ಕಲಾದಗಿಯಲ್ಲಿ ಗಾಳಿಗೆ ಹಾರಿ ಹೋದ ಮೇಲ್ಛಾವಣಿ

ಕಲಾದಗಿ: ಮಂಗಳವಾರ ಸಂಜೆ ಬೀಸಿದ ಬಿರುಗಾಳಿಗೆ ಕಲಾದಗಿ ಹಾಗೂ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಮನೆ ಮೇಲ್ಚಾವಣಿ ಹಾರಿ ಹೋಗಿವೆ.

ಹಿರೇಶೆಲ್ಲಿಕೇರಿಯ ದುಂಡಪ್ಪ ಹನಮಪ್ಪ ಮಾದರ ಎಂಬುವರ ಮನೆಯ ಮೇಲ್ಚಾವಣಿಯ 9 ತಗಡುಗಳು ಹಾರಿ ಹೋಗಿವೆ. ಈ ಸಂದರ್ಭ ದೊಡ್ಡ ಪ್ರಮಾಣದ ಕಲ್ಲುಗಳು ಮನೆಯ ಒಳಗಡೆ ಬಿದ್ದ ಪರಿಣಾಮ ಟಿವಿ, ಬಾಂಡೆ ಸಾಮಗ್ರಿಗಳಿಗೆ ಹಾನಿಯಾಗಿದೆ. ಮನೆಯಲ್ಲಿನ 15 ಚೀಲ ಜೋಳ, 3 ಚೀಲ ಗೋದಿ, 4 ಚೀಲ ತುಂಬಿಟ್ಟ ಸಜ್ಜೆ ಕಾಳುಗಳು ಮಳೆಗೆ ನೆನೆದು ಹಾನಿಯಾಗಿವೆ, ಗಾಳಿಗೆ ಏಕಾಏಕಿ ಕುಂಬಿ ಸಮೇತ ತಗಡುಗಳು ಹಾರಿ ಹೋಗಿವೆ. ಯಾವುದೇ ಪ್ರಣಾಪಾಯ ಸಂಭವಿಸಿಲ್ಲ. ಗ್ರಾಮಲೆಕ್ಕಾಧಿಕಾರಿ ಎ.ವಿ. ಸೂರ್ಯವಂಶಿ ಸ್ಥಳಕ್ಕೆ ಭೇಟಿ ನೀಡಿ ಮಾಹಿತಿ ಪಡೆದರು.

ತುಳಿಸಿಗೇರಿಯಲ್ಲಿ ಅಲ್ಲಲ್ಲಿ ಅಂಗಡಿಗಳ ಮುಂದಿನ ತಗಡುಗಳು ಹಾರಿ ಹೋಗಿವೆ, ಬೇವಿನ ಮರದ ರೆಂಬೆ ಕೊಂಬೆಗಳು ಮುರಿದು ಬಿದ್ದಿವೆ. ಹೊಲ ಗದ್ದೆಗಳಲ್ಲಿನ 15ಕ್ಕೂ ಅಧಿಕ ಗಿಡ ಮರಗಳು ಬಿದ್ದಿವೆ, ವೆಂಕಣ್ಣ ಹೊಸಕೋಟಿ, ಗೋಪಾಲ ದೊಡ್ಡಮನಿ ಇವರ ಅಂಗಡಿ ಮುಂದಿನ ತಗಡುಗಳು ಹಾರಿ ಹೋಗಿವೆ.

5 ಕುರಿ ಸಾವು: ಸೀಮಿಕೇರಿ ಗ್ರಾಮದ ತಿಪ್ಪಣ್ಣ ಹನಮಂತ ಬಂಟನೂರು ಅವರ ಮೂರು ದೊಡ್ಡ ಕುರಿಗಳು, ಎರಡು ಸಣ್ಣ ಕುರಿಗಳು ಆಲಿಕಲ್ಲು ಮಳೆಗೆ ಮೃತಪಟ್ಟಿವೆ. ಗ್ರಾಮದ ಹೊರವಲಯದ ಹೊಲದಲ್ಲಿನ ಕುರಿ ದಡ್ಡಿಯಲ್ಲಿ ಮೃತಪಟ್ಟಿದೆ. ಸ್ಥಳಕ್ಕೆ ಕಂದಾಯ ಇಲಾಖೆ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.