ಕೋವಿಡ್ ಭೀತಿ : ಬಿಡಾಡಿ ಪ್ರಾಣಿಗಳ ಮೇಲಿಲ್ಲ ನಿಗಾ

ಬೆಂಗಳೂರು: ಕೋವಿಡ್‌-19 ಸೋಂಕಿತರಿಗೆ ಚಿಕಿತ್ಸೆ ನೀಡುತ್ತಿರುವ ವಾರ್ಡ್‌ ಆವರಣದಲ್ಲೇ ಬೀದಿನಾಯಿಗಳ ಸಂಚಾರ, ಯಾವುದೇ ಅಂತರ ಕಾಯ್ದುಕೊಳ್ಳದೆ ಆಹಾರ ಹಾಕುವುದು, ಕೆಲವೆಡೆ ಉಳಿದ ಅನ್ನ ನೀಡುವುದು, ಜ್ವರ ತಪಾಸಣೆ ಕೇಂದ್ರಗಳ ಸುತ್ತಲೂ ಓಡಾಡುವ ಪ್ರಾಣಿಗಳ ಮೇಲೂ ಇಲ್ಲ ನಿಗಾ, ಪಾಲನೆಯಾಗದ ಮಾರ್ಗಸೂಚಿ…

ಇವು ನಗರದ ವಿವಿಧೆಡೆ ಗುರುವಾರ ಕಂಡುಬಂದ ದೃಶ್ಯಗಳು.. ಸೋಂಕಿತ ವ್ಯಕ್ತಿಯಿಂದ ಪ್ರಾಣಿಗಳಿಗೂ ವೈರಸ್‌ ತಗಲುವ ಸಾಧ್ಯತೆ ಇದೆ ಎಂಬುದು ಈಗಾಗಲೇ ವಿದೇಶಗಳಲ್ಲಿ ಸಾಬೀತಾಗಿದೆ. ಆ ಹಿನ್ನೆಲೆಯಲ್ಲಿ ಪಶುಸಂಗೋಪನಾ ಇಲಾಖೆ ಪ್ರತ್ಯೇಕ ಸುತ್ತೋಲೆಯನ್ನೂ ಹೊರಡಿಸಿದೆ. ಆದರೂ ಬೀದಿನಾಯಿ, ಬೆಕ್ಕು, ಬಿಡಾಡಿ ದನಗಳು ಆಸ್ಪತ್ರೆ ಆವರಣದಲ್ಲೇ ಓಡಾಡಿಕೊಂಡಿವೆ. ಅವುಗಳ ಮೇಲೆ ನಿಗಾ ಇಡುವ ವ್ಯವಸ್ಥೆಯೂ ಇಲ್ಲ. ಈ ನಿರ್ಲಕ್ಷ್ಯ ಮುಂದುವರಿದರೆ, ಮತ್ತೂಂದು ಸಮಸ್ಯೆಗೆ ಕಾರಣವಾಗುವ ಆತಂಕ ಮೂಡಿದೆ.

