ಧಾರ್ಮಿಕ ಭಾವನೆಗೆ ಧಕ್ಕೆ: ಬಾಲಿವುಡ್ ನಟಿ ರವೀನಾ ವಿರುದ್ಧ ವಾರದಲ್ಲಿ ಮೂರು ಕೇಸ್ ದಾಖಲು!

ಪಂಜಾಬ್(ಫೆರೋಜ್ ಪುರ್): ಟಿವಿ ಕಾರ್ಯಕ್ರಮವೊಂದರಲ್ಲಿ ಧಾರ್ಮಿಕ ಭಾವನೆಗೆ ಧಕ್ಕೆ ತಂದ ಆರೋಪದಡಿ ಬಾಲಿವುಡ್ ನಟಿ ರವೀನಾ ಟಂಡನ್, ನಿರ್ದೇಶಕಿ, ಕೋರಿಯೋಗ್ರಾಫರ್ ಫರಾಹ್ ಖಾನ್ ಮತ್ತು ಕಾಮಿಡಿಯನ್ ಭಾರ್ತಿ ಸಿಂಗ್ ವಿರುದ್ಧ ಒಂದು ವಾರದೊಳಗೆ ಪಂಜಾಬ್ ನಲ್ಲಿ ಮೂರು ಪ್ರಕರಣಗಳು ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಭಾರತೀಯ ದಂಡ ಸಂಹಿತೆ 295-ಎ ಅನ್ವಯ ಯಾವುದೇ ವಿಧದ ಧಾರ್ಮಿಕ ಅಥವಾ ಧಾರ್ಮಿಕ ನಂಬಿಕೆ ಕುರಿತ ಭಾವನೆಗಳಿಗೆ ಧಕ್ಕೆ ತರುವುದು ಅಪರಾಧ. ಈ ಹಿನ್ನೆಲೆಯಲ್ಲಿ ಮೂವರು ಸೆಲೆಬ್ರಿಟಿಗಳ ವಿರುದ್ಧ ಕಾಂಬೋಜ್ ನಗರದ ನಿವಾಸಿ ನೀಡಿದ ದೂರಿನ ಅನ್ವಯ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಫೆರೋಜ್ ಪುರ್ ಎಸ್ ಎಸ್ ಪಿ ವಿವೇಕ್ ಶೀಲ್ ಸೋನಿ ತಿಳಿಸಿದ್ದಾರೆ.

ಕ್ರಿಶ್ಚಿಯನ್ ಸಮುದಾಯದ ಧಾರ್ಮಿಕ ಭಾವನೆಗೆ ಧಕ್ಕೆ ತಂದಿರುವುದಾಗಿ ಆರೋಪಿಸಿ ದೂರು ನೀಡಲಾಗಿತ್ತು. ಬುಧವಾರ ಇದೇ ಪ್ರಕರಣದಲ್ಲಿ ಅಮೃತ್ ಸರ್ ಪೊಲೀಸರು ರವೀನಾ, ಫರಾಹ್ ಖಾನ್ ಮತ್ತು ಭಾರ್ತಿ ವಿರುದ್ಧ ಪ್ರಕರಣ ದಾಖಲಿಸಿದ್ದರು. ಮೂವರು ನಟರ ವಿರುದ್ಧ ಪಂಜಾಬ್ ನಲ್ಲಿ ಕ್ರಿಶ್ಚಿಯನ್ ಸಮುದಾಯ ಪ್ರತಿಭಟನೆ ನಡೆಸಿತ್ತು.

ನಾನು ಎಲ್ಲಾ ಧರ್ಮವನ್ನು ಗೌರವಿಸುತ್ತೇನೆ. ಯಾವುದೇ ಉದ್ದೇಶದಿಂದ ನಾನು ಯಾವತ್ತೂ ಯಾವ ಧರ್ಮವನ್ನು ಅಗೌರವಾಗಿ ಕಂಡಿಲ್ಲ. ನಮ್ಮ ತಂಡವೂ ಹಾಗೇ ಭಾವಿಸಿಲ್ಲ. ಈ ಬಗ್ಗೆ ನಾವು ಕ್ಷಮೆಯಾಚಿಸುವುದಾಗಿ ಫರಾಹ್ ಖಾನ್ ಶುಕ್ರವಾರ ಟ್ವೀಟ್ ಮಾಡಿದ್ದರು. ನಟಿ ರವೀನಾ ಟಂಡನ್ ಕೂಡಾ ಟ್ವೀಟ್ ಮಾಡಿ ಕ್ಷಮೆಯಾಚಿಸಿದ್ದರು.