Japan rivals: ನಿಸ್ಸಾನ್‌-ಹೋಂಡಾ ವಿಲೀನ: ಇನ್ನು ವಿಶ್ವದ ನಂ.3 ಕಂಪೆನಿ!

ಟೋಕಿಯೋ: ಜಪಾನ್‌ನ ಖ್ಯಾತ ಕಾರು ತಯಾರಕಾ ಸಂಸ್ಥೆಗಳಾದ ಹೋಂಡಾ ಮತ್ತು ನಿಸ್ಸಾನ್‌ ವಿಲೀನಗೊಳ್ಳುವ ಘೋಷಣೆ ಮಾಡಿದ್ದು, ಇದು ಸಾಧ್ಯವಾದರೆ ಈ ಕಂಪೆನಿಗಳು ಜಗತ್ತಿನ 3ನೇ ಅತೀದೊಡ್ಡ ಕಾರು ತಯಾರಕಾ ಕಂಪನಿ (ಮಾರಾಟದ ಆಧಾರದಲ್ಲಿ) ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿವೆ.

ಸೋಮವಾರ ನಿಸ್ಸಾನ್‌ ಮತ್ತು ಹೋಂಡಾ ಈ ಕುರಿತ ಒಪ್ಪಂದಕ್ಕೆ ಸಹಿ ಹಾಕಿವೆ. ನಿಸ್ಸಾನ್‌ ಜತೆ ಗುರುತಿಸಿಕೊಂಡಿರುವ ಮಿತ್ಸುಬಿಷಿ ಮೋಟಾರ್ಸ್‌ ಕೂಡ ಇವುಗಳೊಂದಿಗೆ ವಿಲೀನಗೊಳ್ಳಲಿದೆ. ಈ ಮೂರೂ ಸಂಸ್ಥೆಗಳ ವಿಲೀನದ ಮೂಲಕ ಇವುಗಳ ಮಾರುಕಟ್ಟೆ ಮೌಲ್ಯ 4.25 ಲಕ್ಷ ಕೋಟಿ ರೂ. ಆಗಲಿದೆ ಎಂದು ನಿಸ್ಸಾನ್‌ ಸಿಇಒ ಮಕೋಟೋ ಉಚಿಡಾ ಹೇಳಿದ್ದಾರೆ.

ವಿದ್ಯುತ್‌ಚಾಲಿತ ವಾಹನಗಳ ಭರಾಟೆಯಿಂದಾಗಿ ಜಪಾನ್‌ನ ಹಲವು ಆಟೋಮೊಬೈಲ್‌ ಕಂಪೆನಿಗಳು ಸ್ಪರ್ಧೆಯಲ್ಲಿ ಹಿಂದುಳಿಯುತ್ತಿದ್ದು, ವೆಚ್ಚ ಕಡಿತಕ್ಕೆ ಹರಸಾಹಸ ಪಡುತ್ತಿವೆ.

ವಿಲೀನದ ಬಳಿಕವೂ ಟೊಯೋಟಾ ಕಂಪೆನಿಯೇ(2023ರಲ್ಲಿ 1.15 ಕೋಟಿ ವಾಹನ ತಯಾರಿಸಿದೆ) ಜಪಾನ್‌ನ ನಂ.1 ಆಟೋಮೊಬೈಲ್‌ ಸಂಸ್ಥೆಯಾಗಿ ಉಳಿಯಲಿದೆ. ಪ್ರತೀ ವರ್ಷ ಅತೀ ಹೆಚ್ಚು ಕಾರು ಗಳನ್ನು ಮಾರಾಟ ಮಾಡುವ ಮೂಲಕ ಜಗತ್ತಿನ ನಂ.1 ಕಂಪೆನಿ ಎನಿಸಿದೆ.