ವಿಜಯಪುರ: ಹಿಂದಿ ಚಿತ್ರನಟ ಶಾರುಖ್ ಖಾನ್ ಪುತ್ರ ಡ್ರಗ್ ಪ್ರಕರಣದಲ್ಲಿ ಸಿಕ್ಕಿಬಿದ್ದಿರುವುದು ಖಾನ್ ಗಳಿಂದ ದೇಶಕ್ಕೆ ಅಪಾಯದ ಮುನ್ಸೂಚನೆ. ದೇಶದ ಸುರಕ್ಷತೆಗೆ ಮಾರಕವಾಗಿರುವ ಖಾನ್‍ಗಳು ಕೂಡಲೇ ದೇಶ ಬಿಟ್ಟು ತೊಲಗಬೇಕು. ತಮಗೆ ಸುರಕ್ಷಿತವಾಗಿರುವ ಹಾಗೂ ಮಾದಕ ವಸ್ತುಗಳ ಕೇಂದ್ರವಾಗಿರುವ ಅಪಘಾನಿಸ್ತಾನಕ್ಕೆ ತೆರಳಿ ನಟನೆ ಮಾಡಿಕೊಂಡಿರಲಿ ಎಂದು ಮಾಜಿ ಸಚಿವ ಬಸನಗೌಡ ಪಾಟೀಲ್ ಯತ್ನಾಳ್ ಗುಡುಗಿದರು.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಭಾರತದಲ್ಲಿ ಖಾನ್ ಗಳು ಮಾಡುವ ಸಿನಿಮಾಗಳನ್ನು ನೋಡುವ ಮೂಲಕ ಹಿಂದೂಗಳು ಅವರಿಗೆ ಸಾವಿರಾರು ಕೋಟಿ ರೂ. ಆದಾಯ ಮಾಡಿಕೊಡುತ್ತಿದ್ದಾರೆ. ಅವರ ಮಕ್ಕಳು ಡ್ರಗ್ ಬಳಕೆಯಂಥ ದೇಶದ್ರೋಹದ ಕೆಲಸದಲ್ಲಿ ತೊಡಗುತ್ತಿದ್ದಾರೆ. ಡ್ರಗ್ ಮಾಫಿಯಾವನ್ನು ಮಟ್ಟ ಹಾಕಿದಲ್ಲಿ ದೇಶದಲ್ಲಿ ಭಯೋತ್ಪಾದನೆಯನ್ನು ಮೂಲೋತ್ಪಾಟನೆ ಮಾಡಲು ಸಾಧ್ಯವಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಇದೀಗ ಈ ಕೆಲಸವನ್ನು ಸಮರ್ಥವಾಗಿ ಮಾಡುತ್ತಿದ್ದಾರೆ ಎಂದರು.
ಡ್ರಗ್ ಮಾಫಿಯಾ ಮಟ್ಟ ಹಾಕಿ: ಡ್ರಗ್ಸ್ ಮಾಫಿಯಾ ಭಯೋತ್ಪಾದನೆಯ ಒಂದು ಭಾಗ. ಸಿನಿಮಾ ನಟರು ಡ್ರಗ್ಸ್ ಮಾಫಿಯಾದ ಒಂದು ಭಾಗವಾಗಿದ್ದಾರೆ. ಹೀಗಾಗಿ ದೇಶದ್ರೋಹದ ಕೆಲಸವಾಗಿರುವ ಮಾದಕಲೋಕ ಯುವಕರನ್ನು ಅದರಲ್ಲೂ ಉನ್ನತ ಶಿಕ್ಷಣ ಪಡೆಯುವ ವಿದ್ಯಾವಂತ ಯುವಶಕ್ತಿಯನ್ನು ಗುರಿ ಮಾಡಿಕೊಂಡಿದೆ. ಹೀಗಾಗಿ ಹಿಂದೂ ಯುವಕರ ಮಹತ್ವ ಬದುಕನ್ನು ಬಲಿಕೊಡುವ ಹುನ್ನಾರ ಈ ಮಾದಕ ಲೋಕದಲ್ಲಿ ನಡೆಯುತ್ತಿದೆ. ಇದರ ವಿರುದ್ಧ ಎಬಿವಿಪಿ ಸಂಘಟನೆ ರಾಜ್ಯದಲ್ಲಿ ಸಾಕಷ್ಟು ಹೋರಾಟ ನಡೆಸಿದ್ದು, ಸರ್ಕಾರಕ್ಕೂ ಇದರ ಅರಿವಿದೆ ಎಂದರು.
