“ದಿ ವಿಲನ್‌’ಚೇಸ್‌ಗೆ ಮೂರೂವರೆ ಕೋಟಿ ಖರ್ಚು!

ಶಿವರಾಜಕುಮಾರ್‌ ಮತ್ತು ಸುದೀಪ್‌ ಅಭಿನಯದ “ದಿ ವಿಲನ್‌’ ಚಿತ್ರ ಮತ್ತೂಮ್ಮೆ ಬ್ಯಾಂಕಾಕ್‌ನಲ್ಲಿ ಬೀಡುಬಿಟ್ಟಿದೆ. ಈ ಚಿತ್ರಕ್ಕೆ ನಿರ್ದೇಶಕ ಪ್ರೇಮ್‌ ಮತ್ತು ತಂಡ ಬ್ಯಾಂಕಾಕ್‌ಗೆ ಹೋಗುತ್ತಿರುವುದು ಇದು ಮೂರನೇ ಬಾರಿಗೆ. ಇದಕ್ಕೂ ಮುನ್ನ ಎರಡು ಬಾರಿ ಬ್ಯಾಂಕಾಕ್‌ನಲ್ಲಿ ಚಿತ್ರೀಕರಣ ನಡೆಸಿದ್ದ ಚಿತ್ರತಂಡವು, ಇದೀಗ ಬ್ಯಾಂಕಾಕ್‌ನಲ್ಲಿ ಭರ್ಜರಿ ಚೇಸ್‌ ದೃಶ್ಯವನ್ನು ಸೆರೆಹಿಡಿಯುವುದಕ್ಕೆ ಹೋಗಿದೆ.

ಈಗಾಗಲೇ ಈ ಚೇಸಿಂಗ್‌ ದೃಶ್ಯದಲ್ಲಿ ಭಾಗವಹಿಸುವುದಕ್ಕೆ ಶಿವರಾಜಕುಮಾರ್‌ ಮತ್ತು ಸುದೀಪ್‌ ಬ್ಯಾಂಕಾಕ್‌ಗೆ ತೆರಳಿದ್ದು, ಇಂದು ಬೆಳಿಗ್ಗೆ ಚಿತ್ರೀಕರಣ ಪ್ರಾರಂಭವಾಗಲಿದೆ. ಇದೊಂದೇ ಚೇಸಿಂಗ್‌ ದೃಶ್ಯಕ್ಕೆ ಮೂರೂವರೆ ಕೋಟಿ ರೂಪಾಯಿ ಖರ್ಚಾಗಲಿದೆ ಎಂದು ಚಿತ್ರತಂಡ ಹೇಳಿಕೊಂಡಿದೆ.

ಈ ಚೇಸಿಂಗ್‌ನಲ್ಲಿ ಶಿವರಾಜಕುಮಾರ್‌, ಸುದೀಪ್‌, ತಿಲಕ್‌ ಮುಂತಾದವರು ಭಾಗವಹಿಸಲಿದ್ದಾರೆ.  ಮಾಸ್‌ ಮಾದ ಅವರ ಸಾಹಸ ನಿರ್ದೇಶನದಲ್ಲಿ ಮೂಡಿ ಬರಲಿರುವ ಈ ದೃಶ್ಯದಲ್ಲಿ ಬ್ಯಾಂಕಾಕ್‌ನ ಸ್ಟಂಟ್‌ಮ್ಯಾನ್‌ಗಳು ಭಾಗವಹಿಸಲಿದ್ದಾರೆ. “ದಿ ವಿಲನ್‌’ ಆ್ಯಮಿ ಜಾಕ್ಸನ್‌ ನಟಿಸಿದ್ದು, ಈ ಚಿತ್ರದ ಮೂಲಕ ಅವರು ಕನ್ನಡಕ್ಕೆ ಬರುತ್ತಿದ್ದಾರೆ.

ಜೊತೆಗೆ ಶ್ರುತಿ ಹರಿಹರನ್‌, ಶ್ರೀಕಾಂತ್‌, ಹಿಂದಿ ನಟ ಮಿಥುನ್‌ ಚಕ್ರವರ್ತಿ ಸೇರಿದಂತೆ ಹಲವರು ಅಭಿನಯಿಸುತ್ತಿದ್ದಾರೆ. ತನ್ವಿ ಫಿಲಂಸ್‌ ಬ್ಯಾನರ್‌ನಡಿ ಈ ಚಿತ್ರವನ್ನು ಸಿ.ಆರ್‌. ಮನೋಹರ್‌ ನಿರ್ಮಿಸುತ್ತಿದ್ದು, ಅರ್ಜುನ್‌ ಜನ್ಯ ಅವರ ಸಂಗೀತ ಮತ್ತು ಗಿರೀಶ್‌ ಗೌಡ ಅವರ ಛಾಯಾಗ್ರಹಣವಿದೆ.