ತಿರುಗಿ ಬಿದ್ದ ಸಭಾಪತಿ : 8 ಎಂಎಲ್‌ಸಿಗಳಿಗೆ ಅನರ್ಹತೆಯ ಭೀತಿ !

ಬೆಂಗಳೂರು : ಸದನದ ವಿಶ್ವಾಸ ಕಳೆದುಕೊಂಡಿದ್ದಾರೆ ಎಂದು  ವಿಧಾನಪರಿಷತ್ ಸಭಾಪತಿ ಡಿಎಚ್ ಶಂಕರಮೂರ್ತಿ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸುವುದಾಗಿ ಕಾಂಗ್ರೆಸ್‌ ಸದಸ್ಯರು ನೋಟಿಸ್ ನೀಡಿದ ಬೆನ್ನಲ್ಲೇ ಪ್ರಯಾಣ ಭತ್ಯೆ ದುರ್ಬಳಕೆ ಆರೋಪದಲ್ಲಿ  8 ಮಂದಿ ಎಂಎಲ್‌ಸಿಗಳಿಗೆ ನೊಟೀಸ್‌ ನೀಡಿ ಶಾಕ್‌ ನೀಡಲಾಗಿದ್ದು, ಇದೀಗ 8 ಮಂದಿಗೆ ಅನರ್ಹತೆಯ ಭೀತಿ ಎದುರಾಗಿದೆ. 

ಸಭಾಪತಿ ಡಿಎಚ್‌ ಶಂಕರಮೂರ್ತಿ ಅವರು ಪರಿಷತ್‌ ಸದಸ್ಯರುಗಳಾದ ಅಪ್ಪಾಜಿ ಗೌಡ , ರಘು ಆಚಾರ್‌, ಎಂ.ಡಿ.ಲಕ್ಷ್ಮೀ ನಾರಾಯಣ ,ಬೋಸ್‌ರಾಜ್‌ , ಆರ್‌.ಬಿ ತಿಮ್ಮಾಪುರ, ಎಸ್‌.ರವಿ , ಅಲ್ಲಂ ವೀರಭದ್ರಪ್ಪ  ಮತ್ತು ಸಿ.ಆರ್‌ ಮನೋಹರ್‌ ಅವರಿಗೆ ನೊಟೀಸ್‌ ನೀಡಿದ್ದಾರೆ. 

ಲಕ್ಷಾಂತರ ರೂಪಾಯಿ ಪ್ರಯಾಣ ಭತ್ಯೆ ದುರ್ಬಳಕೆ ಮಾಡಲಾಗಿರುವ ಬಗ್ಗೆ ಆರೋಪ ಮಾಡಿ  ಬಿಬಿಎಂಪಿ ವಿಪಕ್ಷ ನಾಯಕ ಪದ್ಮನಾಭ ರೆಡ್ಡಿ ನೀಡಿದ ದೂರಿನ ಅನ್ವಯ ಈ ನೊಟೀಸ್‌ ನೀಡಲಾಗಿದ್ದು, ರಾಜ್ಯ ಸಭೆಯಲ್ಲಿ ಇಂತಹ ಪ್ರಕರಣಕ್ಕೆ ಕ್ರಿಮಿನಲ್‌ ಕೇಸ್‌ ಹಾಕಲಾಗುತ್ತದೆ. ನಿಮ್ಮ ಮೇಲೆ ಕ್ರಿಮಿನಲ್‌ ಕೇಸ್‌ ಏಕೆ ಹಾಕಬಾರದು ಎಂದು ಸಭಾಪತಿ ಪ್ರಶ್ನಿಸಿ ಜೂನ್‌ 3 ರ ಒಳಗೆ ಉತ್ತರ ನೀಡುವಂತೆ ಕೇಳಿದ್ದಾರೆ. 

ಇದೀಗ ನೊಟೀಸ್‌ಗೆ ಎಂಎಲ್‌ಸಿಗಳು ಯಾವ ಉತ್ತರ ನೀಡುತ್ತಾರೆ ಎಂದು ಕಾದುನೋಡಬೇಕಾಗಿದೆ.