Uttar Pradesh;ಬಹುದೊಡ್ಡ ಹಗರಣ ಬಯಲಿಗೆ- ಒಬ್ಬ ವೈದ್ಯನ ಹೆಸರಲ್ಲೇ 83 ಆಸ್ಪತ್ರೆ ನೋಂದಣಿ!

ಆಗ್ರಾ(ಉತ್ತರಪ್ರದೇಶ): ಆಸ್ಪತ್ರೆ ಹಾಗೂ ಕ್ಲಿನಿಕ್ಸ್‌ ಗಳ ಪರವಾನಿಗೆ ನವೀಕರಣ ಅರ್ಜಿಗಳ ಪರಿಶೀಲನೆ ಸಂದರ್ಭದಲ್ಲಿ ದೊಡ್ಡ ಹಗರಣವೊಂದು ಉತ್ತರಪ್ರದೇಶದ ಆಗ್ರಾದಲ್ಲಿ ಬೆಳಕಿಗೆ ಬಂದಿರುವುದಾಗಿ ವರದಿ ತಿಳಿಸಿದೆ.

ಇದನ್ನೂ ಓದಿ:Seer Arrested: ಆಶ್ರಮದಲ್ಲಿ ಅಪ್ರಾಪ್ತ ಬಾಲಕಿ ಮೇಲೆ ದೈಹಿಕ ದೌರ್ಜನ್ಯ; ಸ್ವಾಮೀಜಿ ಬಂಧನ

ಆಗ್ರಾ ಮತ್ತು ಸಮೀಪದ ಜಿಲ್ಲೆಗಳಲ್ಲಿ ಸುಮಾರು 15 ವೈದ್ಯರು ಕಾನೂನು ಬಾಹಿರವಾಗಿ 449 ಕ್ಲಿನಿಕ್ಸ್‌ ಗಳಲ್ಲಿ ಪೂರ್ಣಕಾಲಿಕ ವೈದ್ಯರಾಗಿ ಕಾರ್ಯನಿರ್ವಹಿಸುತ್ತಿರುವುದು ಪತ್ತೆಯಾಗಿದೆ.

ಅದೇ ರೀತಿ ಅವರಲ್ಲೊಬ್ಬ ವೈದ್ಯ ಮೀರತ್‌, ಕಾನ್ಪುರ್‌ ಹಾಗೂ ಪಶ್ಚಿಮ ಉತ್ತರಪ್ರದೇಶದ ವಿವಿಧ ಜಿಲ್ಲೆಗಳಲ್ಲಿ ಸುಮಾರು 83 ಆಸ್ಪತ್ರೆಗಳನ್ನು ತನ್ನ ಹೆಸರಿನಲ್ಲಿ ನೋಂದಾಯಿಸಿಕೊಂಡಿರುವುದು ಪರವಾನಿಗೆ ನವೀಕರಣ ಅರ್ಜಿಗಳ ಪರಿಶೀಲನೆ ವೇಳೆ ಬೆಳಕಿಗೆ ಬಂದಿದೆ ಎಂದು ವರದಿ ವಿವರಿಸಿದೆ.

ಕಾನುನು ಬಾಹಿರ ನಡವಳಿಕೆ ತೋರಿದ ಈ ವೈದ್ಯರುಗಳಿಗೆ ನೋಟಿಸ್‌ ಜಾರಿಗೊಳಿಸಿ, ತನಿಖೆ ನಡೆಸಲಾಗುತ್ತಿದೆ ಎಂದು ಮುಖ್ಯ ವೈದ್ಯಾಧಿಕಾರಿ ಅರುಣ್‌ ಕುಮಾರ್‌ ಶ್ರೀವಾಸ್ತವ್‌ ತಿಳಿಸಿದ್ದಾರೆ.

ಮೂಲಗಳ ಪ್ರಕಾರ, ವೃತ್ತಿಪರ ವೈದ್ಯರಲ್ಲದ ಜನರು ಆಸ್ಪತ್ರೆ, ಕ್ಲಿನಿಕ್‌ ಮತ್ತು ಪೆಥಾಲಜಿ ಪ್ರಯೋಗಾಲಯ ನಡೆಸಲು ಆರೋಗ್ಯ ಇಲಾಖೆಯಿಂದ ವೈದ್ಯರ ಹೆಸರಿನಲ್ಲಿ ಪರವಾನಿಗೆ ಪಡೆಯುತ್ತಾರೆ ಎಂದು ತಿಳಿಸಿದೆ.

ಆಸ್ಪತ್ರೆ, ಕ್ಲಿನಿಕ್‌ ಗಳ ಲೈಸೆನ್ಸ್‌ ನವೀಕರಣ ಪ್ರಕ್ರಿಯೆಯನ್ನು ಆನ್‌ ಲೈನ್ ಮೂಲಕವೇ ನಡೆಸಬೇಕೆಂದು ಉತ್ತರಪ್ರದೇಶ ಸರ್ಕಾರ ಕಡ್ಡಾಯಗೊಳಿಸಿ ಆದೇಶ ಹೊರಡಿಸಿದ್ದ ನಂತರ ಈ ಹಗರಣ ಬೆಳಕಿಗೆ ಬಂದಿರುವುದಾಗಿ ವರದಿ ತಿಳಿಸಿದೆ.

ಆರೋಗ್ಯ ಇಲಾಖೆಯ ದಾಖಲೆಗಳ ಪ್ರಕಾರ, 2022-2023ರ ಸಾಲಿನಲ್ಲಿ 1,269 ಮೆಡಿಕಲ್‌ ಸೆಂಟರ್ಸ್‌ ಗಳು ರಿಜಿಸ್ಟರ್ಡ್‌ ಆಗಿತ್ತು. ಇದರಲ್ಲಿ 494 ಆಸ್ಪತ್ರೆಗಳು, 493 ಕ್ಲಿನಿಕ್ಸ್‌, 170 ಪೆಥಾಲಜಿ ಲ್ಯಾಬ್ಸ್‌, 104 ಡಯಾಗ್ನೋಸ್ಟಿಕ್ಸ್‌ ಸೆಂಟರ್ಸ್‌ ಹಾಗೂ ಒಂದು ಡಯಾಲಿಸಿಸ್‌ ಸೆಂಟರ್‌ ಸೇರಿದೆ.

2023-2024ರ ಸಾಲಿನ ಪರವಾನಿಗೆ ನವೀಕರಣ ಅರ್ಜಿಗಳ ಪರಿಶೀಲನೆ ನಂತರ ಈವರೆಗೆ 570 ಆಸ್ಪತ್ರೆ ಮತ್ತು ಕ್ಲಿನಿಕ್ಸ್‌ ಗಳ ಪರವಾನಿಗೆ ನವೀಕರಿಸಲಾಗಿದೆ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.