ಕೋವಿಡ್ ವಲಯ ನಿಗದಿ ಜವಾಬ್ದಾರಿ ಇನ್ನು ರಾಜ್ಯಗಳದ್ದು: ಯಾವ ಝೋನ್ ಗಳಲ್ಲಿ ಯಾವುದಕ್ಕೆ ಅವಕಾಶ?

ನವದೆಹಲಿ: ಕೋವಿಡ್ ಸೋಂಕಿಗೆ ಸಂಬಂಧಿಸಿದಂತೆ ತಮ್ಮ ತಮ್ಮ ವ್ಯಾಪ್ತಿಯಲ್ಲಿ ಕೆಂಪು, ಕಿತ್ತಳೆ ಮತ್ತು ಹಸಿರು ವಲಯಗಳನ್ನು ನಿರ್ಧಾರ ಮಾಡಿ ಘೋಷಣೆ ಮಾಡುವ ಹೊಣೆ ಇನ್ನು ಮುಂದೆ ಆಯಾಯಾ ರಾಜ್ಯ ಸರಕಾರಗಳದ್ದಾಗಿರಲಿದೆ.

ಈ ಸಂಬಂಧ ಕೇಂದ್ರ ಗೃಹ ಸಚಿವಾಲಯ ಇಂದು ಬಿಡುಗಡೆ ಮಾಡಿರುವ ತನ್ನ ಮಾರ್ಗಸೂಚಿಯಲ್ಲಿ ಸ್ಪಷ್ಟಪಡಿಸಿದೆ.

ಈ ವಿಚಾರವಾಗಿ ಸಂಬಂಧಿತ ರಾಜ್ಯ ಹಾಗೂ ಕೇಂದ್ರಾಡಳಿತ ಪ್ರದೇಶಗಳ ಸರಕಾರಗಳು ಕೇಂದ್ರದ ಅರೋಗ್ಯ ಹಾಗೂ ಕುಟುಂಬ ಕಲ್ಯಾಣ ಸಚಿವಾಲಯ ನಿಗದಿಪಡಿಸಿರುವ ಮಾನದಂಡಗಳಿಗೆ ಅನುಗುಣವಾಗಿ ತಮ್ಮಲ್ಲಿ ವಲಯಗಳ ವಿಭಾಗೀಕರಣವನ್ನು ಮಾಡಲಿವೆ.

– ಕೇಂದ್ರದ ಅರೋಗ್ಯ ಹಾಗೂ ಕುಟುಂಬ ಕಲ್ಯಾಣ ಸಚಿವಾಲಯದ ಮಾರ್ಗಸೂಚಿಗಳನ್ನು ಪರಿಗಣಿಸಿ ಆಯಾಯ ಜಿಲ್ಲಾಡಳಿತಗಳು ತಮ್ಮವ್ಯಾಪ್ತಿಯಲ್ಲಿ ರೆಡ್, ಆರೆಂಜ್, ಕಂಟೈನ್ಮೆಂಟ್ ಝೋನ್ ಹಾಗೂ ಬಫರ್ ಝೋನ್ ಗಳ ವಿಭಾಗೀಕರಣವನ್ನು ಮಾಡಬಹುದಾಗಿರುತ್ತದೆ.

– ಕಂಟೈನ್ಮೆಂಟ್ ಪ್ರದೇಶಗಳಲ್ಲಿ ಅಗತ್ಯ ಸೇವೆಗಳನ್ನು ಕೈಗೊಳ್ಳಲು ಮಾತ್ರವೇ ಅವಕಾಶವಿರುತ್ತದೆ. ಮತ್ತು ಈ ಪ್ರದೇಶಗಳಿಂದ ಹಾಗೂ ಈ ಪ್ರದೇಶಗಳಿಗೆ ಜನರ ಸಂಚಾರವನ್ನು ಸಂಪೂರ್ಣವಾಗಿ ನಿರ್ಬಂಧಿಸಬೇಕಾಗಿರುತ್ತದೆ. ವೈದ್ಯಕೀಯ ಸೇವೆಗಳು ಮತ್ತು ಅತ್ಯಗತ್ಯ ವಸ್ತುಗಳ ಸರಬರಾಜಿಗೆ ಇದರಿಂದ ವಿನಾಯಿತಿ ಇರುತ್ತದೆ.

– ಕಂಟೈನ್ಮೆಂಟ್ ಪ್ರದೇಶಗಳಲ್ಲಿ ಸೋಂಕಿತರ ಸಂಪರ್ಕ ಪತ್ತೆ, ಮನೆ ಮನೆ ನಿಗಾ ಮತ್ತು ಇತರೇ ವೈದ್ಯಕೀಯ ಚಟುವಟಿಕೆಗಳನ್ನು ತೀವ್ರಸ್ವರೂಪದಲ್ಲಿ ನಡೆಸಬೇಕಾಗಿರುತ್ತದೆ.

