ಲೂಸಿಫ‌ರ್‌ ಚಿತ್ರದ ಪ್ರೇರಣೆಯಿಂದ ಮಿನಿ ಜೀಪ್‌ ಆವಿಷ್ಕಾರ

ಕೊಚ್ಚಿ: ಮಲಯಾಳಂ ತಾರೆ ಮೋಹನ್‌ಲಾಲ್‌ ನಟನೆಯ ‘ಲೂಸಿಫ‌ರ್‌’ ಚಿತ್ರದಲ್ಲಿ ಎಸ್‌ಯುವಿ ಜೀಪ್‌ ಒಂದು ಆಕರ್ಷಣೆ ಹುಟ್ಟಿಸಿತ್ತು. ಈ ವಾಹನದ ಪ್ರೇರಣೆ ಪಡೆದು ಕೇರಳ ಮೂಲದ ಅರುಣ್‌ಕುಮಾರ್‌ ಎಂಬಾತ ವಿಲ್ಲೀಸ್‌ ಜೀಪ್‌ನ ಕಿರುಮಾದರಿ ಸಿದ್ಧಪಡಿಸಿದ್ದಾರೆ.

ಕೇವಲ 7 ತಿಂಗಳಿನಲ್ಲಿ ಈ ಮಿನಿ ಜೀಪ್‌ ತಯಾರುಗೊಂಡಿದ್ದು, ಕೊಲ್ಲಂನ ಅಂಚಲ್‌ ಪಟ್ಟಣದ 10 ವರ್ಷದ ಬಾಲಕನಿಗೆ ಇದನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಜೀಪ್‌ನ ಒಟ್ಟು ತೂಕ ಕೇವಲ 70 ಕಿಲೋ! ಇದರ ದುಪ್ಪಟ್ಟು ತೂಕದ ವಸ್ತುಗಳನ್ನು ಜೀಪ್‌ ಹೊರಬಲ್ಲದು. ರಾಯಲ್‌ ಎನ್‌ಫೀಲ್ಡ್‌ನ ಕೆಲವು ಬಿಡಿಭಾಗಗಳನ್ನು ನಿರ್ಮಾಣಕ್ಕೆ ಬಳಸಿಕೊಳ್ಳಲಾಗಿದೆ.

24ವಿ ಡಿಸಿ ಬ್ಯಾಟರಿಗಳಿಂದ ಎಲೆಕ್ಟ್ರಿಕ್‌ ಮೋಟಾರ್‌ ಚಾರ್ಜ್‌ಗೊಳ್ಳುತ್ತದೆ. ಜೀಪ್‌ನಲ್ಲಿದ್ದಂತೆ ಇಂಟೀರಿಯರ್‌ ಲೈಟ್‌, ಫಾಗ್‌ ಲ್ಯಾಂಪ್ಸ್‌, ಇಂಡಿಕೇಟರ್‌, ವೈಪರ್, ಹಾರ್ನ್, ಯುಎಸ್‌ಬಿ ಮೊಬೈಲ್‌ ಚಾರ್ಜರ್‌- ಮುಂತಾದ ವ್ಯವಸ್ಥೆ­ಗಳಿವೆ. ಜೀಪ್‌ನ ರೂಫ್ ಅನ್ನು ಎಸ್‌ಯುವಿಯಂತೆ ಮಡಚಬಹುದಾಗಿದೆ. ಮಾಮೂಲಿ ಜೀಪ್‌ನಂತೆ ಓಡಾಡುವ ಆಟಿಕೆ ರೂಪದ ಈ ಕುಳ್ಳನೆಯ ಜೀಪ್‌ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.