ಮುಖ್ಯವಾಗಿ ಕೋವಿಡ್‌-19  ಸೋಂಕಿಗೆ ಚಿಕಿತ್ಸೆ ನೀಡುತ್ತಿರುವ ನಗರದ ಕೆ.ಸಿ. ಜನರಲ್‌, ಸಿ.ವಿ.ರಾಮನ್‌ ಆಸ್ಪತ್ರೆ, ಜಯನಗರದ ಸಾರ್ವಜನಿಕ ಆಸ್ಪತ್ರೆ, ರಾಜೀವ್‌ಗಾಂಧಿ ಎದೆರೋಗಗಳ ಆಸ್ಪತ್ರೆ, ಮಣಿಪಾಲ್‌ ಆಸ್ಪತ್ರೆ, ಆಕಾಶ್‌ ಆಸ್ಪತ್ರೆ, ವಿಕ್ಟೋರಿಯಾ ಆಸ್ಪತ್ರೆ, ಜಯದೇವ ಹೃದ್ರೋಗ ವಿಜ್ಞಾನ ಮತ್ತು ಸಂಶೋಧನಾ ಸಂಸ್ಥೆ ಹಾಗೂ ಬೌರಿಂಗ್‌ ಆಸ್ಪತ್ರೆ ಆವರಣದಲ್ಲೇ ನಾಯಿಗಳು, ಬೆಕ್ಕುಗಳು ಓಡಾಡಿಕೊಂಡಿವೆ. ಅಲ್ಲದೇ, ವಿಕ್ಟೋರಿಯಾ ಆಸ್ಪತ್ರೆಯ ಸಿಬ್ಬಂದಿ ಈ ಭಾಗದಲ್ಲಿನ ನಾಯಿಗಳಿಗೆ ಊಟ ಹಾಕುವಾಗ, ಮುನ್ನೆಚ್ಚರಿಕೆ ಕ್ರಮಗಳ ಅನುಸರಣೆಯಲ್ಲಿ ಕೊರತೆ ಇರುವುದು ಕಂಡುಬಂತು. ಇನ್ನು ಕೆಲವು ಸ್ವಯಂ ಸೇವಾ ಸಂಸ್ಥೆಗಳ ಸದಸ್ಯರು ಬೀದಿ ನಾಯಿಗಳಿಗೆ ಊಟ ಹಾಕುತ್ತಿದ್ದಾರೆ. ಅಲ್ಲಿಯೂ ಸೂಕ್ತ ಮುನ್ನೆಚ್ಚರಿಕಾ ಕ್ರಮ ಅನುಸರಿಸುತ್ತಿಲ್ಲ.

ಬಿಬಿಎಂಪಿ ಇತ್ತೀಚೆಗೆ ನಡೆಸಿದ ಸಮೀಕ್ಷೆ ಪ್ರಕಾರ ನಗರದಲ್ಲಿ ಅಂದಾಜು ಮೂರು ಲಕ್ಷ ನಾಯಿಗಳಿವೆ. ಇವುಗಳಲ್ಲಿ ಹಲವು ನಾಯಿಗಳಿಗೆ ಸಂತಾನ ಹರಣ ಶಸ್ತ್ರಚಿಕಿತ್ಸೆ ಹಾಗೂ ರೇಬಿಸ್‌ ಚುಚ್ಚುಮದ್ದು ನೀಡಿಲ್ಲ. ಸದ್ಯ ನಾಯಿಗಳಿಗೆ ಎಲ್ಲ ರೀತಿಯ ಪರೀಕ್ಷೆಗಳನ್ನು ಪಾಲಿಕೆ ಕೈಬಿಟ್ಟಿದೆ. ಅಷ್ಟೇ ಅಲ್ಲ, ಇವುಗಳ ಊಟಕ್ಕೂ ಸ್ವಯಂ ಸೇವಾ ಸಂಸ್ಥೆಗಳ ಮೇಲೆ ಪಾಲಿಕೆ ಅವಲಂಬಿತವಾಗಿದ್ದು, ರಕ್ಷಣೆಯ ಬಗ್ಗೆ ಯಾವುದೇ ಯೋಜನೆ ರೂಪಿಸಿಕೊಂಡಿಲ್ಲ.

