ನಾಲ್ಕೇ ತಿಂಗಳಲ್ಲಿ ಎನ್‌- 95 ಮಾಸ್ಕ್ ದರ ಶೇ.250 ಹೆಚ್ಚಳ

ಹೊಸದಿಲ್ಲಿ: ಕೋವಿಡ್ ನಿಯಂತ್ರಣಕ್ಕೆ ಪರಿಣಾಮಕಾರಿ ರಕ್ಷಾಕವಚ ಅಂತಲೇ ಕರೆಯಲ್ಪಡುವ ಎನ್‌- 95 ಮಾಸ್ಕ್ ಗಳ ಬೆಲೆ 4 ತಿಂಗಳಿನಲ್ಲಿ ಶೇ.250ರಷ್ಟು ಏರಿಕೆಯಾಗಿದೆ! ಎನ್‌-95 ಮಾಸ್ಕ್ ಗೆ ಕಳೆದ ಸೆಪ್ಟೆಂಬರ್‌ನಲ್ಲಿ ಸರಕಾರಿ ಏಜೆನ್ಸಿ ನಿಗದಿಪಡಿಸಿದ್ದ ಬೆಲೆ 12.25 ರೂಪಾಯಿ. ಜನವರಿಯಲ್ಲಿ ಮಾಸ್ಕ್ ಗೆ  17.33, ಮಾರ್ಚ್‌ಗೆ 42 ರೂ., ಮೇ ತಿಂಗಳ ಮಧ್ಯದ ಹೊತ್ತಿಗೆ ಅದರ ಬೆಲೆ 63 ರೂ.ಗೆ ಜಿಗಿದಿದೆ. ಆದರೂ ರಾಷ್ಟ್ರೀಯ ಔಷಧ ಬೆಲೆ ನಿಯಂತ್ರಣ ಪ್ರಾಧಿಕಾರವು (ಎನ್‌ಪಿಪಿಎ) ರಾಜಾರೋಷವಾಗಿ ಏರುತ್ತಿರುವ ಮಾಸ್ಕ್  ಬೆಲೆಗೆ ಪರಿಪೂರ್ಣವಾಗಿ ಮೂಗುದಾರ ಹಾಕಲು ಹಿಂದೇಟು ಹಾಕುತ್ತಿದೆ. ಎನ್‌ಪಿಪಿಎ ಮೇ 21ರಂದು ಎನ್‌-95 ಮಾಸ್ಕ್ ಉತ್ಪಾದಕರು, ಪೂರೈಕೆದಾರರಿಗೆ ದರ ಸಂಬಂಧ ಮಾರ್ಗಸೂಚಿಯೇನೋ ಹೊರಡಿಸಿತ್ತು. ಆದರೆ, ಇದರಿಂದ ಶೇ.47ರಷ್ಟು ಬೆಲೆ ಮಾತ್ರವೇ ಕಡಿಮೆಯಾಗಿದೆ.