ದನದ ಜತೆ ಕೋಳಿ, ನಾಯಿಮರಿ ಕದ್ದೊಯ್ದ ದುರುಳರು!; ಕಾರ್ಕಳದಲ್ಲಿ ನಡೆದ ಘಟನೆ

ಕಾರ್ಕಳ: ನಗರದ ಹೊರವಲಯದ ಕರಿಯ ಕಲ್ಲು ಪಡ್ಡಾಯಿಬೆಟ್ಟು ನಿವಾಸಿ ಮೋಹಿನಿ ಮೂಲ್ಯ ಅವರ ಹಟ್ಟಿಯಿಂದ ಎ. 19ರ ರಾತ್ರಿ ಗೋ ಕಳ್ಳತನವಾಗಿದೆ. ಇತ್ತೀಚೆಗಷ್ಟೇ 25 ಸಾವಿರ ರೂ. ನೀಡಿ ಹಸು-ಕರು ಖರೀದಿಸಿ ತಂದಿದ್ದರು. ರಾತ್ರಿ ವೇಳೆ ಹಟ್ಟಿಗೆ ನುಗ್ಗಿದ ಕಳ್ಳರು ಕರುವನ್ನು ಬಿಟ್ಟು ದನವನ್ನು ಕದ್ದೊಯ್ದಿದ್ದಾರೆ.

ಮನೆಯ ಪಕ್ಕದಲ್ಲಿದ್ದ ಕೋಳಿ ಗೂಡಿನಿಂದ 6 ಕೋಳಿ, 2 ನಾಯಿ ಮರಿಗಳನ್ನು ಕೂಡ ಕಳ್ಳರು ಕದ್ದೊಯ್ದಿದ್ದಾರೆ ಎಂದು ಮನೆಯವರು ಮಾಹಿತಿ ನೀಡಿದ್ದು, ಇದು ಸಾಕಷ್ಟು ಸಂಶಯಕ್ಕೆ ಎಡೆ ಮಾಡಿಕೊಟ್ಟಿದೆ. ಮಾಂಸಕ್ಕಾಗಿ ಗೋವುಗಳನ್ನು ಕದ್ದೊಯ್ಯುವ ಪರಿಪಾಠ ಇದುವರೆಗೂ ನಡೆದಿತ್ತು. ಗೋಕಳ್ಳತನಕ್ಕೆ ಬಂದವರು ಈ ಬಾರಿ ಕೋಳಿ, ನಾಯಿ ಮರಿಗಳನ್ನು ಕದ್ದಿರುವುದು ಅಚ್ಚರಿ ಮೂಡಿಸಿದೆ.

ಇದನ್ನೂ ಓದಿ:ಫ್ರಾನ್ಸ್‌ನಲ್ಲೂ ಹಿಜಾಬ್‌, ಹಲಾಲ್‌ ನಿಷೇಧದ ಕೂಗು!

ಗುಜರಿ ವ್ಯಾಪಾರಿಗಳ ಮೇಲೆ ಸಂಶಯ: ಹಗಲಿನಲ್ಲಿ ಗುಜರಿ ಇನ್ನಿತರ ಸೊತ್ತುಗಳ ಮಾರಾಟ ನೆಪದಲ್ಲಿ ಬಂದವರೇ ಈ ಕೃತ್ಯ ನಡೆಸಿರುವುದು ಎನ್ನುವ ಸಂದೇಹವನ್ನು ಮೋಹಿನಿಯವರು ವ್ಯಕ್ತಪಡಿಸಿದ್ದಾರೆ. ಅವರ ಸಂದೇಹದ ಆಧಾರದಲ್ಲಿ ಪೊಲೀಸರು ತನಿಖೆ ಆರಂಭಿಸಿದ್ದು, ಘಟನೆ ಬೆನ್ನಲ್ಲೇ ಹಿಂದೂ ಸಂಘಟನೆಗಳು ನೀಡಿದ ಮಾಹಿತಿಯಂತೆ ಮೂಡುಬಿದಿರೆ ಬಳಿ ದ್ವಿಚಕ್ರ ವಾಹನ ಸಮೇತ ಓರ್ವ ಗುಜರಿ ವ್ಯಾಪಾರಿಯನ್ನು ವಶಕ್ಕೆ ಪಡೆದು ತನಿಖೆ ಆರಂಭಿಸಿದ್ದಾರೆ.