Thirthahalli: ಡಿಜೆ ಶಬ್ದಕ್ಕೆ ವೃದ್ಧ ದುರ್ಮರಣ

ತೀರ್ಥಹಳ್ಳಿ: ಗಣೇಶೋತ್ಸವ ಮೆರವಣಿಗೆಯಲ್ಲಿ ಡಿಜೆ ಶಬ್ದಕ್ಕೆ ಹೆಜ್ಜೆ ಹಾಕುತ್ತಿದ್ದ ವೃದ್ಧನೊಬ್ಬ ಸ್ಥಳದಲ್ಲೇ ಕುಸಿದು ಮೃತಪಟ್ಟ ಘಟನೆ ಪಟ್ಟಣದಲ್ಲಿ ಭಾನುವಾರ ರಾತ್ರಿ ನಡೆದಿದೆ.

ಬಿದರಹಳ್ಳಿ ಗ್ರಾಮದ ಇ.ಎಸ್‌.ಶ್ಯಾಮಣ್ಣ (66) ಮೃತಪಟ್ಟವರು. ಪಟ್ಟಣಲ್ಲಿ ನಡೆದ ವಿವಿಧ ಗಣೇಶೋತ್ಸವ ಮೆರವಣಿಗೆಯಲ್ಲಿ ಭಾರೀ ಪ್ರಮಾಣದ ಧ್ವನಿ ಹೊಂದಿರುವ ಡಿಜೆ ಬಳಕೆಯಾಗಿದ್ದು ಡಿಜೆಗೆ ತಕ್ಕಂತೆ ಯುವಕರನ್ನು ರಂಜಿಸುವ ಉದ್ದೇಶದಿಂದ ಲೇಸರ್‌ ಲೈಟ್‌, ವಿವಿಧ ರೀತಿಯ ಬೆಳಕುಗಳನ್ನು ಬಳಕೆ ಮಾಡಿದ್ದರಿಂದ ಡ್ರೋಣ್‌, ಡಿಎಸ್‌ಎಲ್‌ಆರ್‌ ಕ್ಯಾಮೆರಾ, 150ಕ್ಕೂ ಹೆಚ್ಚು ಮೊಬೈಲ್‌ ಕ್ಯಾಮೆರಾಗಳ ಲೆನ್ಸ್‌, ಡಿಸ್‌ಪ್ಲೇ ಹಾಳಾಗಿವೆ.

ಆಜಾದ್‌ ರಸ್ತೆಯ ಡಿವೈಡರ್‌ ಮೇಲಿನ ಮರದಲ್ಲಿದ್ದ ಗುಬ್ಬಚ್ಚಿ, ಪಕ್ಷಿಗಳು ಹೃದಯಾಘಾತಕ್ಕೆ ಒಳಗಾಗಿ ಮೃತಪಟ್ಟಿವೆ. ಕೆಲವು ಪಕ್ಷಿಗಳು ಹಾರಿ ಹೋಗಿವೆ. ಕೆಲವು ಅಂಗಡಿ-ಮಳಿಗೆಗಳ ವಸ್ತುಗಳು ಅಲ್ಲಾಡಿವೆ. ಔಷಧ ಮಳಿಗೆಗಳಲ್ಲಿ ಇಟ್ಟಿದ್ದ ಗಾಜಿನ ಬಾಟಿಲಿ, ವಿವಿಧ ರೀತಿಯ ವಸ್ತುಗಳು ಕೆಳಗೆ ಬಿದ್ದು ಹಾಳಾಗಿವೆ. ತೀರ್ಥಹಳ್ಳಿ ಪಟ್ಟಣದಲ್ಲಿ ವಾಸಿಸುವ ಅನೇಕರ ಮನೆಯ ಒಳಗೆ ಅಲುಗಾಡಿದಂತಹ ಅನುಭವ ಆಗಿದೆ. ಆದರೆ, ಈ ಕುರಿತು ದೂರು ದಾಖಲಾಗಿಲ್ಲ.