‘ಟಾಮ್‌ ಅಂಡ್‌ ಜೆರ್ರಿ’ಚಿತ್ರ ವಿಮರ್ಶೆ: ಆಟದ ನಡುವೆ ಜೀವನ ಪಾಠ

ಕಾರ್ಟೂನ್‌ನಲ್ಲಿ “ಟಾಮ್‌ ಅಂಡ್‌ ಜೆರ್ರಿ’ ನೋಡಿದವರಿಗೆ ಅಲ್ಲೊಂದು ಕ್ಯೂಟ್‌ ಕಿತ್ತಾಟ, ಮುದ್ದಾಟ ಇಷ್ಟವಾಗಿರುತ್ತದೆ. ಅಂಥದ್ದೇ ಕಿತ್ತಾಟ, ಮುದ್ದಾಟ ಜೊತೆಗೊಂದು ಜೀವನ ಪಾಠ ಈ ವಾರ ತೆರೆಗೆ ಬಂದಿರುವ “ಟಾಮ್‌ ಅಂಡ್‌ ಜೆರ್ರಿ’ ಸಿನಿಮಾದಲ್ಲೂ ಕಾಣ ಸಿಗುತ್ತದೆ.

ಹೆಸರೇ ಹೇಳುವಂತೆ, “ಟಾಮ್‌ ಅಂಡ್‌ ಜೆರ್ರಿ’ಯಂಥ ಎರಡು ವೈರುಧ್ಯವಿರುವ ಧರ್ಮ (ನಾಯಕ) ಮತ್ತು ಸತ್ಯ (ನಾಯಕಿ) ವ್ಯಕ್ತಿತ್ವ, ಮನಸ್ಥಿತಿಯ ಸುತ್ತ ಇಡೀ ಸಿನಿಮಾದ ಕಥೆ ಸಾಗುತ್ತದೆ. ಇಲ್ಲೊಂದು ನವಿರಾದ ಲವ್‌ಸ್ಟೋರಿ ಇದೆ. ಪ್ರೀತಿಯನ್ನು ಹಂಬಲಿಸುವ ಹೃದಯಗಳಿವೆ, ಸಂಬಂಧಗಳನ್ನು ಬೆಂಬಲಿಸುವ ಮನಸ್ಸುಗಳಿವೆ, ಜೀವನ ದರ್ಶನ ಮಾಡಿಸುವಂಥ ಪಾತ್ರಗಳಿವೆ. ಇವೆಲ್ಲವನ್ನೂ ಒಂದೇ ಫ್ರೇಮ್‌ನಲ್ಲಿ “ಟಾಮ್‌ ಅಂಡ್‌ ಜೆರ್ರಿ’ ಜೊತೆ ಕಟ್ಟಿಕೊಡುವ ಪ್ರಯತ್ನ ಮಾಡಿದ್ದಾರೆ ಯುವ ನಿರ್ದೇಶಕ ರಾಘವ ವಿನಯ್‌ ಶಿವಗಂಗೆ.

