ವಿವಿ ಏಕರೂಪ ಕಾಯಿದೆ ಸಂಘರ್ಷಕ್ಕೆ ನಾಂದಿ: ಸದನದಲ್ಲಿ ಕೋಲಾಹಲ ನಿರೀಕ್ಷೆ

ವಿಧಾನಸಭೆ: ರಾಜ್ಯದ ಎಲ್ಲಾ ವಿಶ್ವವಿದ್ಯಾಲಯಗಳಿಗೆ ಏಕರೂಪದ ಕಾಯ್ದೆ ಜಾರಿ ನೆಪದಲ್ಲಿ ವಿಶ್ವವಿದ್ಯಾಲಯಗಳ ಎಲ್ಲಾ ಚಟುವಟಿಕೆಗಳಲ್ಲಿ ಹಸ್ತಕ್ಷೇಪ ಮಾಡುವುದರ ಜತೆಗೆ ಕುಲಾಧಿಪತಿಗಳಾಗಿರುವ ರಾಜ್ಯಪಾಲರ ಪರಮಾಧಿಕಾರಕ್ಕೆ ಕತ್ತರಿ ಹಾಕುವ ಮೂಲಕ ರಾಜ್ಯ ಸರ್ಕಾರ ಸಂಘರ್ಷಕ್ಕೆ ಎಡೆಮಾಡಿ ಕೊಡಲು ಮುಂದಾಗಿದೆ.

ಉನ್ನತ ಶಿಕ್ಷಣ ಸಚಿವ ಬಸವರಾಜ ರಾಯರಡ್ಡಿ ಬುಧವಾರ ವಿಧಾನಸಭೆಯಲ್ಲಿ ಮಂಡಿಸಿದ ಕರ್ನಾಟಕ ರಾಜ್ಯ
ವಿಶ್ವವಿದ್ಯಾನಿಲಯಗಳ ವಿಧೇಯಕ-2017ರಲ್ಲಿ ಸಮಾನವಾದ, ಶೀಘ್ರವಾದ ಮತ್ತು ಪರಿಣಾಮಕಾರಿ ನಿರ್ಧಾರ ಕೈಗೊಳ್ಳುವ ಪ್ರಕ್ರಿಯೆಯಲ್ಲಿ ಕುಲಾಧಿಪತಿಯು ರಾಜ್ಯ ಸರ್ಕಾರದೊಡನೆ ಸಮಾಲೋಚಿಸಿ ಎಲ್ಲಾ ಅಧಿಕಾರಿಗಳನ್ನು ಚಲಾಯಿಸತಕ್ಕದ್ದು ಎಂಬುದನ್ನು ಒಳಗೊಂಡಿದೆ.

ಇದು ವಿಶ್ವವಿದ್ಯಾಲಯದ ಆಗುಹೋಗುಗಳಲ್ಲಿ ರಾಜ್ಯಪಾಲರ ಅಧಿಕಾರವನ್ನು ಮೊಟಕು ಗೊಳಿಸುವುದರ ಜತೆಗೆ ಎಲ್ಲಾ ವಿಚಾರಗಳಲ್ಲೂ ತಾನು ಮೂಗು ತೂರಿಸುವ ಪ್ರಯತ್ನ ಮಾಡಿದೆ. ಅಲ್ಲದೆ, ಅಕಾಡೆಮಿಕ್‌ ಕೌನ್ಸಿಲ್‌ಗೆ ವಿಧಾನಸಭೆ ಮತ್ತು ವಿಧಾನ ಪರಿಷತ್‌ ಸದಸ್ಯರನ್ನು ನಾಮನಿರ್ದೇಶನ ಮಾಡುವುದನ್ನು ಹಿಂತೆಗೆದು ಕೊಂಡು ಸರ್ಕಾರ ತನಗೆ ಬೇಕಾದವರನ್ನು ನಾಮನಿರ್ದೇಶನ ಮಾಡುವ ಬಗ್ಗೆ ಪ್ರಸ್ತಾಪಿಸಲಾಗಿದೆ. ಇದು ವಿಧೇಯಕದ ಮೇಲಿನ ಚರ್ಚೆಯಲ್ಲಿ ಆಡಳಿತ ಮತ್ತು ಪ್ರತಿಪಕ್ಷಗಳ ನಡುವೆ ಕೋಲಾಹಲಕ್ಕೆ ಕಾರಣವಾಗುವ ನಿರೀಕ್ಷೆಯಿದೆ.