ಪರಿಶೀಲನೆ ನಡೆಸಲಾಗುವುದು: “ಹುಲಿ ಮತ್ತು ಬೆಕ್ಕುಗಳು ಫೈಲೆನ್‌ ಎಂಬ ಜಾತಿಗೆ ಸೇರಿದ್ದು, ಈ ಪ್ರಾಣಿಗಳಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಳ್ಳುತ್ತಿದೆ. ಇದು ನೇರವಾಗಿ ಪ್ರಾಣಿಗಳಿಗೆ ಬಂದಿರುವುದು ವರದಿಯಾಗಿಲ್ಲ. ಕೊರೊನಾ ಸೋಂಕು ಇರುವವರಿಂದ ಪ್ರಾಣಿಗಳಿಗೆ ಹರಡಿರುವ ಸಾಧ್ಯತೆ ಇದೆ. ಆ ಹಿನ್ನೆಲೆಯಲ್ಲಿ ಕೊರೊನಾ ಸೋಂಕಿತರು ಸಾಕುಪ್ರಾಣಿಗಳಿಂದ ದೂರ ಉಳಿಯಬೇಕು. ಅಲ್ಲದೇ, ಯಾವುದೇ ಪ್ರಾಣಿಗಳಿಗೂ ಆಹಾರ ಮತ್ತು ನೀರು ಇಡುವಾಗ ಎಂಜಲು ಮಾಡದೇ ಇಡಬೇಕು. ಇನ್ನು ಬೀದಿನಾಯಿಗಳಿಗೆ ಕೊರೊನಾದಿಂದ ರಕ್ಷಿಸುವ ನಿಟ್ಟಿನಲ್ಲಿ ಪರಿಶೀಲನೆ ನಡೆಸಲಾಗುವುದು’ ಎಂದು ಬಿಬಿಎಂಪಿಯ ಪಶುಪಾಲನೆ ವಿಭಾಗದ ಜಂಟಿ ನಿರ್ದೇಶಕ ಡಾ.ಎಸ್‌. ಶಶಿಕುಮಾರ್‌ ತಿಳಿಸಿದ್ದಾರೆ.

ಅನುಷ್ಠಾನವಾಗದ ಮಾರ್ಗಸೂಚಿ: ಬೀದಿನಾಯಿ, ಬಿಡಾಡಿ ದನ, ನಿರ್ಲಕ್ಷಿತ ಪ್ರಾಣಿ-ಪಕ್ಷಿಗಳಿಗೆ ನೀರು, ಆಹಾರ ಹಾಗೂ ಆರೋಗ್ಯ ಸೇವೆ ನೀಡುವ ಸಿಬ್ಬಂದಿ ಕೋವಿಡ್‌-19  ಸೋಂಕು ಮುಕ್ತರಾಗಿರಬೇಕು ಎಂದು ಸೂಚನೆ ನೀಡಿದೆ. ಇದು ಸ್ವಯಂಸೇವಕರು, ಸಂಘ-ಸಂಸ್ಥೆಗಳು ಹಾಗೂ ಪ್ರಾಣಿಪ್ರಿಯರಿಗೂ ಅನ್ವಯಿಸಲಿದೆ. ಅಲ್ಲದೆ, ಬೆಳಗ್ಗೆ 6ರಿಂದ 9ಗಂಟೆ ಹಾಗೂ ಸಂಜೆ 7ರಿಂದ 9ಗಂಟೆ ವರೆಗೆ ಆಹಾರ ನೀಡಲು ಅವಕಾಶ ನೀಡಲಾಗಿದೆ. ಪ್ರಾಣಿಗಳಿಗೆ ಆಹಾರ ನೀಡುವ ವೇಳೆ ಮಾಸ್ಕ್, ಕೈಗವಸು ಧರಿಸಿರಬೇಕು. ಸ್ಯಾನಿಟೈಸರ್‌ ಬಳಸುವ ಜತೆಗೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳಬೇಕು. ಪ್ರಾಣಿ-ಪಕ್ಷಿಗಳ ಮಾರಾಟ ಮಾಡುವವರು ಲಾಕ್‌ ಡೌನ್‌ ಹಿನ್ನೆಲೆಯಲ್ಲಿ ಮಳಿಗೆಗಳಲ್ಲಿರುವ ಪ್ರಾಣಿ, ಪಕ್ಷಿಗಳನ್ನು ನಿರ್ಲಕ್ಷಿಸಿದರೆ, ಆಹಾರ ನೀಡದೆ ಹಿಂಸೆ ನೀಡಿದರೆ ಪ್ರಾಣಿ ಹಿಂಸಾ ಪ್ರತಿಬಂಧಕ ಕಾಯ್ದೆ 1960ರ ಪರಿಚ್ಛೇದ11 (1)ರ ಪ್ರಕಾರ ಕಠಿಣ ಶಿಕ್ಷೆಗೆ ಗುರಿಪಡಿಸಲಾಗುವುದು. ಹೀಗಾಗಿ, ಮಳಿಗೆಗಳಲ್ಲಿರುವ ಪ್ರಾಣಿ-ಪಕ್ಷಿಗಳಿಗೆ ದಿನದಲ್ಲಿ ಎರಡು ಬಾರಿ ನೀರು, ಆಹಾರ ಹಾಗೂ ಔಷಧಿ ನೀಡಬೇಕು. ಅಲ್ಲದೇ, ಇವುಗಳಿಗೆ ಗಾಳಿ ಮತ್ತು ಬೆಳಕಿನ ವ್ಯವಸ್ಥೆ ಮಾಡಿರಬೇಕು ಎಂದು ಸೂಚಿಸಲಾಗಿದೆ.  ಆದರೆ, ಇದರ ಸಮರ್ಪಕ ಅನುಷ್ಠಾನ ಆಗುತ್ತಿಲ್ಲ.

