ಸಿಬಿಐಗೆ ಹೊಸ ಮುಖ್ಯಸ್ಥರ: ಆಯ್ಕೆಗೆ 24ಕ್ಕೆ ಸಮಿತಿ ಸಭೆ

ಹೊಸದಿಲ್ಲಿ: ಸಿಬಿಐಗೆ ನೂತನ ಮುಖ್ಯಸ್ಥರ ಆಯ್ಕೆ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಉನ್ನತಾಧಿಕಾರದ ಸಮಿತಿ 24ರಂದು ಸಭೆ ನಡೆಸಲಿದೆ. ನಿ.ಪೂ. ಮುಖ್ಯಸ್ಥ ಅಲೋಕ್‌ ವರ್ಮಾ ವಜಾಗೊಂಡ ಬೆನ್ನಲ್ಲಿಯೇ ಈ ಸಭೆ ನಡೆಯಲಿದೆ. ಕಾಂಗ್ರೆಸ್‌ ನಾಯಕ ಮಲ್ಲಿಕಾರ್ಜುನ ಖರ್ಗೆ, ಸುಪ್ರೀಂಕೋರ್ಟ್‌ ಮುಖ್ಯ ನ್ಯಾ| ರಂಜನ್‌ ಗೊಗೊಯ್‌ ಸದಸ್ಯರಾಗಿರುವ ಸಮಿತಿಯ ಸಭೆ ಯನ್ನು ಜ.21ಕ್ಕೆ ನಡೆಸಲು ನಿರ್ಧರಿಸಲಾಗಿತ್ತಾದರೂ, ಅಂತಿಮ ವಾಗಿ ಜ. 24ರ ದಿನ ನಿಗದಿ ಮಾಡಲಾಯಿತು. ಮುಖ್ಯ ನ್ಯಾ| ರಂಜನ್‌ ಗೊಗೊಯ್‌ ಸಭೆಯಲ್ಲಿ ಭಾಗವಹಿಸಲಿದ್ದಾರೆಯೋ ಅಥವಾ ಪ್ರತಿನಿಧಿ ಕಳುಹಿಸಲಿದ್ದಾರೆಯೋ ಎನ್ನುವುದು ತತ್‌ಕ್ಷಣಕ್ಕೆ ಗೊತ್ತಾ ಗಿಲ್ಲ. ಜ.10ರಂದು ನಡೆದಿದ್ದ ಸಭೆಯಿಂದ ದೂರ ಉಳಿದು, ನ್ಯಾ| ಎ.ಕೆ.ಸಿಕ್ರಿ ಅವರನ್ನು ತಮ್ಮ ಪ್ರತಿನಿಧಿಯಾಗಿ ಕಳುಹಿಸಿದ್ದರು.

ಮತ್ತೂಂದೆಡೆ ಹಿರಿಯ ಐಪಿಎಸ್‌ ಅಧಿಕಾರಿ ಎಂ. ನಾಗೇಶ್ವರ ರಾವ್‌ ಅವರನ್ನು ಸಿಬಿಐ  ಮಧ್ಯಂತರ ನಿರ್ದೇಶಕರನ್ನಾಗಿ ನೇಮಿಸಿರುವ ನಿರ್ಧಾರದ ವಿರುದ್ಧ ಸರಕಾರೇತರ ಸಂಸ್ಥೆಯೊಂದು (ಎನ್‌ಜಿಒ) ಸಲ್ಲಿಸಿರುವ ಅರ್ಜಿಯ ವಿಚಾರಣೆಯನ್ನು ತ್ವರಿತವಾಗಿ ವಿಚಾರಣೆಗೊಳಪಡಿಸಲು ಸುಪ್ರೀಂ ಕೋರ್ಟ್‌ ಸಮ್ಮತಿಸಿದೆ. ಮುಂದಿನ ವಾರ ಅದರ ವಿಚಾರಣೆ ನಡೆಯಲಿದೆ.