ಬಳ್ಕೂರು ತೆಂಕುಬದಿಯ 10 ಮನೆಗಳಿಗೆ ಕುಡಿಯುವ ನೀರಿಲ್ಲ

ಬಸ್ರೂರು: ಬಳ್ಕೂರು ಗ್ರಾಮದ ಮೇಲ್ಬೆಟ್ಟಿನ ತೆಂಕುಬದಿಯ 2ನೇ ವಾರ್ಡಿನ ಸುಮಾರು 10 ಮನೆಗಳಿಗೆ ಪ್ರಸ್ತುತ ಕುಡಿಯುವ ನೀರಿಲ್ಲದೇ ಪರದಾಡುವಂತಾಗಿದೆ. ಬಾವಿಗಳು ಬಿಸಿಲಿಗೆ ಬತ್ತಿ ಹೋಗಿದ್ದು, ಹನಿ ನೀರಿಗೂ ಪರದಾಡುವ ಸ್ಥಿತಿ ಬಂದೊದಗಿದೆ.

ಗ್ರಾ.ಪಂ. ವತಿಯಿಂದ ಈ ಭಾಗಕ್ಕೆ ನಳ್ಳಿ ಸಂಪರ್ಕವನ್ನು ಮಾಡಿಲ್ಲ. ಈ ಕಾರಣದಿಂದ ಇಲ್ಲಿನ ಮನೆಯವರು ಕುಡಿಯುವ ನೀರನ್ನು 1,000 ಲೀ. ಗೆ 600 ರೂ. ಕೊಟ್ಟು ಪಡೆಯುತ್ತಿದ್ದಾರೆ.

ಈ ಬಗ್ಗೆ ಗ್ರಾ.ಪಂ.ನ್ನು ಕೇಳಿದರೆ ತತ್‌ಕ್ಷಣ ಪರ್ಯಾಯ ವ್ಯವಸ್ಥೆ ಮಾಡುವುದಾಗಿ ಹೇಳುತ್ತಾರೆ. ಆದರೆ ಈ ವರೆಗೆ ಯಾವುದೇ ಕ್ರಮ ಕೈಗೊಂಡಿಲ್ಲ.

ಆದ್ದರಿಂದ ಸ್ಥಳೀಯಾಡಳಿತ ತತ್‌ಕ್ಷಣ ಇಲ್ಲಿನ ಜನತೆಗೆ ಕುಡಿಯುವ ನೀರಿನ ವ್ಯವಸ್ಥೆ ಮಾಡಬೇಕೆಂದು ಜನರು ಆಗ್ರಹಿಸಿದ್ದಾರೆ.