China: ಚೀನ ಔಷಧಗಳಲ್ಲಿ ಹುಲಿ, ರೈನೋ ಭಾಗಗಳ ಬಳಕೆ!

ನಾಗಪುರ: ಚೀನದಿಂದ ಬರುವ ವಿವಿಧ ರೀತಿಯ ಔಷಧಗಳಲ್ಲಿ  ಅವಸಾನದ ಅಂಚಿನಲ್ಲಿರುವ ಪ್ರಾಣಿಗಳ ಅಂಗಾಂಗಗಳನ್ನು ಬಳಕೆ ಮಾಡಲಾಗುತ್ತಿದೆ ಎಂಬ ಆಘಾತಕಾರಿ ಅಂಶ ಬಯಲಾಗಿದೆ.

ಲಂಡನ್‌ ಮೂಲದ ಪರಿಸರಾತ್ಮಕ ತನಿಖಾ ಸಂಸ್ಥೆ (ಇಐಎ) ಈ ಬಗ್ಗೆ ತನಿಖೆ ನಡೆಸಿದ್ದು, ವರದಿಯೊಂದನ್ನು ಬಿಡುಗಡೆ ಮಾಡಿದೆ. ಚೀನದ ಒಟ್ಟು 72 ಕಂಪೆನಿಗಳು 88 ವಿವಿಧ ಔಷಧಿಗಳನ್ನು ತಯಾರು ಮಾಡಿವೆ. ಈ ಕಂಪೆನಿಗಳಿಗೆ ಚೀನದ ರಾಷ್ಟ್ರೀಯ ವೈದ್ಯಕೀಯ ವಸ್ತುಗಳ ಸಂಸ್ಥೆ(ಎನ್‌ಎಂಪಿಎ) ಪರವಾನಿಗೆ ನೀಡಿದೆ. ಈ ಔಷಧಗಳಲ್ಲಿ ಹುಲಿ, ಚಿರತೆ ಮತ್ತು ಘೇಂಡಾ ಮೃಗಗಳ   ಅಂಗಾಂಶಗಳನ್ನು ಬಳಕೆ ಮಾಡಲಾಗಿದೆ ಎಂದು ಇಐಎ ತಿಳಿಸಿದೆ.

ವಿಚಿತ್ರವೆಂದರೆ ಈ ಪ್ರಾಣಿಗಳನ್ನು ಕನ್ವೆನ್ಶನ್‌ ಆನ್‌ ಇಂಟರ್‌ನ್ಯಾಶನಲ್‌ ಟ್ರೇಡ್‌ ಇನ್‌    ಎಂಡೇಂಜರ್ಡ್‌   ಸ್ಪೀಸೀಸ್‌ ಆಫ್ ವೈಲ್ಡ್‌ ಫೌನಾ ಆ್ಯಂಡ್‌ ಫೌರಾ (ಸಿಟೀಸ್‌)ದ ಪಟ್ಟಿ 1ರಲ್ಲಿ ಸೇರಿಸಲಾಗಿದೆ. ಅಂದರೆ ಇವುಗಳನ್ನು ಅಂತಾರಾಷ್ಟ್ರೀಯ  ವಾಣಿಜ್ಯ ವ್ಯಾಪಾರಕ್ಕಾಗಿ ನಿರ್ಬಂಧಿಸಲಾಗಿದೆ.

ಚೀನದ ಈ ಫಾರ್ಮಸುಟಿಕಲ್‌ ಕಂಪೆನಿಗಳಲ್ಲಿ 62 ಬ್ಯಾಂಕ್‌ಗಳು ಮತ್ತು ಹಣಕಾಸು ಸಂಸ್ಥೆಗಳು ಹೂಡಿಕೆ ಮಾಡಿವೆ. ಈ ಬ್ಯಾಂಕ್‌ ಮತ್ತು ಹಣಕಾಸು ಸಂಸ್ಥೆಗಳು ಆಸ್ಟ್ರೇಲಿಯಾ, ಕೆನಡಾ, ಐರೋಪ್ಯ  ಒಕ್ಕೂಟ, ಜಪಾನ್‌, ಸ್ವಿಟ್ಸ್‌ರ್ಲೆಂಡ್‌, ಇಂಗ್ಲೆಂಡ್‌ ಮತ್ತು ಅಮೆರಿಕದಲ್ಲಿ   ಮನೆಮಾತಾಗಿವೆ ಎಂದು ಟೈಮ್ಸ್‌ ಆಫ್ ಇಂಡಿಯಾ ವರದಿ ಮಾಡಿದೆ.

ಚೀನದ ಈ ಕಂಪೆನಿಗಳು ಹುಲಿ, ಚಿರತೆ, ಪಾಂಗೋಲಿನ್‌, ಘೇಂಡಾ ಮೃಗಗಳನ್ನು ಅಕ್ರಮವಾಗಿ ತರಿಸಿಕೊಳ್ಳಲಾಗುತ್ತಿದೆ. ಈ  ವಿಷಯದ  ಬಗ್ಗೆ ಚೀನ ಸರಕಾರ ಗಮನಹರಿಸಬೇಕಾಗಿದೆ ಎಂದು ಪರಿಸರವಾದಿಗಳು ಆಗ್ರಹಿಸಿದ್ದಾರೆ.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಾಣಿಗಳ ಕಳ್ಳಸಾಗಣೆ

2000ರಿಂದ 2023ರವರೆಗೆ ಜಗತ್ತಿನಾದ್ಯಂತ 6,585 ಚಿರತೆಗಳ  ದೇಹದ  ಅಂಗಗಳನ್ನು ವಶಪಡಿಸಿಕೊಳ್ಳಲಾಗಿದೆ. ವಶಪಡಿಸಿಕೊಂಡ ಚಿರತೆಗಳ   ಪೈಕಿ 6,428 ಏಷ್ಯಾದ ಬಿಗ್‌ ಕ್ಯಾಟ್‌ ರೇಂಜ್‌  ದೇಶಗಳಿಗೆ ಸೇರಿದವುಗಳಾಗಿವೆ. ಇದೇ ಅವಧಿಯಲ್ಲಿ 416 ಟನ್‌ ಪಾಂಗೋಲಿನ್‌ನ ಚಿಪ್ಪುಗಳು  ಮತ್ತು 10 ಟನ್‌ ಘೇಂಡಾಮೃಗಗಳ ಕೊಂಬುಗಳನ್ನು ವಶಕ್ಕೆ ಪಡೆಯಲಾಗಿದೆ. 2000ರಿಂದ  2023ರ ವರೆಗೆ 3,377 ಹುಲಿಗಳನ್ನು ಅಕ್ರಮವಾಗಿ ಸಾಗಾಟ ಮಾಡಲಾಗಿದೆ. 2016ರಿಂದ 2019ರ ವರೆಗೆ  6 ಲಕ್ಷ ಪಾಂಗೋಲಿನ್‌ಗಳನ್ನು ಸಾಗಾಟ ಮಾಡಲಾಗಿತ್ತು.