ರಾಜ್ಯದಲ್ಲಿ ಉನ್ನತ ಶಿಕ್ಷಣ ಇಲಾಖೆ ವ್ಯಾಪ್ತಿಯಲ್ಲಿ ಬರುವ ಎಲ್ಲ ವಿಶ್ವ ವಿದ್ಯಾಲಯಗಳಿಗಾಗಿ ಒಂದು ಸಮಗ್ರ ಶಾಸನ ರಚಿ ಸುವುದಕ್ಕಾಗಿ ಮತ್ತು ಅಂಥ ವಿಶ್ವ ವಿದ್ಯಾಲಯಗಳನ್ನು ಸ್ಥಾಪಿಸುವಲ್ಲಿ ಜಾರಿ ಯ ಲ್ಲಿರುವ ಹಲವು ಅಧಿ ನಿಯಮಗಳನ್ನು ಬದಲಿಸಲು ಅವಕಾಶ ಕಲ್ಪಿಸುವುದಕ್ಕಾಗಿ ಈ ವಿಧೇಯಕ ತರಲಾಗುತ್ತಿದೆ ಎಂದು ಸರ್ಕಾರ ಹೇಳಿಕೊಂಡಿದೆಯಾದರೂ ವಿಶ್ವವಿದ್ಯಾಲಯಗಳ ಮೇಲೆ ಸಂಪೂರ್ಣ ಹತೋಟಿ ಸ್ಥಾಪಿಸುವ ಅದರ ಉದ್ದೇಶ ಸ್ಪಷ್ಟವಾಗಿದೆ.

ವಿವಿ ಕುರಿತ ತೀರ್ಮಾನಗಳನ್ನು ಕೈಗೊಳ್ಳುವ ಮುನ್ನ ರಾಜ್ಯಪಾಲರು ಸರ್ಕಾರದೊಂದಿಗೆ ಸಮಾಲೋಚಿಸುವುದನ್ನು ಕಡ್ಡಾಯ ಗೊಳಿಸಿರುವುದು ಒಂದೆಡೆಯಾದರೆ, ವಿವಿ ಕುಲಪತಿಗಳ ನೇಮಕದ ಶೋಧನಾ ಸಮಿತಿಯಲ್ಲೂ ತನ್ನ ಕೈ ಬಲಪಡಿಸಿಕೊಂಡಿದೆ. ಈ ಹಿಂದೆ ಯುಜಿಸಿ, ರಾಜ್ಯಪಾಲರು ಮತ್ತು ಸರ್ಕಾರದಿಂದ ಸೂಚಿತರಾದ ಮೂವರು ಸದಸ್ಯರಿರುತ್ತಿದ್ದರು. ಇದೀಗ ಆ ಸಂಖ್ಯೆಯನ್ನು ಐದಕ್ಕೆ ಏರಿಸಲು ಮುಂದಾಗಿರುವ ಸರ್ಕಾರ, ಸಮಿತಿಯಲ್ಲಿ ಒಬ್ಬ ಯುಜಿಸಿ, ಒಬ್ಬ ರಾಜ್ಯಪಾಲರು ಸೂಚಿಸಿದ ವ್ಯಕ್ತಿಗಳ ಜತೆಗೆ ಸರ್ಕಾರದ ಇಬ್ಬರು ಮತ್ತು ವಿವಿ ಸೂಚಿಸಿದ ಒಬ್ಬ ಪ್ರತಿನಿಧಿ ಇರಬೇಕು ಎಂದು ಹೇಳಿದೆ.

