ಮೊದಲ ಗೋಲು, ಒಂದು ಕೈ ಮೇಲು: ಜೀಕ್ಸನ್‌

ಹೊಸದಿಲ್ಲಿ: ಭಾರತ ಫಿಫಾ ವಿಶ್ವಕಪ್‌ ಫ‌ುಟ್‌ಬಾಲ್‌ ಇತಿಹಾಸದಲ್ಲಿ ಮೊದಲ ಗೋಲು ಸಿಡಿಸಿದೆ. ಕೊಲಂಬಿಯಾ ವಿರುದ್ಧ ಸೋಮವಾರ ರಾತ್ರಿ ನಡೆದ ಪಂದ್ಯದಲ್ಲಿ ಜೀಕ್ಸನ್‌ ಸಿಂಗ್‌ ಆಕರ್ಷಕ ಹೆಡ್‌ ಗೋಲ್‌ ಮೂಲಕ ವಿಶ್ವಕಪ್‌ನಲ್ಲಿ ಭಾರತದ ಖಾತೆ ತೆರೆದರು. ಬಳಿಕ ಪ್ರತಿಕ್ರಿಯಿಸಿದ ಜೀಕ್ಸನ್‌, “ಇದೊಂದು ಐತಿಹಾಸಿಕ ಕ್ಷಣ. ಬಹಳ ಸಂತೋಷವಾಗುತ್ತಿದೆ. ನಾನೀಗ ನೆಲದ ಮೇಲೆಯೇ ಇಲ್ಲ. ಮೊದಲ ಗೋಲು ಯಾವತ್ತೂ ಒಂದು ಕೈ ಮೇಲು…’ ಎಂಬುದಾಗಿ ಹೇಳಿದರು.

ಜೀಕ್ಸನ್‌ ಸಿಂಗ್‌ ಈ ಗೋಲು ಸಿಡಿಸಿ ಪಂದ್ಯವನ್ನು ಸಮ ಬಲಕ್ಕೆ ತಂದಾಗ ಕೋಚ್‌ ಲೂಯಿಸ್‌ ನಾರ್ಟನ್‌ ಡಿ ಮಾಟೋಸ್‌ ಸಹಿತ ಎಲ್ಲರೂ ಹುಚ್ಚೆದ್ದು ಕುಣಿದಿದ್ದರು. ಆದರೆ ಈ ಸಂತಸ ಹೆಚ್ಚು ಹೊತ್ತು ಉಳಿಯಲಿಲ್ಲ ಎಂಬುದು ಬೇರೆ ಮಾತು. ಭಾರತದ ಸಾಹಸ ಈ ಒಂದೇ ಗೋಲಿಗೆ ಸೀಮಿತವಾಯಿತು. ಕೊಲಂಬಿಯಾ 2-1 ಅಂತರದಿಂದ ಭಾರತವನ್ನು ಮಣಿಸಿತು. ಹೀಗೆ, ಸತತ ಎರಡು ಸೋಲುಂಡ ಆತಿಥೇಯ ಭಾರತ ಈ ಕೂಟದಿಂದ ಹೊರಬಿದ್ದ ಮೊದಲ ತಂಡವೆಂಬ ಸಂಕಟಕ್ಕೂ ಸಿಲುಕಿತು.

“ನನ್ನ ದೇಶಕ್ಕಾಗಿ ಫಿಫಾ ಕೂಟದಲ್ಲಿ ಮೊದಲ ಗೋಲು ಬಾರಿಸಿದ್ದು ನಿಜಕ್ಕೂ ವಿಶೇಷ ಅನುಭವ. ಪಂದ್ಯದುದ್ದಕ್ಕೂ ನಮ್ಮ ಗರಿಷ್ಠ ಸಾಮರ್ಥ್ಯವನ್ನೇ ಪಣಕ್ಕಿಟ್ಟೆವು. ಆದರೆ ಅದೃಷ್ಟ ಇರಲಿಲ್ಲ. ಗೆದ್ದರೆ ಬಹಳ ಸಂತೋಷವಾಗುತ್ತಿತ್ತು’ ಎಂದು ಜೀಕ್ಸನ್‌ ಸಿಂಗ್‌ ಹೇಳಿದರು.