ಅಂತರ್ಜಾಲ ತಟಸ್ಥ ನೀತಿ: ಟ್ರಾಯ್‌ ಶೀಘ್ರ ನಿರ್ಧಾರ

ಹೊಸದಿಲ್ಲಿ: ವರ್ಷದ ಹಿಂದೆ ತೀವ್ರ ಚರ್ಚೆಗೆ ಕಾರಣವಾಗಿದ್ದ ಅಂತರ್ಜಾಲ ತಟಸ್ಥ ನೀತಿ (ನೆಟ್‌ ನ್ಯೂಟ್ರಾಲಿಟಿ) ಬಗ್ಗೆ ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್‌) ಶೀಘ್ರದಲ್ಲಿಯೇ ನಿರ್ಧಾರ ಕೈಗೊಳ್ಳಲಿದೆ. 

ಇಂಟರ್ನೆಟ್‌ ಸಂಪರ್ಕ ನೀಡುವ ದೂರಸಂಪರ್ಕ ಕಂಪೆನಿಗಳು ವೀಡಿಯೋ ಮತ್ತು ಮಾಹಿತಿ (ಕಂಟೆಂಟ್‌)ಗಳಿಗೆ ಶುಲ್ಕ ವಿಧಿಸಲು ಅವಕಾಶ ನೀಡಬೇಕೆಂದು  ಪ್ರತಿಪಾದಿಸುತ್ತಿವೆ. ಅವುಗಳು ಈ ನಿಟ್ಟಿನಲ್ಲಿ  ಒತ್ತಡ ಹೇರುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಪ್ರಾಮುಖ್ಯತೆ ಪಡೆದಿದೆ. ಬಳಕೆದಾರರಿಗೆ ಯಾವುದೇ ತಾರತಮ್ಯವಿಲ್ಲದೆ ಇಂಟರ್ನೆಟ್‌ ಬಳಕೆಗೆ ಅನುಕೂಲವಾಗಬೇಕೆಂದು ಟ್ರಾಯ್‌ ಪ್ರತಿಪಾದಿಸುತ್ತಿದೆ. ಆದರೆ, ಕಂಪೆನಿಗಳು ಕಡಿಮೆ ವೆಚ್ಚದಲ್ಲಿ ಸೇವೆ ಪೂರೈಕೆಯಾದರೆ ಹೆಚ್ಚಿನ ಸಂಖ್ಯೆಯಲ್ಲಿ ಬಳಕೆದಾರರು ವೃದ್ಧಿಸುತ್ತಾರೆಂದು ವಾದಿಸುತ್ತಿವೆ.