ಕುಲಪತಿಯಾಗಿ ನೇಮಕಗೊಂಡ ವರು ನಾಲ್ಕು ವರ್ಷ  ಅವಧಿ ಇರಬೇಕು ಹಾಗೂ 67 ವರ್ಷ ತಲುಪಿದ ಬಳಿಕ ನಿವೃತ್ತರಾಗಬೇಕು. ಎರ ಡನೇ ಅವಧಿಗೆ ಮರುನೇಮಕಕ್ಕೆ ಅವಕಾಶ ಇರುವುದಿಲ್ಲ ಎಂದು ಹೇಳಲಾಗಿದೆ. ವಿಶ್ವವಿದ್ಯಾಲಯವು ಕಾರ್ಯನಿರ್ವಾಹಕ ಪರಿಷತ್‌ ಮೂಲಕ ತನ್ನ ಪ್ರತಿನಿಧಿಯನ್ನು ಸೂಚಿಸುತ್ತದೆ. ಈ ಪರಿಷತ್ತಿನಲ್ಲಿ ಸರ್ಕಾರದಿಂದ ನಾಮನಿರ್ದೇಶನಗೊಂಡವರೇ ಹೆಚ್ಚಿನ ಸಂಖ್ಯೆಯಲ್ಲಿರುವುದರಿಂದ ಈ ವ್ಯಕ್ತಿಯೂ ಸರ್ಕಾರದ ಪರವಾಗಿರುತ್ತಾನೆ. ಆಗ ಸರ್ಕಾರ ನಿರ್ಧರಿಸಿದವರೇ ಕುಲಪತಿ ಹುದ್ದೆಗೆ ಆಯ್ಕೆಯಾಗುವ ಸಾಧ್ಯತೆ ಹೆಚ್ಚಾಗಿದೆ. ಶೋಧನಾ ಸಮಿತಿಯಲ್ಲಿ ಕುಲಪತಿಗಳು, ಮಾಜಿ ಕುಲಪತಿಗಳು, ರಾಷ್ಟ್ರೀಯ ಪ್ರಾಮುಖ್ಯತೆಯ ಸಂಸ್ಥೆಗಳ ನಿರ್ದೇಶಕರ ದರ್ಜೆಗೆ ಕಡಿಮೆ ಇಲ್ಲದ ಪ್ರಸಿದಟಛಿ ಶಿಕ್ಷಣ ತಜ್ಞರು ಮಾತ್ರ ಇರುತ್ತಾರೆ ಎನ್ನುವ ಮೂಲಕ ಸರ್ಕಾರ ತನ್ನ ಈ ನಿರ್ಧಾರವನ್ನು ಸಮರ್ಥಿಸಿಕೊಳ್ಳುವ ಪ್ರಯತ್ನ ಮಾಡುತ್ತಿದೆ.

ಕುಲಸಚಿವರ ನೇಮಕವೂ ಸರ್ಕಾರವೇ ಮಾಡುತ್ತದೆ: ವಿಧೇಯಕ ಅಂಗೀಕಾರವಾಗಿ ಕಾಯ್ದೆಯಾಗಿ ರೂಪುಗೊಂಡರೆ ಕುಲಸಚಿವರ ನೇಮಕವನ್ನೂ ಸರ್ಕಾರ ತನ್ನ ಹಿಡಿತಕ್ಕೆ ತೆಗೆದುಕೊಳ್ಳಲಿದೆ. ಪ್ರಸ್ತುತ ರಾಜ್ಯಪಾಲರು ಕುಲಸಚಿವರನ್ನು ನೇಮಕ ಮಾಡುತ್ತಾರೆ. ಆದರೆ  ವಿಧೇಯಕದಲ್ಲಿ ಐಎಎಸ್‌ ಮತ್ತು ಕೆಎಎಸ್‌ ಹಿರಿಯ ಶ್ರೇಣಿ ಅಧಿಕಾರಿಗಳು
ಕುಲಸಚಿವರಾಗಬೇಕು ಎಂದು ಹೇಳುವ ಮೂಲಕ ಅದನ್ನು ಕೂಡ ಸರ್ಕಾರ ರಾಜ್ಯಪಾಲರ ಕೈಯಿಂದ ಕಸಿದುಕೊಳ್ಳಲು ಮುಂದಾಗಿದೆ.

ವಿವಿಗಳ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಯನ್ನು ನೇಮಿಸಲು ಸರ್ಕಾರವೇ ಒಂದು ಸಾಮಾನ್ಯ ನೇಮಕಾತಿ ಮಂಡಳಿ ಸ್ಥಾಪಿಸುವ ಬಗ್ಗೆ ಪ್ರಸ್ತಾಪಿಸಲಾಗಿದೆ. ವಿವಿಗಳಲ್ಲಿ ಕೈಗೊಳ್ಳುವ ಕಾಮಗಾರಿಗೆ ಸಂಬಂಧಿಸಿದಂತೆ ಉನ್ನತ ಶಿಕ್ಷಣ ಸಚಿವರ ನೇತೃತ್ವದಲ್ಲಿ ಮೂಲ ಸೌಕರ್ಯ ಅಭಿವೃದಿಟಛಿ ಮಂಡಳಿ ರಚಿಸಲಾಗುತ್ತದೆ. ಒಂದು ಕೋಟಿ ರೂಪಾಯಿಗಿಂತ ಅಧಿಕ ಮೊತ್ತದ ಕಾಮಗಾರಿ ನಡೆಸಲು ಈ ಮಂಡಳಿಯ ಅನುಮತಿ ಪಡೆದುಕೊಳ್ಳಬೇಕಾಗುತ್ತದೆ. ಅಂದರೆ, ಅಲ್ಲೂ ಸರ್ಕಾರ ಮಧ್ಯಪ್ರವೇಶಿಸಿದಂತಾಗುತ್ತದೆ. ಜತೆಗೆ ವಿಶ್ವ ವಿ ದ್ಯಾಲಯದ ಯಾವುದೇ ಆದೇಶ, ಅಧಿಸೂಚನೆ, ನಿರ್ಣಯ ಅಥವಾ ಯಾವುದೇ ವ್ಯವಹಾರ ನಿಯಮಗಳ ಅನುಸಾರ ಇಲ್ಲ ಅಥವಾ ರಾಜ್ಯ ಸರ್ಕಾರದ ಕಾರ್ಯನೀತಿಗೆ ವಿರುದಟಛಿವಾಗಿದೆ ಎಂದಾದರೆ ಸರ್ಕಾರಿ ರಾಜ್ಯ ಪತ್ರದಲ್ಲಿ ಆದೇ ಶ ಪ್ರಕಟಿಸಿ ವಿಶ್ವವಿದ್ಯಾಲಯದ ತೀರ್ಮಾನವನ್ನುರದ್ದುಗೊಳಿ ಸಬಹುದಾದ ಅಧಿಕಾರವನ್ನು ಸರ್ಕಾರ ತಾನೇ ಇಟ್ಟುಕೊಳ್ಳಲು ಮುಂದಾಗಿದೆ.