ಇದನ್ನೂ ಓದಿ:ಮುಳುಗುವ ಹಡಗು ಕಾಂಗ್ರೆಸ್ ಪಕ್ಷಕ್ಕೆ ಬಿಜೆಪಿಯ ಯಾವ ಶಾಸಕನೂ ಸೇರಲ್ಲ: ಯತ್ನಾಳ
ಡ್ರಗ್ಸ್ ಮೂಲಕ ಹಿಂದೂಗಳ ಪುರುಷತ್ವ ಹೀನತೆ ಹೆಚ್ಚಾಗಿ, ಹಿಂದೂ ಜನಸಂಖ್ಯೆ ಕಡಿಮೆ ಮಾಡಬೇಕು ದೂರಗಾಮಿ ದುರುದ್ದೇಶ ಅಡಗಿದೆ. ಹೀಗಾಗಿ ದೇಶ ಭಕ್ತರಾಗಿರುವ ಗೃಹ ಸಚಿವ ಆರಗ ಜ್ಞಾನೇಂದ್ರ ಅವರು ರಾಜ್ಯದಲ್ಲಿ ಡ್ರಗ್ ಮಾಫಿಯಾವನ್ನು ಸಂಪೂರ್ಣ ಮಟ್ಟ ಹಾಕಬೇಕು ಎಂದು ಯತ್ನಾಳ್ ಆಗ್ರಹಿಸಿದರು.
ಬೆಂಗಳೂರು ಡ್ರಗ್ಸ್ ಪ್ರಕರಣದಲ್ಲೂ ಪ್ರಭಾವಿ ಮಕ್ಕಳು, ಸಿನಿಮಾ ನಟರಿದ್ದಾರೆ. ಆದರೆ ಈ ಪ್ರಕರಣದಲ್ಲಿ ಸೀಮಿತ ತನಿಖೆ ನಡೆದಿದೆ. ತಮಗೆ ಬೇಕಿದ್ದಷ್ಟು ಮಾತ್ರ ತನಿಖೆ ನಡೆಸಿದ್ದಾರೆ. ಆಳ ತನಿಖೆ ನಡೆದಿದ್ದರೆ ಕೈ ಶಾಸಕರು ಇದರಲ್ಲಿ ಸಿಕ್ಕಿ ಬೀಳುತ್ತಿದ್ದರು. ರಾಜ್ಯದಲ್ಲಿ ಡ್ರಗ್ಸ್ ಕೇಸನಲ್ಲಿ ಪ್ರಭಾವಿ ರಾಜಕೀಯ ನಾಯಕರ, ಚಿತ್ರರಂಗದವರ ಹೆಸರು ತಳುಕು ಹಾಕಿಕೊಂಡ ಕಾರಣಕ್ಕೆ ಡ್ರಗ್ ಪ್ರಕರಣವನ್ನು ಮುಚ್ಚಿ ಹಾಕಲಾಯಿತು. ಬಿಜೆಪಿಯ ಕೆಲ ಶಾಸಕರ ಮಕ್ಕಳ ಹೆಸರು ಹೊರ ಬರುತ್ತಿತ್ತು ಎಂದು ಹೊಸ ವಿಷಯ ಹೊರ ಹಾಕಿದರು.
