ಪುಣೆ-ಹುಬ್ಬಳ್ಳಿ ಸಹಿತ 5 ವಂದೇ ಭಾರತ್‌ಗೆ ಇಂದು ಮೋದಿ ಚಾಲನೆ

ಹೊಸದಿಲ್ಲಿ: ಪುಣೆ-ಹುಬ್ಬಳ್ಳಿ ರೈಲು ಸೇರಿ 5 ವಂದೇ ಭಾರತ್‌ ರೈಲುಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಚಾಲನೆ ನೀಡಲಿದ್ದಾರೆ. ಈ ಮೂಲಕ ಕರ್ನಾಟಕದಲ್ಲಿ ಸಂಚರಿಸಲಿರುವ ವಂದೇ ಭಾರತ್‌ ರೈಲುಗಳ ಸಂಖ್ಯೆ 9ಕ್ಕೆ ಏರಿಕೆಯಾಗಲಿದೆ. ಇದರೊಂದಿಗೆ ನಾಗಪುರ ಮತ್ತು ಸಿಕಂದರಾಬಾದ್‌, ಕೊಲ್ಹಾಪುರ ಮತ್ತು ಪುಣೆ, ಆಗ್ರಾ ದಂಡು ಮತ್ತು ಬನಾರಸ್‌, ದುರ್ಗ್‌ ಮತ್ತು ವಿಶಾಖಪಟ್ಟಣಂ ನಡುವೆ ಸಂಚರಿಸುವ ವಂದೇ ಭಾರತ್‌ ರೈಲುಗಳಿಗೆ ಹಸುರು ನಿಶಾನೆ ತೋರಲಿದ್ದಾರೆ. ಅಲ್ಲದೆ ದಿಲ್ಲಿ ಮತ್ತು ವಾರಾಣಸಿ ನಡುವೆ ಸಂಚರಿಸುವ 20 ಬೋಗಿಗಳ ರೈಲಿಗೂ ಚಾಲನೆ ನೀಡಲಿದ್ದಾರೆ.

ದೇಶದ ಮೊದಲ “ವಂದೇ ಮೆಟ್ರೋ’ ಉದ್ಘಾಟನೆ
ಅಹ್ಮದಾಬಾದ್‌: 2 ನಗರಗಳ ನಡುವೆ ಸಂಚರಿಸಲಿರುವ ದೇಶದ ಮೊದಲ “ವಂದೇ ಮೆಟ್ರೋ’ ರೈಲಿಗೆ ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಚಾಲನೆ ನೀಡಲಿದ್ದಾರೆ. ಅಹ್ಮದಾಬಾದ್‌-ಭುಜ್‌ ನಡುವಿನ 365 ಕಿ.ಮೀ.ದೂರವನ್ನು ಹೊಸ ರೈಲು 5 ಗಂಟೆ 45 ನಿಮಿಷಗಳಲ್ಲಿ ಕ್ರಮಿಸಲಿದೆ. ಪ್ರತೀ ಗಂಟೆಗೆ ರೈಲು ಗರಿಷ್ಠ 110 ಕಿ.ಮೀ. ವೇಗದಲ್ಲಿ ಸಂಚರಿಸಲಿದೆ. ಹೊಸ ವ್ಯವಸ್ಥೆ 2 ನಗರಗಳ ನಡುವಿನ ಸಂಚಾರದಲ್ಲಿ ಭಾರೀ ಬದಲಾವಣೆ ತರಲಿದೆ. ವಂದೇ ಭಾರತ್‌ಗಿಂತ ಕೆಲವು ವ್ಯವಸ್ಥೆಗಳು ಹೊಸ ರೈಲಿನಲ್ಲಿ ಉತ್ತಮವಾಗಿದೆ ಎಂದು ರೈಲ್ವೇ ಇಲಾಖೆ ಹೇಳಿದೆ.