ಟೈಗರ್‌ ಗಲ್ಲಿಯಲ್ಲೊಂದು ಸುತ್ತು

ಸತೀಶ್‌ ನೀನಾಸಂ, “ಟೈಗರ್‌ ಗಲ್ಲಿ’ ಎಂಬ ಚಿತ್ರದಲ್ಲಿ ನಟಿಸುತ್ತಿರುವ ವಿಷಯದ ಬಗ್ಗೆ ಗೊತ್ತೇ ಇದೆ. ಇತ್ತೀಚೆಗೆ ಆ ಚಿತ್ರದ ಚಿತ್ರೀಕರಣ ಮುಗಿದಿದೆ. ಸತೀಶ್‌ ಮತ್ತು ಭಾವನಾ ರಾವ್‌ ಅವರ ಟಪ್ಪಾಂಗುಚ್ಚಿ ಹಾಡಿನ ಚಿತ್ರೀಕರಣ ಮುಗಿಸುವ ಮೂಲಕ, “ಟೈಗರ್‌ ಗಲ್ಲಿ’ ಚಿತ್ರದ ಚಿತ್ರೀಕರಣ ಅಂತ್ಯವಾಗಿದೆ.

ಸತೀಶ್‌ ಇದುವರೆಗೂ ಹಲವು ಹಾಡುಗಳಿಗೆ ಸ್ಟೆಪ್‌ ಹಾಕಿದ್ದಾರೆ. ಆದರೆ, ಟಪ್ಪಾಂಗುಚ್ಚಿ ಹಾಡೊಂದಕ್ಕೆ ಅವರು ಕುಣಿದಿರುವುದು ಇದೇ ಮೊದಲು.  ಈ ಮೂಲಕ ತಮ್ಮ ಬಹಳ ದಿನಗಳ ಆಸೆಯೊಂದನ್ನು ಈಡೇರಿಸಿಕೊಂಡಿದ್ದಾರೆ ಸತೀಶ್‌. “ಟೈಗರ್‌ ಗಲ್ಲಿ’ ಎಂಬ ಹೆಸರೇ ಹೇಳುವಂತೆ ಒಂದು ಪಕ್ಕಾ ಆ್ಯಕ್ಷನ್‌ ಸಿನಿಮಾ.

ಈ ಚಿತ್ರದಲ್ಲಿ ಸತೀಶ್‌ ಮೊದಲ ಬಾರಿಗೆ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ಚಿತ್ರವನ್ನು ರವಿ ಶ್ರೀವತ್ಸ ನಿರ್ದೇಶಿಸಿದ್ದು, ಅವರೇ ಚಿತ್ರಕ್ಕೆ ಕಥೆ-ಚಿತ್ರಕಥೆ-ಸಂಭಾಷಣೆಯನ್ನು ರಚಿಸಿದ್ದಾರೆ. ಈ ಹಿಂದೆ ಸತೀಶ್‌ ನೀನಾಸಂ ಅವರನ್ನು “ಮಾದೇಶ’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪರಿಚಯಿಸಿದ್ದು ಅದೇ ರವಿ ಶ್ರೀವತ್ಸ.

ಈಗ ಸತೀಶ್‌ ಅಭಿನಯದಲ್ಲಿ “ಟೈಗರ್‌ ಗಲ್ಲಿ’ ಮಾಡಿ ಮುಗಿಸಿದ್ದಾರೆ ರವಿ ಶ್ರೀವತ್ಸ. ಈ ಚಿತ್ರವನ್ನು ಎಂ.ಎನ್‌.ಕೆ. ಮೂವೀಸ್‌ನಡಿ ಎಂ.ಎನ್‌. ಕುಮಾರ್‌ ನಿರ್ಮಿಸಿದ್ದಾರೆ. “ಟೈಗರ್‌ ಗಲ್ಲಿ’ ಚಿತ್ರದಲ್ಲಿ “ಜಟ್ಟ’ ಗಿರಿರಾಜ್‌, ಶಿವಮಣಿ, ಅಯ್ಯಪ್ಪ ಪಿ. ಶರ್ಮ ಮುಂತಾದವರು ಅಭಿನಯಿಸಿದ್ದು, ಶ್ರೀಧರ್‌ ಸಂಭ್ರಮ್‌ ಅವರ ಸಂಗೀತ ಮತ್ತು ಮ್ಯಾಥ್ಯೂ ರಾಜನ್‌ ಅವರ ಛಾಯಾಗ್ರಹಣವಿದೆ.