ಪ್ರೀತಿಯ ಗುಲಾಬಿ ಅರಳಲೇ ಇಲ್ಲ!

ಪತ್ರಿಕೆ ಹಂಚುವ ಕೆಲಸ ಮಾಡಿಕೊಂಡೇ ನಾನು ಕಾಲೇಜು ಓದುತ್ತಿದ್ದೆ. ಆ ಸಮಯದಲ್ಲಿ ನಾನು ಪತ್ರಿಕೆ ಹಂಚುತ್ತಿದ್ದ ಮನೆಗಳಲ್ಲಿ ನನ್ನ ಹೃದಯ ಗೆದ್ದ ದೇವಕನ್ಯೆಯ ಮನೆಯೂ ಒಂದು. ಅವಳ ಮೊದಲ ನೋಟಕ್ಕೇ ಬೌಲ್ಡ್‌ ಆಗಿಬಿಟ್ಟಿದ್ದೆ. ಫ‌ಳಫ‌ಳನೆ ಹೊಳೆಯುವ ಅವಳ ಕಣ್ಣುಗಳು ನನ್ನ ಹೃದಯದಲ್ಲಿ ಪ್ರೀತಿಯ ಬೀಜವನ್ನು ನೆಟ್ಟವು. ಎಷ್ಟೋ ಬಾರಿ ಅವಳ ಗುಂಗಿನಲ್ಲಿ ಕೆಲವು ಮನೆಗಳಿಗೆ ಪತ್ರಿಕೆ ಹಾಕದೆ ಹೋಗಿರುವುದೂ ಉಂಟು.

ಅವಳು ಕೂಡ ನನ್ನಂತೆಯೇ ಪ್ರಥಮ ಪಿಯುಸಿ. ಆದರೆ ಕಾಲೇಜು ಬೇರೆ ಬೇರೆ ಆಗಿದ್ದವು. ದಿನಾಲು ಕಾಲೇಜಿಗೆ ಚಕ್ಕರ್‌ ಹಾಕಿ ಅವಳನ್ನು ನೋಡಲು ಅವಳ ಕಾಲೇಜಿಗೆ ಓಡುವುದೇ ನನ್ನ ಕಾಯಕವಾಗಿತ್ತು. ನನ್ನ ಮನಸ್ಸಿನಲ್ಲಿದ್ದುದನ್ನು ಅವಳಲ್ಲಿ ಹೇಳಿಕೊಳ್ಳಲು ಅವಳ ಕ್ಲಾಸಿನ ಹುಡುಗರನ್ನು ಪರಿಚಯಿಸಿಕೊಂಡು ಅವರ ಜೊತೆ ಸೇರಿ, ಅವಳ ಹಿಂದೆ ಸುತ್ತುತ್ತಿದ್ದೆ. ಹೀಗೆಯೇ ಅನೇಕ ದಿನಗಳು ಕಳೆದವು. ಇದನ್ನು ಗಮನಿಸಿದ ಸ್ನೇಹಿತರು ಬೈಯಲು ಆರಂಭಿಸಿದರು. ಕೊನೆಗೆ ಒಂದು ದಿನ ಧೈರ್ಯ ಮಾಡಿ ಅವಳ ಮುಂದೆ ನಿಂತು ಅಂಜುತ್ತಲೇ ಐ ಲವ್‌ ಯು ಅಂದುಬಿಟ್ಟೆ.  

ಅಷ್ಟು ಹೇಳುವಷ್ಟರಲ್ಲಿ ಬೆವೆತು ನೀರಾಗಿದ್ದೆ. ಅವಳ ಉತ್ತರದಿಂದ ನನ್ನ ಕೋಮಲವಾದ ಪ್ರೀತಿಗೆ ತಣ್ಣೀರು ಎರಚಿದಂತಾಯಿತು. “ನೀನೊಬ್ಬ ಪತ್ರಿಕೆ ಹಂಚುವವನು. ನಿನ್ನನ್ನು ಪ್ರೀತಸಬೇಕಾ?’ ಎಂಬ ಮಾತು ಕೇಳಿ ನನ್ನ ಹೃದಯ ಒಡೆದು ಹೋದಷ್ಟು ನೋವಾಯಿತು. ಪ್ರೀತಿಯ ಮಹತ್ವವನ್ನೇ ತಿಳಿಯದವಳಿಂದಾಗಿ ನಾನು ಕಟ್ಟಿದ ಪ್ರೀತಿಯ ಗೋಪುರ ಆ ಕ್ಷಣಕ್ಕೆ ನೆಲಕಚ್ಚಿ ಬಿದ್ದಿತು.

– ಲೋಕನಗೌಡ.ಎಸ್‌.ಡಿ., ಗದಗ