ತುಮಕೂರು: ತಾಲೂಕಿನ ಸೋರೆಕುಂಟೆ ಗ್ರಾಮದ ಸಾಗುವಳಿ ಚೀಟಿ ಪ್ರಕರಣಕ್ಕೆ ಸಂಬಂಧಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸೂಚಿಸಿ ಕಂದಾಯ ಸಚಿವ ಆರ್‌. ಅಶೋಕ್‌ ಕಚೇರಿಯಿಂದ ಜಿಲ್ಲಾಧಿಕಾರಿಗೆ ಪತ್ರ ಬಂದಿದ್ದು, ಇದರೊಂದಿಗೆ ಈ ಪ್ರಕರಣ ಮತ್ತೂಂದು ತಿರುವು ಪಡೆದಿದೆ.
ತುಮಕೂರು ತಾಲೂಕು ಬೆಳ್ಳಾವಿ ಹೋಬಳಿ ಸೋರೆಕುಂಟೆ ಗ್ರಾಮದ ಸ.ನಂ.
41ರಲ್ಲಿ 44 ರೈತರಿಗೆ ಸಾಗುವಳಿ ಚೀಟಿ ವಿತರಣೆ ಮಾಡಿರುವುದರಲ್ಲಿ ಅಕ್ರಮ, ಅವ್ಯವಹಾರ ಆಗಿದೆಯೆಂದು ಸಕ್ಷಮ ಪ್ರಾಧಿಕಾರಗಳಿಗೆ ಬೆಳಗುಂಬ ಗ್ರಾಮ ಪಂಚಾಯಿತಿ ಸದಸ್ಯ ಬಿ.ಎಸ್‌.ವೆಂಕಟೇಶ್‌ ದೂರು ಸಲ್ಲಿಸಿದ್ದರು. ಇದಾದ ಬಳಿಕ ನಡೆದ ವಿವಿಧ ಪ್ರಕ್ರಿಯೆಗಳ ನಂತರ ತುಮಕೂರು ಜಿಲ್ಲಾಧಿಕಾರಿ, ಉಪವಿಭಾಗಾಧಿಕಾರಿ ನೇತೃತ್ವದಲ್ಲಿ ತನಿಖಾ ತಂಡ ರಚಿಸಿದ್ದರು. ತನಿಖಾ ತಂಡ ಪ್ರಕ್ರಿಯೆಯಲ್ಲಿ ಲೋಪವಾಗಿದೆ ಎಂದು ವರದಿಯನ್ನೂ ನೀಡಿದೆ. ಜೊತೆಗೆ ವಿಷಯ ನಿರ್ವಾಹಕರು, ಶಿರಸ್ತೇದಾರರು ಹಾಗೂ ಸಂಬಂಧಪಟ್ಟ ಗ್ರಾಮಲೆಕ್ಕಿಗರು, ರಾಜಸ್ವ ನಿರೀಕ್ಷಕರು ಮತ್ತು ತಹಸೀಲ್ದಾರ್‌ ಮೇಲೆ ಶಿಸ್ತುಕ್ರಮ ಜರುಗಿಸಬಹುದಾಗಿದೆ ಎಂದು ತನಿಖಾ ತಂಡ ಹೇಳಿದೆ. ಈ ಹಿನ್ನೆಲೆಯಲ್ಲಿ ವೆಂಕಟೇಶ್‌ ಕಂದಾಯ ಸಚಿವರಿಗೆ ಮನವಿ ಸಲ್ಲಿಸಿದ್ದರು. ಅದಕ್ಕೆ ಸಚಿವರ ಕಚೇರಿ ಸ್ಪಂದಿಸಿದೆ.
ಪ್ರಕರಣಕ್ಕೆ ಸಂಬಂಧಿಸಿ ಅಗತ್ಯ ಕ್ರಮ ಕೈಗೊಳ್ಳುವಂತೆ ಸ್ವತಃ ಕಂದಾಯ ಸಚಿವರ ಆಪ್ತ ಕಾರ್ಯದರ್ಶಿಗಳು ಸೆ. 23ರಂದು ಜಿಲ್ಲಾಧಿಕಾರಿಗೆ ಪತ್ರ ಬರೆದಿದ್ದಾರೆ. ಇದು ಪ್ರಸ್ತುತ ಜಿಲ್ಲಾಧಿಕಾರಿ ಕಚೇರಿ, ಉಪವಿಭಾಗಾಧಿಕಾರಿ ಕಚೇರಿ ಮತ್ತು ತಾಲೂಕು ಕಚೇರಿಗಳಲ್ಲಿ ಸಂಚಲನ ಮೂಡಿಸಿದೆ.
