ಉಪ್ಪಿನಂಗಡಿ: ಇಲ್ಲಿನ 34ನೇ ನೆಕ್ಕಿಲಾಡಿ ಹಾಗೂ ಉಪ್ಪಿನಂಗಡಿ ಗ್ರಾಮದಲ್ಲಿ 6 ಅಂಗಡಿಗಳಿಗೆ ನುಗ್ಗಿದ ಕಳ್ಳನೋರ್ವ ನಗದು ಸೊತ್ತುಗಳನ್ನು ಕಳವುಗೈದಿದ್ದಾನೆ. ರೈನ್‌ಕೋಟ್‌ ಧರಿಸಿದ ಕಳ್ಳನೋರ್ವ ಈ ಕೃತ್ಯವನ್ನು ಎಸಗಿರುವುದು ಸಿಸಿಟಿವಿ ದೃಶ್ಯಾವಳಿಯಲ್ಲಿ ದೃಢಪಟ್ಟಿದೆ.
34ನೇ ನೆಕ್ಕಿಲಾಡಿಯ ಭಾರತ್‌ ಪೆಟ್ರೋಲ್‌ ಪಂಪ್‌, ಗ್ಯಾಸ್‌ ಫಿಲ್ಲಿಂಗ್‌ ಸೆಂಟರ್‌ ಮತ್ತು ಪಕ್ಕದ ಗೂಡಂಗಡಿಗೆ ನುಗ್ಗಿದ ಕಳ್ಳ ನಗದು, ಸೊತ್ತು ಕಳವು ಮಾಡಿದ್ದಾನೆ. ಅಲ್ಲಿಂದ ಉಪ್ಪಿನಂಗಡಿಯ ಗಾಂಧಿ ಪಾರ್ಕ್‌ ಬಳಿ ಟೈಲ್ಸ್‌, ಗುಜರಿ ಮತ್ತು ಹೊಟೇಲ್‌ಗೆ ನುಗ್ಗಿ ನಗದು, ಸೊತ್ತು ಕಳವು ಮಾಡಿದ್ದಾನೆ.
ಘಟನೆಗೆ ಸಂಬಂಧಿಸಿ ಅಂಗಡಿ ಮಾಲಕರು ಪೊಲೀಸ್‌ ಇಲಾಖೆಗೆ ಮಾಹಿತಿ ನೀಡಿದ್ದು, ಅಂಗಡಿ ಮಾಲಕರ ವಿನಂತಿಯ ಮೇರೆಗೆ ಪ್ರಕರಣ ದಾಖಲಾಗಿಲ್ಲ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.