– ಈ ಹಿಂದಿನ ಲಾಕ್ ಡೌನ್ ಅವಧಿಗಳಲ್ಲಿ ಇದ್ದಂತೆಯೇ ರಾತ್ರಿ 7 ಗಂಟೆಯಿಂದ ಮರುದಿವಸ ಬೆಳಿಗ್ಗೆ 7 ಗಂಟೆಯವರೆಗೆ ಸಾರ್ವಜನಿಕರ ಓಡಾಟಕ್ಕೆ ನಿರ್ಬಂಧವನ್ನು ಮುಂದುವರಿಸಲಾಗಿದೆ.

– ಆರೋಗ್ಯ ಸಮಸ್ಯೆ ಇರುವ 65 ವರ್ಷಕ್ಕಿಂತ ಮೇಲ್ಪಟ್ಟ ವ್ಯಕ್ತಿಗಳು, ಗರ್ಭಿಣಿಯರು, 10 ವರ್ಷ ಪ್ರಾಯಕ್ಕಿಂತ ಕೆಳಗಿನ ಮಕ್ಕಳು ತುರ್ತು ಕಾರಣಗಳಿಲ್ಲದೇ ಹೊರಗಡೆ ಓಡಾಡುವಂತಿಲ್ಲ.

– ಕಂಟೈನ್ಮೆಂಟ್ ಪ್ರದೇಶಗಳನ್ನು ಹೊರತುಪಡಿಸಿ ಉಳಿದ ಕಡೆಗಲಲ್ಲಿ ನಿರ್ಧಿಷ್ಟ ನಿರ್ಬಂಧಿತ ಕಾರ್ಯಚಟುವಟಿಕೆಗಳನ್ನು ಹೊರತುಪಡಿಸಿದಂತೆ ಉಳಿದೆಲ್ಲಾ ಕಾರ್ಯಚಟುವಟಿಕೆಗಳನ್ನು ನಡೆಸಲು ಷರತ್ತುಬದ್ಧ ಅನುಮತಿಯನ್ನು ನೀಡಲಾಗಿದೆ.

– ಮತ್ತು ಪರಿಸ್ಥಿತಿಗೆ ಅನುಗುಣವಾಗಿ ತಮ್ಮ ತಮ್ಮ ರಾಜ್ಯಗಳಲ್ಲಿ ಈಗಾಗಲೇ ಅನುಮತಿ ನೀಡಲಾಗಿರುವ ಯಾವುದೇ ಕಾರ್ಯಚಟುವಟಿಕೆಗಳನ್ನು ನಿರ್ಬಂಧಿಸುವ ಅಧಿಕಾರ ಆಯಾಯ ರಾಜ್ಯ ಸರಕಾರಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳ ಸರಕಾರಗಳದ್ದಾಗಿರುತ್ತದೆ.

– ವೈದ್ಯರು, ನರ್ಸ್ ಗಳು ಮತ್ತು ಅರೆ ವೈದ್ಯಕೀಯ ಸಿಬ್ಬಂದಿಗಳು, ಸ್ವಚ್ಛತಾಕರ್ಮಿಗಳು ಮತ್ತು ಆ್ಯಂಬುಲೆನ್ಸ್ ಗಳ ಅಂತರ್ ರಾಜ್ಯ ಹಾಗೂ ರಾಜ್ಯದೊಳಗಿನ ಪ್ರಯಾಣಗಳಿಗೆ ಯಾವುದೇ ರೀತಿಯ ನಿರ್ಬಂಧವನ್ನು ಸ್ಥಳೀಯ ಸರಕಾರಗಳು ವಿಧಿಸುವಂತಿಲ್ಲ.

– ಖಾಲಿ ಟ್ರಕ್ ಗಳೂ ಸೇರಿದಂತೆ ಎಲ್ಲಾ ರೀತಿಯ ಸರಕು/ಕಾರ್ಗೋ ವಾಹನಗಳ ಅಂತರ್ ರಾಜ್ಯ ಸಂಚಾರಕ್ಕೆ ಎಲ್ಲಾ ರಾಜ್ಯ ಸರಕಾರಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳ ಸರಕಾರಗಳು ಅನುಮತಿ ನೀಡಬೇಕು.

– ನೆರೆ ರಾಷ್ಟ್ರಗಳ ಜೊತೆ ಗಡಿಯನ್ನು ಹಂಚಿಕೊಂಡಿರುವ ರಾಜ್ಯಗಳೂ ಸಹ ದ್ವಿಪಕ್ಷೀಯ ವ್ಯವಹಾರ ಒಪ್ಪಂದ ಇರುವ ದೇಶಗಳಿಗೆ ಸರಕು ಮತ್ತು ಕಾರ್ಗೊ ವಾಹನಗಳ ಸಂಚಾರಕ್ಕೆ ನಿರ್ಬಂಧ ವಿಧಿಸುವಂತಿಲ್ಲ.