64ನೇ ಅಂತಸ್ತಲ್ಲಿ ಈಜುಕೊಳದ ಮನೆ

ಸಿಂಗಾಪುರ: ಕೈಯ್ಯಲ್ಲಿ ಕಾಂಚಾಣ ಕುಣಿಯುತ್ತಿದ್ದರೆ ಏನೇನೆಲ್ಲ ಮಾಡಬಹುದು ಎಂಬುದಕ್ಕೆ ಈ ಮನೆಯೇ ಸಾಕ್ಷಿ. ಸಿಂಗಾಪುರದ ವೈಭವೋಪೇತ ಸ್ಥಳದಲ್ಲಿರುವ ಈ ಮನೆ ಇರುವುದು 64ನೇ ಮಹಡಿಯಲ್ಲಿ. ಆದರೆ, ಇಲ್ಲೂ ಮಾಲಕರು ಈಜುಕೊಳವನ್ನು ತಂದಿದ್ದಾರೆ. ಅದು ಹೇಗೆ ಎಂದು ಕೇಳಬೇಡಿ. ಈ ಮನೆಯ ಬೆಲೆ ಬರೋಬ್ಬರಿ 464 ಕೋಟಿ ರೂ. ಗೊಕೋಲ್ಯಾಂಡ್‌ ಎಂಬ ರಿಯಲ್‌ ಎಸ್ಟೇಟ್‌ ಕಂಪೆನಿ ಇದನ್ನು ಅಭಿವೃದ್ಧಿಪಡಿಸಿದೆ. ಮನೆಯ ಮಾಲೀಕನ ಆಸೆಯ ಮೇರೆಗೆ 64ನೇ ಮಹಡಿಯಲ್ಲೂ ಸ್ವಿಮ್ಮಿಂಗ್‌ ಪೂಲ್‌ ನಿರ್ಮಿಸಿಕೊಡಲಾಗಿದೆ. ಇದು ಸಿಂಗಾಪುರದ ಅತ್ಯಂತ ದುಬಾರಿ ಅಪಾರ್ಟ್‌ಮೆಂಟ್‌ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಲಿದೆ. ಇದರ ನಿರ್ಮಾಣದಿಂದ ಸಿಂಗಾಪುರದಲ್ಲಿ ರಿಯಲ್‌ ಎಸ್ಟೇಟ್‌ ವಹಿವಾಟು ಚುರುಕಾಗಲಿದೆ ಎನ್ನುವುದು ಅಲ್ಲಿನ ತಜ್ಞರ ಪ್ರತಿಪಾದನೆ. ದಕ್ಷಿಣ ಏಷ್ಯಾ ಮತ್ತು ಚೀನದವರು ಹೆಚ್ಚಿನ ಪ್ರಮಾಣದಲ್ಲಿ ಇಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ. 

ಜಾಗತಿಕ ರಿಯಲ್‌ ಎಸ್ಟೇಟ್‌ ಕನ್ಸಲ್ಟೆನ್ಸಿ ಕಂಪೆನಿ ಜೋನ್ಸ್‌ ಲ್ಯಾಂಗ್‌ ಲಾಸಲ್ಲೆ (ಜೆಎಲ್‌ಎಲ್‌) ನೀಡಿದ ವರದಿ ಪ್ರಕಾರ, ಲಕ್ಸುರಿ ಅಪಾರ್ಟ್‌ಮೆಂಟ್‌ ಮಾರಾಟದಲ್ಲಿ ಶೇ.3-5ರಷ್ಟು ಏರಿಕೆಯಾಗಲಿದೆ. ಕಂಪೆನಿಯ ಮ್ಯಾನೇಜಿಂಗ್‌ ಡೈರೆಕ್ಟರ್‌, ಈ ಅದ್ದೂರಿ ಅಪಾರ್ಟ್‌ಮೆಂಟ್‌ ನಿರ್ಮಾಣವಾಗುತ್ತಿರುವ ಬಳಿಕ ಹೆಚ್ಚಿನ ವಿಚಾರಣೆ ಆರಂಭವಾಗಿದೆ ಎಂದು ಹೇಳಿದ್ದಾರೆ.