ಯುಎಇಗಿಲ್ಲ ಕೇರಳದ ಹಣ್ಣು 

ಅಬುಧಾಬಿ: ನಿಫ‌‌ ವೈರಸ್‌ ಭೀತಿಯ ಹಿನ್ನೆಲೆಯಲ್ಲಿ ಕೇರಳದಿಂದ ತನ್ನಲ್ಲಿಗೆ ಆಮದಾಗುವ ಎಲ್ಲ ಬಗೆಯ ಹಣ್ಣುಗಳ ಮೇಲೆ ಯುಎಇ ಆಡಳಿತ ನಿಷೇಧ ಹೇರಿದೆ. ಈವರೆಗೆ ಯುಎಇಗೆ ಕಾಲಿಟ್ಟಿರುವ ಹಣ್ಣುಗಳನ್ನು ಹೊರತುಪಡಿಸಿ, ಇನ್ನು ಮುಂದೆ ಆಗಮಿಸಲಿರುವ ಹಣ್ಣುಗಳ ಮೇಲೆ ನಿಷೇಧ ಅನ್ವಯಿಸಲಿದೆ ಎಂದು ಸರ್ಕಾರ ಹೇಳಿದೆ. ಹವಾಮಾನ ವೈಪರೀತ್ಯ ಹಾಗೂ ಪರಿಸರ ಇಲಾಖೆಯಿಂದ ಈ ಕುರಿತ ಆದೇಶ ಪ್ರಕಟಿಸಲಾಗಿದ್ದು, ಆಹಾರ ಇಲಾಖೆಯ ಅಧಿಕಾರಿಗಳು ಕೇರಳದ ಹಣ್ಣುಗಳ ಮೇಲೆ ನಿಗಾ ಇಡಬೇಕೆಂದು ಸೂಚಿಸಿದ್ದಾರೆ. ಕೇರಳದ ಮಾವಿನ ಹಣ್ಣು, ಖರ್ಜೂರ ಹಾಗೂ ಬಾಳೆ ಹಣ್ಣುಗಳಿಗೆ ಯುಎಇನಲ್ಲಿ ಹೆಚ್ಚು ಬೇಡಿಕೆಯಿದೆ.

ನಿಫ‌ ಭೀತಿ ಹಿನ್ನೆಲೆಯಲ್ಲಿ ಕೋಲ್ಕತಾದ ಅಲಿಪೋರಾ ಪ್ರಾಣಿ ಸಂಗ್ರಹಾಲಯದಲ್ಲಿನ ಪ್ರಾಣಿಗಳಿಗೆ ಯಾರೂ ಹಣ್ಣನ್ನು ತಿನ್ನಿಸಕೂಡದೆಂದು ಇಲ್ಲಿಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಸಂಗ್ರಹಾಲಯದ ಆಡಳಿತ ಮಂಡಳಿ ಸೂಚಿಸಿದೆ.