3 ಹೊಸ ವಿವಿಗಳ ಸ್ಥಾಪನೆ
ಹೊಸ ಕಾಯ್ದೆ ಜಾರಿಯಾದರೆ 3 ಹೊಸ ವಿಶ್ವವಿದ್ಯಾಲಯಗಳು ಸ್ಥಾಪನೆಯಾಗಲಿವೆ. ಮಂಡ್ಯ ಸರ್ಕಾರಿ ಕಾಲೇಜು ಮೇಲ್ದರ್ಜೆಗೇರಿಸಿ ಏಕಾತ್ಮಕ ಸ್ವರೂಪದ ವಿಶ್ವವಿದ್ಯಾಲಯ ಸ್ಥಾಪನೆ, ಬೆಂಗಳೂರು ಮಹಾರಾಣಿ ಕಾಲೇಜು ವ್ಯಾಪ್ತಿಯಲ್ಲಿ ಮಹಾರಾಣಿ ಕ್ಲಸ್ಟರ್‌ ವಿಶ್ವವಿದ್ಯಾಲಯ ಹಾಗೂ ಕರ್ನಾಟಕ ವಿಶ್ವವಿದ್ಯಾಲಯ ವಿಭಜಿಸಿ ರಾಯಚೂರು ವಿಶ್ವವಿದ್ಯಾಲಯ ಸ್ಥಾಪಿಸುವ ಬಗ್ಗೆ ವಿಧೇಯಕದಲ್ಲಿ ಪ್ರಸ್ತಾಪಿಸಲಾಗಿದೆ.

ಪ್ರಮುಖಾಂಶಗಳು
– ಅಕಾಡೆಮಿಕ್‌ ಕೌನ್ಸಿಲ್‌ನಿಂದ ವಿಧಾನಸಭೆ ಮತ್ತು ವಿಧಾನಪರಿಷತ್‌ ಸದಸ್ಯರು ಹೊರಗೆ. ನಾಮನಿರ್ದೇಶನಕ್ಕೆ
ವಿದ್ಯಾರ್ಹತೆ ನಿಗದಿ
 
– ವಿಶ್ವವಿದ್ಯಾಲಯಗಳಲ್ಲಿ ಇನ್ನು ಮುಂದೆ ಸೆನೆಟ್‌, ಸಿಂಡಿಕೇಟ್‌ ಬದಲು ಕಾರ್ಯನಿರ್ವಾಹಕ ಪರಿಷತ್ತು ಸ್ಥಾಪನೆ

– ಕುಲಪತಿ ಹುದ್ದೆ ಖಾಲಿಯಾದಾಗ ಬೇರೊಂದು ವಿವಿ ಕುಲಪತಿಯನ್ನು ಪ್ರಭಾರಿಯಾಗಿ ನೇಮಿಸುವುದು

– ಒಂದು ಕೋಟಿಗಿಂತ ಹೆಚ್ಚು ಮೊತ್ತದ ಕಾಮಗಾರಿಗೆ ಸಚಿವ ನೇತೃತ್ವದ ಮಂಡಳಿ ಒಪ್ಪಿಗೆ ಅಗತ್ಯ

– ವಿವಿ ಆದೇಶ ನಿಯಮಬಾಹಿರ ಎಂದಾದಲ್ಲಿ ಸರ್ಕಾರಕ್ಕೆ ರಾಜ್ಯಪತ್ರದ ಮೂಲಕ ರದ್ದುಗೊಳಿಸುವ ಅಧಿಕಾರ