ಇದನ್ನೂ ಓದಿ:‘ಫಸ್ಟ್ ನೈಟ್’ ಹೇಳಿಕೆ: ರಚಿತಾ ರಾಮ್ ಮೇಲೆ ನಿಷೇಧ ಹೇರಲು ಕ್ರಾಂತಿ ದಳ ಕೋರಿಕೆ

ಇಂದಿನ ಪ್ರೇಕ್ಷಕರಿಗೆ ಇಷ್ಟವಾಗುವಂತ ಸಿನಿಮ್ಯಾಟಿಕ್‌ ಅಂಶಗಳ ಜೊತೆಗೇ, ಜೀವನದ ಅರ್ಥ, ಆಯಾಮ, ವ್ಯಾಖ್ಯಾನ ಹೀಗೆ ಗಂಭೀರ ಅಂಶಗಳನ್ನು ಚಿತ್ರದಲ್ಲಿ ಹೇಳಲಾಗಿದೆ. ಸ್ನೇಹ, ಪ್ರೀತಿ, ಸಂಬಂಧಗಳ ಜೊತೆಗೊಂದು ಜೀವನ ಪಾಠ ಚಿತ್ರದಲ್ಲಿದೆ. ಭೋದನೆ, ರಂಜನೆ ನಡುವೆ “ಟಾಮ್‌ ಅಂಡ್‌ ಜೆರ್ರಿ’ ಆಟ ನಡೆಯುತ್ತದೆ.  ಚಿತ್ರಕಥೆಗೆ ಇನ್ನಷ್ಟು ವೇಗ ಸಿಕ್ಕಿ ಮತ್ತು ಚಿತ್ರದ ಕೆಲ ದೃಶ್ಯಗಳಿಗೆ ಕತ್ತರಿ ಬಿದ್ದಿದ್ದರೆ, “ಟಾಮ್‌ ಅಂಡ್‌ ಜೆರ್ರಿ’ ಆಟ-ಪಾಠ ಎರಡೂ ಇನ್ನಷ್ಟು ಪರಿಣಾಮಕಾರಿಯಾಗುವ ಸಾಧ್ಯತೆಗಳಿದ್ದವು.

ಈ ಹಿಂದೆ “ಗಂಟುಮೂಟೆ’ ಚಿತ್ರದಲ್ಲಿ ಗಮನ ಸೆಳೆದು ಭರವಸೆ ಮೂಡಿಸಿದ್ದ ಯುವ ನಟ ನಿಶ್ಚಿತ್‌ ಕೊರೋಡಿ “ಟಾಮ್‌ ಅಂಡ್‌ ಜೆರ್ರಿ’ಯಲ್ಲಿ ರಫ್ ಆ್ಯಂಡ್‌ ಟಫ್ ಲುಕ್‌ನಲ್ಲಿ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. ತಮ್ಮ ಗೆಟಪ್‌, ಮ್ಯಾನರಿಸಂ, ಡೈಲಾಗ್‌ ಡೆಲಿವರಿ, ಆ್ಯಕ್ಷನ್‌ ದೃಶ್ಯಗಳನ್ನು ನಿಶ್ಚಿತ್‌ ಸಮರ್ಥವಾಗಿ ನಿರ್ವಹಿಸಿದ್ದಾರೆ.

ಇನ್ನು ಕಿರುತೆರೆಯಿಂದ ಮೊದಲ ಬಾರಿಗೆ ಹಿರಿತೆರೆಗೆ ನಾಯಕಿಯಾಗಿ ಪರಿಚಯವಾಗುತ್ತಿರುವ ಚೈತ್ರಾ ರಾವ್‌ ಕೂಡ ತಮ್ಮ ಪಾತ್ರವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ತನ್ನಿಚ್ಛೆಯಂತೆ ಬದುಕುವ ತುಂಬ ಬೋಲ್ಡ್‌ ಹುಡುಗಿಯಾಗಿ ಚೈತ್ರಾ ರಾವ್‌ ಭಾವಾಭಿನಯ ನೋಡುಗರಿಗೆ ಇಷ್ಟವಾಗುವಂತಿದೆ. ಮಗನ ಪ್ರೀತಿ ಹಂಬಲಿಸುವ ತಂದೆ -ತಾಯಿಯಾಗಿ ತಾರಾ ಅನುರಾಧಾ, ಜೈಜಗದೀಶ್‌ ಅವರದ್ದು ಮನ ಮುಟ್ಟುವ ಅಭಿನಯ. ಉಳಿದಂತೆ ಇತರ ಬಹುತೇಕ ಕಲಾವಿದರು ತಮ್ಮ ಸಿಕ್ಕ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡಿದ್ದು, ತಮ್ಮ ಪಾತ್ರಗಳನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ವಾರಾಂತ್ಯದಲ್ಲಿ ಕುಟುಂಬ ಸಮೇತರಾಗಿ “ಟಾಮ್‌ ಅಂಡ್‌ ಜೆರ್ರಿ’ ಗೇಮ್‌ ಒಮ್ಮೆ ನೋಡಿ ಬರಲು ಅಡ್ಡಿಯಿಲ್ಲ.

 ಜಿ.ಎಸ್‌.ಕಾರ್ತಿಕ ಸುಧನ್‌