ಬೆಳ್ತಂಗಡಿ: ಪತಿಯ ವಿಚಾರ ದಲ್ಲಿ ಮನನೊಂದು ಇಂದಬೆಟ್ಟು ಗ್ರಾಮದ ಕೊಪ್ಪದಕೋಡಿಯ ನವ ವಿವಾಹಿತೆ ಎ. 20ರಂದು ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದು, ಚಿಕಿತ್ಸೆಗೆ ಸ್ಪಂದಿಸದೆ ಎ. 23ರಂದು ಮೃತಪಟ್ಟಿದ್ದಾರೆ.
ಇಂದಬೆಟ್ಟು ಗ್ರಾಮದ ಕೊಪ್ಪದ ಕೋಡಿ ನಿವಾಸಿ ದೇವಕಿ ಅವರ ಪುತ್ರಿ ಕೌಸಲ್ಯಾ (28) ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಾಕೆ.
ಕೌಸಲ್ಯಾ ಅವರು ಕಳೆದ ಐದು ತಿಂಗಳ ಹಿಂದೆ ನೆರೆಯ ಸೂರ್ಯಬೆಟ್ಟು ನಿವಾಸಿ ಸುಕೇಶ್‌ ಅವರ ಜತೆ ಪ್ರೀತಿಸಿ ಮದುವೆಯಾಗಿದ್ದರು. ಆದರೆ ಪತಿ ಆತನ ಸಂಬಂಧಿಕರೋರ್ವರ ಪತ್ನಿಯೊಂದಿಗೆ ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದ ವಿಚಾರ ಕೌಸಲ್ಯಾಗೆ ಕಳೆದ ಎರಡು ತಿಂಗಳ ಹಿಂದೆ ತಿಳಿದುಬಂದಿತ್ತು. ಈ ಬಗ್ಗೆ ಪತಿಯಲ್ಲಿ ವಿಚಾರಿಸಿದಾಗ ಬೈದು, ಮಾವ ಶೇಖರ್‌ ಅವರು ಬೈದು ತೊಂದರೆ ನೀಡಿರುವ ಕುರಿತು ಪೋಷಕರಿಗೆ ತಿಳಿಸಿದ್ದರು.
ಆಕೆಯ ಪತಿ ಗಲಾಟೆ ಮಾಡುವ ಸಮಯ ನಿನ್ನನ್ನಾದರೂ ಬಿಡುತ್ತೇನೆ ಆದರೆ ಆಕೆಯನ್ನು ಬಿಡುವುದಿಲ್ಲ. ನೀನು ನನಗೆ ಬೇಡ ಎಂಬಿತ್ಯಾದಿ ಹೇಳುತ್ತಾ ಮಾನಸಿಕ ಹಿಂಸೆ ನೀಡಿರುವುದಾಗಿ ಹೇಳುತ್ತಿದ್ದಳು. ಅದೇ ರೀತಿ ಪತಿ ಹಾಗೂ ಸಂಬಂಧಿಕಳ ವಾಟ್ಸ್‌ ಆ್ಯಪ್‌ ಸಂದೇಶ ಕೌಸಲ್ಯಾಗೆ ದೊರೆತಿತ್ತು. ಅನಂತರ ಆಕೆಗೆ ಜೀವಬೆದರಿಕೆ ಒಡ್ಡಿದ್ದರು ಎನ್ನಲಾಗಿದೆ. ಇದರಿಂದ ಮನನೊಂದು ಕೌಸಲ್ಯಾ ಅವರು ಹುಲ್ಲಿಗೆ ಬಿಡುವ ಔಷಧ ಸೇವಿಸಿರುವುದಾಗಿ ಎ. 20ರಂದು ಪೋಷಕರಿಗೆ ತಿಳಿಸಿದ್ದಾರೆ. ಚಿಕಿತ್ಸೆಯ ಬಗ್ಗೆ ಉಜಿರೆಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಎ. 22ರಂದು ರಾತ್ರಿ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿರುವುದಾಗಿ ಬೆಳ್ತಂಗಡಿ ಠಾಣೆಗೆ ನೀಡಿದ ದೂರಿನಲ್ಲಿ ತಿಳಿಸಲಾಗಿದೆ. ಬೆಳ್ತಂಗಡಿ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಮುಂದುವರಿಸಿದ್ದಾರೆ.
