ಇದು ಒಂದು ಗಂಟೆಯ ಕಥೆ

ನೈಜ ಘಟನೆಯೊಂದರ ಸ್ಫೂರ್ತಿ ಪಡೆದು ತಯಾರಾದ, ಕಾಮಿಡಿ ಕಥಾಹಂದರ ಹೊಂದಿರುವ “ಒಂದು ಗಂಟೆಯ ಕಥೆ’ ತೆರೆಗೆ ಬರೋದಕ್ಕೆ ಸಿದ್ಧವಾಗುತ್ತಿದೆ. ಸದ್ಯ ಪೋಸ್ಟ್‌ ಪ್ರೊಡಕ್ಷನ್‌ ಅಂತಿಮ ಹಂತದಲ್ಲಿರುವ “ಒಂದು ಗಂಟೆಯ ಕಥೆ’ ಚಿತ್ರದ ಟ್ರೇಲರ್‌ ಅನ್ನು ಇತ್ತೀಚೆಗೆ ನಟ ದುನಿಯಾ ವಿಜಯ್‌ ಬಿಡುಗಡೆಗೊಳಿಸಿದರು.

ಅಜಯ್‌ ರಾಜ್‌, ಶನಾಯ ಕಾಟೆ, ಸ್ವಾತಿ ಶರ್ಮ, ಚಿದಾನಂದ್‌, ಪ್ರಶಾಂತ್‌ ಸಿದ್ಧಿ, ಚಂದ್ರಕಲಾ, ಯಶವಂತ ಸರದೇಶಪಾಂಡೆ, ನಾಗೇಂದ್ರ ಶಾ, ಮಿಮಿಕ್ರಿ ಗೋಪಿ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿರುವ “ಒಂದು ಗಂಟೆಯ ಕಥೆ’ ಚಿತ್ರದಲ್ಲಿ ಬರೋಬ್ಬರಿ 130ಕ್ಕೂ ಹೆಚ್ಚು ಕಲಾವಿದರು ವಿವಿಧ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಈ ಹಿಂದೆ “ಮತ್ತೆ ಮುಂಗಾರು’ ಚಿತ್ರವನ್ನು ನಿರ್ದೇಶಿಸಿದ್ದ ದ್ವಾರಕಿ ರಾಘವ್‌ ಈ ಚಿತ್ರಕ್ಕೆ ಚಿತ್ರಕಥೆ, ಸಾಹಿತ್ಯ ಬರೆದು ನಿರ್ದೇಶನ ಮಾಡಿದ್ದಾರೆ. ಕೇರಳ, ಆಂಧ್ರ, ಮಡಿಕೇರಿ, ಬೆಂಗಳೂರು ಸುತ್ತಮುತ್ತ “ಒಂದು ಗಂಟೆಯ ಕಥೆ’ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಈ ಹಿಂದೆ “ಪ್ರೇಮಿ ನಂಬರ್‌ ಒನ್‌’, “ಕರಾವಳಿ ಹುಡುಗಿ’, “ಮಿಸ್ಟರ್‌ ಡೂಪ್ಲಿಕೇಟ್‌’ ಚಿತ್ರಗಳನ್ನು ನಿರ್ಮಿಸಿದ್ದ ಕಶ್ಯಪ್‌ ದಾಕೋಜು “ರಿಯಲ್‌ ವೆಲ್ತ್‌ ವೆಂಚರ್‌’ ಬ್ಯಾನರ್‌ನಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದಾರೆ.

ಚಿತ್ರದ ಹಾಡುಗಳಿಗೆ ಡೆನ್ನಿಸ್‌ ವಲ್ಲಭವ್‌ ಸಂಗೀತ ಸಂಯೋಜನೆಯಿದೆ. ಚಿತ್ರಕ್ಕೆ ಸೂರ್ಯಕಾಂತ್‌ ಛಾಯಾಗ್ರಹಣ, ಗಣೇಶ್‌ ಮಲ್ಲಯ್ಯ ಸಂಕಲನವಿದೆ. ಎಲ್ಲ ಅಂದುಕೊಂಡಂತೆ ನಡೆದರೆ, ಫೆಬ್ರವರಿ ಅಂತ್ಯ ಅಥವಾ ಮಾರ್ಚ್‌ ವೇಳೆಗೆ “ಒಂದು ಗಂಟೆಯ ಕಥೆ’ ತೆರೆಗೆ ಬರುವ ಸಾಧ್ಯತೆ ಇದೆ.