ಪ್ರಾಣಿಗಳ ರಕ್ಷಣೆಗೆ ಆದ್ಯತೆ ನೀಡಿ :  ಅಮೆರಿಕ ಸೇರಿದಂತೆ ವಿವಿಧ ದೇಶಗಳಲ್ಲಿ ಸಾಕು ಪ್ರಾಣಿಗಳಿಗೆ ಸೋಂಕು ಕಂಡುಬಂದಿರುವ ಹಿನ್ನೆಲೆಯಲ್ಲಿ ಥರ್ಮಲ್‌ ಸ್ಕ್ರೀನಿಂಗ್‌ ಸೇರಿದಂತೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳುತ್ತಿದ್ದಾರೆ. ರಾಜ್ಯದಲ್ಲಿ ಪಶು ಸಂಗೋಪನೆ ಮತ್ತು ಹೈನುಗಾರಿಕೆಗೆ ಹೆಚ್ಚು ಮಹತ್ವ ನೀಡಿದ್ದು, ಸಾಕು ಪ್ರಾಣಿಗಳು ಮತ್ತು ಪಶುಗಳಿಗೂ ಮುಂಜಾಗ್ರತೆ ವಹಿಸಲು ನಿಟ್ಟಿನಲ್ಲಿ ಮುಂಜಾಗ್ರತಾ ಕ್ರಮ ಕೈಗೊಳ್ಳಬೇಕು ಎಂದು ಪ್ರಾಣಿಪ್ರಿಯರು ಒತ್ತಾಯಿಸಿದ್ದಾರೆ.

ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ ಪ್ರಾಣಿ ಕಲ್ಯಾಣ ಮಂಡಳಿಯನ್ನು ನಿಯಮಾನುಸಾರ ನೋಂದಣಿ ಮಾಡಲಾಗಿದೆ. ಸರ್ಕಾರಿ ಹಾಗೂ ಸರ್ಕಾರೇತರ ತಜ್ಞರು ಇದರಲ್ಲಿ ಇರಲಿದ್ದಾರೆ. ಪಶುಪಾಲನಾ ಮತ್ತು ಪಶುವೈದ್ಯ ಸೇವಾ ಇಲಾಖೆಯ ನಿರ್ದೇಶಕರು ಇದರ ಸದಸ್ಯ ಕಾರ್ಯದರ್ಶಿಗಳಾಗಿರುತ್ತಾರೆ. ಅಲ್ಲದೇ, ಎಲ್ಲ ಪ್ರಾಣಿ- ಪಕ್ಷಿಗಳ ಆರೋಗ್ಯ ರಕ್ಷಣೆಗೆ ಕ್ರಮ ವಹಿಸುವಂತೆ ನಿರ್ದೇಶನ ನೀಡಲಾಗಿದೆ. –ಪ್ರಭು ಚೌಹ್ವಾಣ್‌, ಪಶುಸಂಗೋಪನಾ ಸಚಿವ

 

– ಹಿತೇಶ್‌ ವೈ