ಜೋಕಟ್ಟೆಯಲ್ಲಿ ಹಾರುಬೂದಿ ಸಮಸ್ಯೆ

ಜೋಕಟ್ಟೆ: ಕಳವಾರು ಪ್ರದೇಶದಲ್ಲಿ ಹಾರು ಬೂದಿ ಮತ್ತೆ ಜನವಸತಿ ಪ್ರದೇಶಗಳಿಗೆ ಹರಡಿ ಆತಂಕ ಸೃಷ್ಟಿಸಿದೆ. ಬುಧವಾರ ಅಂಗಡಿ, ಮನೆ, ಅಂಗನವಾಡಿ, ಶಾಲಾ ಪರಿಸರದಲ್ಲಿ ಹಾರು ಬೂದಿ ಹರಡಿ ನೆಲ, ನೀರು, ಮರಗಳಲ್ಲಿ ಸೇರಿ ಸಮಸ್ಯೆಯಾಗಿದೆ. ಹೆಚ್ಚಿನ ಪ್ರಮಾಣದ ಕೋಕ್‌ ಹುಡಿ ಬಿದ್ದ ಪರಿಣಾಮ ಉಸಿರಾಟಕ್ಕೆ ಸಮಸ್ಯೆಯಾಯಿತು.

2014ರಲ್ಲಿಸಲ್ಫರ್  ಘಟಕ ಪ್ರಾರಂಭವಾದ ಬಳಿಕ ಕಳೆದ 4 ವರ್ಷಗಳಿಂದ ಹಾರು ಬೂದಿ ಸಮಸ್ಯೆಯಿಂದಾಗಿ ನೆಮ್ಮದಿ ಕಳೆದುಕೊಂಡಿದ್ದೇವೆ. ಇಲ್ಲಿನ ಪರಿಸರ ಮಾಲಿನ್ಯವಾಗಿದ್ದು, ಹಲವು ರೀತಿಯ ಆರೋಗ್ಯ ಸಮಸ್ಯೆ ಕಾಡುತ್ತಿದೆ. ಕುಡಿಯಲು ಶುದ್ಧ ನೀರು ಸಿಗದಂತಾಗಿದೆ ಎನ್ನುತ್ತಾರೆ ಸ್ಥಳೀಯರಾದ ಹಕೀಮ್‌.

ಹಸಿರು ವಲಯ ನಿರ್ಮಾಣಕ್ಕೆ ಮುಂದಾದ ಎಂಆರ್‌ಪಿಎಲ್‌
ಗ್ರಾಮಸ್ಥರ ಹೋರಾಟಕ್ಕೆ ಮಣಿದು ಘಟಕದ ಸುತ್ತಲೂ ಸುಮಾರು 27 ಎಕರೆ ವ್ಯಾಪ್ತಿಯಲ್ಲಿ ಹಸಿರು ವಲಯ ನಿರ್ಮಾಣಕ್ಕೆ ಎಂಆರ್‌ಪಿಎಲ್‌ ಮುಂದಾಗಿದೆ. ಸರಕಾರವೂ ಒಪ್ಪಿಗೆ ಸೂಚಿಸಿದ್ದು, ಅದಕ್ಕೆ ಚಾಲನೆ ನೀಡಲಾಗಿದೆ. ಶಬ್ದ, ವಾಯು ಹಾಗೂ ಮಣ್ಣು ಮಾಲಿನ್ಯ ತಡೆಗೂ ಸಂಸ್ಥೆ ಇದೇ ರೀತಿ ಕ್ರಮಕ್ಕೆ ಮುಂದಾಗಬೇಕು ಎಂಬುದು ಸ್ಥಳೀಯರ ಆಗ್ರಹ.