹಿಂದ್‌ ಸೋಮವಾರ ಆರೋಪಿಸಿದೆ.

ಜತಗೆ ಇದರ ವಿರುದ್ಧ ಪ್ರತಿಭಟಿಸುತ್ತೇವೆ. ಆದರೆ, ಬೀದಿಗಿಳಿದು ಅಲ್ಲ, ಕಾನೂನು ಬದ್ಧವಾಗಿ ಎಂದೂ ಹೇಳಿದೆ. ಯುಸಿಸಿ ಜಾರಿ ಸಂಬಂಧಿಸಿದಂತೆ ಕಾನೂನು ಆಯೋಗವು ಸಾರ್ವಜನಿಕರು ಹಾಗೂ ಪ್ರಮುಖ ಧಾರ್ಮಿಕ ಸಂಸ್ಥೆಗಳಿಂದ ಅಭಿಪ್ರಾಯ ಸಂಗ್ರಹಣೆಗೆ ಮುಂದಾದ ಬೆನ್ನಲ್ಲೇ, ಜಮೀಯತ್‌ ಸಂಘಟನೆ ಈ ಹೇಳಿಕೆ ನೀಡಿದೆ. ಅಲ್ಲದೇ, ಯುಸಿಸಿ ಜಾರಿ ಬೇಡಿಕೆಯೂ ಸಂವಿಧಾನದ ವಿಧಿ 25, 26ರ ಅನ್ವಯ ನೀಡಿರುವ ನಾಗರಿಕನ ಧಾರ್ಮಿಕ ಮೂಲಭೂತ ಹಕ್ಕು ಕಸಿಯುವ ಅಸ್ತ್ರವಲ್ಲದೆ ಮತ್ತೇನೂ ಅಲ್ಲವೆಂದೂ ಟೀಕಿಸಿದೆ.