ಸುಖೋಯ್‌ ಜೆಟ್‌ನಲ್ಲಿ ಶೀಘ್ರ ಬ್ರಹ್ಮೋಸ್‌ ಕ್ಷಿಪಣಿ

ಹೊಸದಿಲ್ಲಿ: ದೇಶದ ಅತ್ಯಾಧುನಿಕ ಸೂಪರ್‌ಸಾನಿಕ್‌ ಬ್ರಹ್ಮೋಸ್‌ ಕ್ಷಿಪಣಿಗಳನ್ನು ಸುಖೋಯ್‌ ಯುದ್ಧ ವಿಮಾನ ಗಳಲ್ಲಿ ಅಳವಡಿಸುವ ಪ್ರಕ್ರಿಯೆ ತ್ವರಿತಗೊಳಿಸಲು ವಾಯುಪಡೆ ನಿರ್ಧರಿಸಿದೆ.

ಸುಮಾರು 40 ಯುದ್ಧ ವಿಮಾನಗಳಲ್ಲಿ ಈ ಕ್ಷಿಪಣಿಗಳನ್ನು ಅಳವಡಿಸಲಾಗುತ್ತದೆ. ಇದರಿಂದ ವಾಯು ಪಡೆಯ ಸಾಮರ್ಥ್ಯ ಭಾರೀ ಪ್ರಮಾಣದಲ್ಲಿ ಹೆಚ್ಚಲಿದೆ. ಸದ್ಯ 2020 ಡಿಸೆಂಬರ್‌ ವೇಳೆಗೆ ಈ ಪ್ರಕ್ರಿಯೆ ಮುಗಿಸುವ ಉದ್ದೇಶ ಹೊಂದಲಾಗಿದೆ. ಆದರೆ ಅದಕ್ಕೂ ಮುನ್ನವೇ ಪೂರ್ಣ ಗೊಳಿಸುವಂತೆ ಪ್ರಕ್ರಿಯೆ ತ್ವರಿತಗೊಳಿಸಲು ಎಚ್‌ಎಎಲ್‌ ಮತ್ತು ಬ್ರಹ್ಮೋಸ್‌ ಏರೋಸ್ಪೇಸ್‌ಗೆ ಸೂಚಿಸಲಾಗಿದೆ.

2016ರಿಂದಲೇ ಈ ಪ್ರಕ್ರಿಯೆ ಆರಂಭಕ್ಕೆ ಆದೇಶಿಸಲಾಗಿತ್ತು. ಆದರೆ ನಿಜವಾದ ಕೆಲಸ 2017ರ ಕೊನೆಯ ವೇಳೆಗೆ ಆರಂಭವಾಗಿತ್ತು. ಬಾಲಾಕೋಟ್‌ ದಾಳಿ ಹಿನ್ನೆಲೆ ಸೇನಾ ಸಾಮರ್ಥ್ಯದ ಮರುಪರಿಶೀಲನೆ ಮಾಡಿದಾಗ, ಸುಖೋಯ್‌ ಜೆಟ್‌ಗಳಿಗೆ ಬ್ರಹ್ಮೋಸ್‌ ಅಳವಡಿಕೆ ತುರ್ತಾಗಿ ಅಗತ್ಯವಿದೆ ಎಂದು ಮನಗಾಣಲಾಗಿದೆ. ರಫೇಲ್‌, ಎಸ್‌ 400 ಕ್ಷಿಪಣಿ ವ್ಯವಸ್ಥೆಯನ್ನು ಶೀಘ್ರ ಸೇನೆಗೆ ಒದಗಿಸುವುದೂ ಅಗತ್ಯವಿದೆ ಎನ್ನಲಾಗಿದೆ.