ಭಾರತಕ್ಕೆ ಟೋಕಿಯೊ ಟಿಕೆಟ್‌

ಭುವನೇಶ್ವರ: ಭಾರತದ ಪುರುಷರ ಮತ್ತು ವನಿತಾ ಹಾಕಿ ತಂಡಗಳೆರಡೂ 2020ರ ಒಲಿಂಪಿಕ್ಸ್‌ ಅರ್ಹತೆ ಸಂಪಾದಿಸುವಲ್ಲಿ ಯಶಸ್ವಿಯಾಗಿವೆ. ಇದರೊಂದಿಗೆ ಮುಂದಿನ ವರ್ಷದ ಟೋಕಿಯೊ ಕೂಟವನ್ನು ಭಾರತದ ಕ್ರೀಡಾಭಿಮಾನಿಗಳು ಹೆಚ್ಚು ಕುತೂಹಲದಿಂದ ವೀಕ್ಷಿಸಬಹುದಾಗಿದೆ.

ಶನಿವಾರ ಇಲ್ಲಿನ “ಕಳಿಂಗ ಸ್ಟೇಡಿಯಂ’ನಲ್ಲಿ ನಡೆದ ಪಂದ್ಯಗಳಲ್ಲಿ ವನಿತಾ ತಂಡ ಅಮೆರಿಕಕ್ಕೆ 1-4 ಅಂತರದಿಂದ ಸೋತರೂ 2 ಪಂದ್ಯಗಳ ಒಟ್ಟು ಗೋಲು ಗಳಿಕೆಯಲ್ಲಿ 6-5 ಅಂತರದ ಮುನ್ನಡೆ ಸಾಧಿಸಿತು.

ಅನಂತರ ನಡೆದ ಪುರುಷರ ಮುಖಾಮುಖೀಯಲ್ಲಿ ಭಾರತ 7-1 ಗೋಲುಗಳಿಂದ ರಶ್ಯವನ್ನು ಮಣಿಸಿತು. ಮೊದಲ ಪಂದ್ಯದಲ್ಲಿ 4-2 ಅಂತರದಿಂದ ಜಯಿಸಿದ್ದ ಭಾರತ ಒಟ್ಟು 11-3 ಮುನ್ನಡೆಯೊಂದಿಗೆ ಪ್ರಭುತ್ವ ಸಾಧಿಸಿತು.

ರಾಣಿ ಗೋಲು ತಂದ ಅದೃಷ್ಟ
ಮೊದಲ ಪಂದ್ಯದಲ್ಲಿ ನಿರೀಕ್ಷೆಗೂ ಮೀರಿದ ಪ್ರದರ್ಶನ ನೀಡಿದ್ದ ವನಿತೆಯರು ಅಮೆರಿಕ ವಿರುದ್ಧ 5-1 ಅಂತರದ ಜಯಭೇರಿ ಮೊಳಗಿಸಿದ್ದರು. ಆದರೆ ಶನಿವಾರದ ಪಂದ್ಯದಲ್ಲಿ ಅಮೆರಿಕ ತಿರುಗೇಟು ನೀಡಿತು. 4-1 ಅಂತರದಿಂದ ಭಾರತವನ್ನು ಮಣಿಸಿತು. ಆದರೆ ಎರಡೂ ಪಂದ್ಯಗಳ ಒಟ್ಟು ಗೋಲು ಲೆಕ್ಕಾಚಾರದಲ್ಲಿ ಭಾರತ 6-5 ಅಂತರದ ಮುನ್ನಡೆ ಕಾಯ್ದುಕೊಂಡು ಟೋಕಿಯೊ ಅರ್ಹತೆ ಸಂಪಾದಿಸುವಲ್ಲಿ ಯಶಸ್ವಿಯಾಯಿತು. ಇದು ಭಾರತಕ್ಕೆ ಲಭಿಸಿದ ಸತತ 2 ಒಲಿಂಪಿಕ್‌ ಟಿಕೆಟ್‌.

ಅರ್ಧ ಹಾದಿ ಕ್ರಮಿಸುವಾಗ ಅಮೆರಿಕ 4-0 ಅಂತರದ ಭರ್ಜರಿ ಮುನ್ನಡೆಯಲ್ಲಿತ್ತು. 48ನೇ ನಿಮಿಷದಲ್ಲಿ ನಾಯಕಿ ರಾಣಿ ರಾಮ್‌ಪಾಲ್‌ ಬಾರಿಸಿದ ಮಹತ್ವದ ಗೋಲು ಭಾರತದ ಅದೃಷ್ಟವನ್ನು ತೆರೆದಿರಿಸಿತು. ಅಕಸ್ಮಾತ್‌ ಇತ್ತಂಡಗಳ ಎರಡೂ ಪಂದ್ಯಗಳ ಗೋಲುಗಳು ಸಮನಾಗಿದ್ದರೆ ಪೆನಾಲ್ಟಿ ಶೂಟೌಟ್‌ ಮೂಲಕ ವಿಜೇತರನ್ನು ನಿರ್ಧರಿಸಬೇಕಿತ್ತು.

ಪುರುಷರಿಗೆ 7-1 ಜಯ
ಶುಕ್ರವಾರ ನಿರೀಕ್ಷಿತ ಮಟ್ಟದ ಆಟವಾಡದ ಭಾರತದ ಪುರುಷರು ದ್ವಿತೀಯ ಪಂದ್ಯದಲ್ಲಿ ರಶ್ಯದ ಮೇಲೆರಗಿ ಹೋದರು. ರಶ್ಯ ಮೊದಲ ನಿಮಿಷದಲ್ಲೇ ಗೋಲು ಬಾರಿಸಿದರೂ ಬಳಿಕ ಭಾರತ ಮುನ್ನುಗ್ಗಿ ಹೋಯಿತು. ಸತತ 7 ಗೋಲು ಬಾರಿಸಿ ಮೆರೆದಾಡಿತು.