ಗೃಹಸಾಲ ಪಡೆಯುವವರಿಗೆ ಸಲಹೆಗಳು

ಗೃಹಸಾಲ ಪಡೆದು ಸ್ಥಿರ ಆಸ್ತಿಯನ್ನು ಹೊಂದುವಾಗ ಅತೀ ವೇಗದಿಂದ ಬೆಳೆಯುತ್ತಿರುವ ಪಟ್ಟಣಗಳನ್ನು ಮಾತ್ರ ಆರಿಸಿಕೊಳ್ಳಿ.ನೀವು ತೊಡಗಿಸಿದ ಬಂಡವಾಳ ಕೂಡ ಅದೇ ವೇಗದಿಂದ ಬೆಳೆಯುತ್ತಿರುತ್ತದೆ.

-ನೀವು ಉದ್ಯೋಗ ಮಾಡುತ್ತಿರುವ ಸಂಸ್ಥೆ, ತಮ್ಮ ನೌಕರರಿಗೆ ಕಡಿಮೆ ಬಡ್ಡಿದರದಲ್ಲಿ ಗೃಹಸಾಲ ನೀಡುತ್ತಿದ್ದರೆ, ತಕ್ಷಣ ಅದರ ಸದುಪಯೋಗ ಪಡೆದುಕೊಳ್ಳಿ.

-ಸಾಲದ ಮೇಲಿನ ಬಡ್ಡಿದರ ಆರಿಸಿಕೊಳ್ಳುವಾಗ ಬದಲಾಗುವ ಬಡ್ಡಿ ದರ (Floating interest rate) ಆರಿಸಿಕೊಳ್ಳಿ.

-ಹಣದುಬ್ಬರಕ್ಕೆ ಸರಿಯಾಗಿ ಹಣದ ಬೆಲೆ ಪ್ರತಿ ವರ್ಷ ಕಡಿಮೆಯಾಗುತ್ತದೆ. ಆದರೆ, ಸ್ಥಿರ ಆಸ್ತಿಯ ಬೆಲೆ ದಿನೇ ದಿನೆ ಹೆಚ್ಚಾಗುತ್ತಿರುತ್ತದೆ. ಉಳಿತಾಯ ಅಥವಾ ಹಣ ಹೂಡುವಿಕೆಯ ದೃಷ್ಟಿಯಲ್ಲಿ ಗೃಹಸಾಲ ಮಾಡಲು ಇದು ಪರ್ವ ಕಾಲ.

-ಗೃಹಸಾಲಕ್ಕೆ ಪ್ರಥಮ ಆದ್ಯತೆ ಕೊಟ್ಟು ನಂತರ ನಿಮ್ಮ ಬಜೆಟ್ಟಿಗನುಗುಣವಾಗಿ, ವಾಹನ ಸಾಲ ಪಡೆಯಿರಿ. ಗೃಹಸಾಲದಿಂದ ಸ್ಥಿರ ಆಸ್ತಿ ಮಾಡಿದಂತಾಗುತ್ತದೆ. ವಾಹನ ಸಾಲದಿಂದ ಬಂಡವಾಳ ಬೆಳೆಯುವುದಿಲ್ಲ. ಸುಖ ಮಾತ್ರ ಸಿಗುತ್ತದೆ. ಆದರೆ ಗೃಹಸಾಲದಿಂದ ಸುಖ ಹಾಗೂ ಬಂಡವಾಳ ವೃದ್ಧಿ ಎರಡನ್ನೂ ಪಡೆಯಬಹುದು.

-ಗೃಹಸಾಲ ಪಡೆಯುವಾಗ ಬಹಳಷ್ಟು ಹಣಕಾಸು ಸಂಸ್ಥೆಗಳು ನಿರ್ವಹಣಾ ವೆಚ್ಚ(ಪ್ರೊಸೆಸಿಂಗ್‌ ಚಾರ್ಜಸ್‌) ಹಾಗೂ ನಿಗೂಢ (ಹಿಡನ್‌ ಚಾರ್ಜಸ್‌) ಖರ್ಚುಗಳನ್ನು ವಿಧಿಸುತ್ತವೆ. ಇಂಥ ಖರ್ಚು ಹಾಗೂ ಬಡ್ಡಿ ದರ ಅತೀ ಕಡಿಮೆ ಇರುವಲ್ಲಿ ಗೃಹಸಾಲ ಪಡೆಯಿರಿ.

-ಗೃಹಸಾಲ ತೀರಿಸಲು ಬೇರೆ ಸಂಸ್ಥೆಯಿಂದ ಸಾಲ ಪಡೆಯುವಾಗ ದಂಡದ ಬಡ್ಡಿ(ಪೆನಾಲ್ಟಿ) ವಿಧಿಸುವ ಕ್ರಮ ಇದೆ. ಈ ವಿಚಾರವನ್ನು ಮೊದಲೇ ತಿಳಿದುಕೊಳ್ಳಿ.

– ಈಗ ಪ್ರಸ್ತುತ ಇರುವ ಆದಾಯ ತೆರಿಗೆ ಕಾನೂನಿನ ಅನ್ವಯ ಬಹಳಷ್ಟು ಆದಾಯ ತೆರಿಗೆ ಲಾಭವನ್ನು, ಗೃಹಸಾಲ ಪಡೆಯುವುದರಿಂದ ಪಡೆಯಬಹುದು. ಈಗಿನ ಆದಾಯ ತೆರಿಗೆ ಕಾನೂನಿನಂತೆ-
ಎ. ಸೆಕ್ಷನ್‌ 24.ಬಿ ಪ್ರಕಾರ ಗೃಹಸಾಲ ಬಡ್ಡಿಯಲ್ಲಿ 2 ಲಕ್ಷ ರೂ.ಗಳ ತನಕ ಆದಾಯದಿಂದ ಕಡಿತ ಮಾಡಿ ಆದಾಯ ತೆರಿಗೆಯನ್ನು ಸಲ್ಲಿಸಬಹುದು.
ಬಿ. ಸೆಕ್ಷನ್‌ 80ಸಿ ಪ್ರಕಾರ ಗೃಹಸಾಲಕ್ಕೆ ಮರುಪಾವತಿ ಮಾಡಿದರೂ 1.5 ಲಕ್ಷದ ತನಕ ಆದಾಯದಿಂದ ಕಡಿತ ಆದಾಯ ತೆರಿಗೆಯನ್ನು ಸಲ್ಲಿಸಬಹುದು.

-ಯು.ಪಿ.ಪುರಾಣಿಕ್‌