ಉಪವಿಭಾಗಾಧಿಕಾರಿಗೆ ಎಡಿಸಿ ಪತ್ರ: ಸಾಗುವಳಿ ಚೀಟಿ ಅಕ್ರಮ ಉಲ್ಲೇಖೀಸಿ ಅಪರ ಜಿಲ್ಲಾಧಿಕಾರಿ, ತುಮಕೂರು ಉಪವಿಭಾಗಾಧಿಕಾರಿಗೆ ನ.20ರಂದು ಪತ್ರ ಬರೆದು, ದೂರುದಾರ ಬಿ.ಎಸ್‌.ವೆಂಕಟೇಶ್‌ ಮನವಿಯಲ್ಲಿ ಕೋರಿರುವ ಐದು ಅಂಶಗಳ ಬಗ್ಗೆ ಕೂಲಂಕಷವಾಗಿ ಪರಿಶೀಲಿಸಿ ನಿಯಮಾನುಸಾರ ಅಗತ್ಯ ಕ್ರಮ ಕೈಗೊಳ್ಳುವಂತೆ ತಿಳಿಸಿದ್ದು, ತುಮಕೂರು ತಹಶೀಲ್ದಾರರಿಗೂ ಇದರ ಪ್ರತಿ ರವಾನಿಸಲಾಗಿದೆ.
ಮನವಿಯ 5 ಅಂಶಗಳು: ದೂರುದಾರ ಬಿ.ಎಸ್‌.ವೆಂಕಟೇಶ್‌ ಮನವಿ ಪತ್ರದಲ್ಲಿ, ಸಾಗುವಳಿ ಚೀಟಿ ವಿತರಣೆಯಲ್ಲಿ ಅಕ್ರಮ ನಡೆದಿರುವುದು ಸಾಬೀತಾಗಿರುವುದರಿಂದ ಈ ಹಿಂದೆ ಸ.ನಂ. 41ರಲ್ಲಿ ವಿತರಿಸಿರುವ ಎಲ್ಲ 44 ಸಾಗುವಳಿ ಚೀಟಿ ತಕ್ಷಣವೇ ರದ್ದು ಮಾಡಬೇಕು. ಸದರಿ ಜಾಗ ಮೂಲತಃ ಸರ್ಕಾರಿ ಜಾಗವಾಗಿದೆ. ಈ ಜಾಗವು ಈ ಮೊದಲೇ ಕರ್ನಾಟಕ ಕೈಗಾರಿಕಾ ಪ್ರದೇಶಾಭಿವೃದ್ಧಿ ಮಂಡಲಿಯಿಂದ ಭೂಸ್ವಾಧೀನಕ್ಕೆ ಒಳಗಾಗಿದೆ. ವಾಸ್ತವ ಸಂಗತಿ ಹೀಗಿದ್ದರೂ ಪರಿಹಾರ ಧನದ ಮೇಲೆ ಕಣ್ಣಿಟ್ಟು ಅಕ್ರಮವಾಗಿ ಸದರಿ ಭೂಸ್ವಾಧೀನಗೊಂಡ ಜಮೀನಿನ ಜಾಗವನ್ನೇ 44 ಜನರಿಗೆ ಸಾಗುವಳಿ ಚೀಟಿ ನೀಡಿ ವಿತರಿಸಲಾಗಿದೆ. ಇದರಿಂದ ಪರಿಹಾರದ ನೆಪದಲ್ಲಿ ಸರ್ಕಾರದ ಬೊಕ್ಕಸಕ್ಕೆ ಕೋಟ್ಯಂತರ ರೂ. ನಷ್ಟ ಆಗುತ್ತದೆ ಎಂಬುದರಲ್ಲಿ ಸಂದೇಹವಿಲ್ಲ.
ಆದ್ದರಿಂದ ಈ 44 ಸಾಗುವಳಿ ಚೀಟಿ ರದ್ದುಪಡಿಸಲೇಬೇಕು. ಸದರಿ ಸ.ನಂ. 41ರಲ್ಲಿ ಕಾನೂನಿನ ಪ್ರಕಾರ ವಿಸ್ತೀರ್ಣ ತಗ್ಗಿಸುವ ವಿಷಯದಲ್ಲಿ ಉಪವಿಭಾಗಾರಿ ಕಚೇರಿಯಿಂದ ಯಾವುದೇ ಪ್ರಕ್ರಿಯೆಗಳು ನಡೆಯದಿರುವುದು ಅನುಮಾನಗಳಿಗೆ ಕಾರಣವಾಗಿದೆ. ಪ್ರಕರಣದಲ್ಲಿ ಅಕ್ರಮಗಳು ಸಾಬೀತಾಗಿರುವುದರಿಂದ ಸರ್ಕಾರದಿಂದ ಯಾರಿಗೂ ಪರಿಹಾರಧನ ವಿತರಿಸಬಾರದು. ತನಿಖಾ ತಂಡ ಕ್ರಮಕ್ಕೆ ಸೂಚಿಸಿರುವವರ ಹೆಸರು ವರದಿಯಲ್ಲಿ ಉಲ್ಲೇಖೀಸದಿರುವುದೂ ಅನುಮಾನಕ್ಕೆ ಎಡೆಮಾಡಿದ್ದು, ತಕ್ಷಣವೇ ಅಂಥವರ ಹೆಸರು ವರದಿಯಲ್ಲಿ ಸೇರ್ಪಡೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ.
