ಕೆಕೆಆರ್‌ಗೆ ಟ್ರೆವರ್‌ ಬೈಲೀಸ್‌ ಕೋಚ್‌?

ಕೋಲ್ಕತಾ: ಶಾರುಕ್‌ ಖಾನ್‌ ಒಡೆತನದ ಕೋಲ್ಕತಾ ನೈಟ್‌ರೈಡರ್ ತಂಡದ ಕೋಚ್‌ ಹುದ್ದೆಗೆ ವಿಶ್ವಕಪ್‌ ವಿಜೇತ ಇಂಗ್ಲೆಂಡ್‌ ತಂಡದ ಕೋಚ್‌ ಟ್ರೆವರ್‌ ಬೈಲೀಸ್‌ ಅವರನ್ನು ಆಯ್ಕೆ ಮಾಡುವ ಸಾಧ್ಯತೆ ಇದೆ ಎಂದು ಆಡಳಿತ ಮಂಡಳಿ ತಿಳಿಸಿದೆ.

ಮುಖ್ಯ ಕೋಚ್‌ ಆಗಿದ್ದ ಜಾಕ್‌ ಕ್ಯಾಲಿಸ್‌ ಅವರನ್ನು ಇತ್ತೀಚೆಗೆ ಕೈಬಿಡಲಾಗಿತ್ತು, ಇದೀಗ ನೂತನ ಕೋಚ್‌ ಆಗಿ ಟ್ರೆವರ್‌ ಬೈಲೀಸ್‌ ಅವರನ್ನು ಆಯ್ಕೆ ಮಾಡುವ ನಿಟ್ಟಿನಲ್ಲಿ ಮಾತುಕತೆ ನಡೆದಿದೆ. ಆದರೆ ಬೈಲೀಸ್‌ ನಿರ್ಧಾರ ಇನ್ನಷ್ಟೇ ತಿಳಿಯಬೇಕಿದೆ.

ಆಸ್ಟ್ರೇಲಿಯದವರಾದ ಟ್ರೆವರ್‌ ಬೈಲೀಸ್‌ ಇಂಗ್ಲೆಂಡ್‌ ತಂಡವನ್ನು ವಿಶ್ವ ಚಾಂಪಿಯನ್‌ ಪಟ್ಟಕ್ಕೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಎರಡು ಬಾರಿಯ ಐಪಿಎಲ್‌ ಚಾಂಪಿಯನ್‌ ಆಗಿರುವ ಕೆಕೆಆರ್‌ ತಂಡಕ್ಕೆ ಬೈಲೀಸ್‌ ಸಲಹೆ ಬೇಕಿದೆ ಎನ್ನುವುದು ಫ್ರಾಂಚೈಸಿಯ ಬಯಕೆ.